LIC Bima Kavach Plan : ఎల్‌ఐసీ కొత్త ధమాకా.. నూరేళ్ల వరకు రక్షణ ఇచ్చే బీమా కవచ్ వచ్చేసింది

LIC Bima Kavach Plan : కుటుంబ బాధ్యతలు మోస్తున్న సామాన్యులకు భరోసానిచ్చేలా భారత ప్రభుత్వ బీమా దిగ్గజం ఎల్‌ఐసీ సరికొత్త పథకాన్ని అందుబాటులోకి తెచ్చింది. అదే బీమా కవచ్. ఇది షేర్ మార్కెట్ రిస్క్ లేని పక్కా గ్యారెంటీ ప్లాన్. సాధారణంగా మనం పాలసీ తీసుకున్న పదేళ్ల తర్వాత పెరిగే ధరలను బట్టి చూస్తే ఆ పాలసీ అమౌంట్ సరిపోదు. కానీ, ఈ బీమా కవచ్ స్కీమ్‌లో ఒక ప్రత్యేకత ఉంది. మీ వయస్సు పెరిగే కొద్దీ, మీ బాధ్యతలు పెరిగే కొద్దీ మీ ఇన్సూరెన్స్ కవరేజ్ కూడా పెరుగుతూ పోతుంది. అంటే పెరుగుతున్న ద్రవ్యోల్బణానికి తగ్గట్టుగా మీ కుటుంబానికి ఆర్థిక రక్షణ లభిస్తుంది.

ఈ పాలసీలో ఉన్న మరో అద్భుతమైన ఫీచర్ 100 ఏళ్ల వరకు రిస్క్ కవర్. సాధారణంగా చాలా ఇన్సూరెన్స్ పాలసీలు 60 లేదా 70 ఏళ్ల వయస్సు రాగానే ముగిసిపోతాయి. కానీ ఎల్‌ఐసీ బీమా కవచ్ మాత్రం మీకు నూరేళ్లు నిండేవరకు రక్షణ కల్పిస్తుంది. అంటే మీరు ఉన్నా లేకపోయినా మీ కుటుంబానికి ఆర్థికంగా ఒక బలమైన గోడలా ఈ పాలసీ నిలుస్తుంది. ఇక టెక్నాలజీ కాలానికి తగ్గట్టుగా ఈ పాలసీని ఆఫీసుల చుట్టూ తిరగకుండా ఇంట్లోనే కూర్చుని ఆన్‌లైన్ ద్వారా సులభంగా కొనుగోలు చేయవచ్చు.

ముఖ్యంగా యువతను దృష్టిలో పెట్టుకుని ఇందులో లైఫ్ స్టేజ్ ఈవెంట్ అనే ఆప్షన్ ఇచ్చారు. పెళ్లి కాకముందు ఒకలా ఉండే బాధ్యతలు, పెళ్లి అయ్యాక లేదా పిల్లలు పుట్టాక పెరుగుతాయి. ఈ విషయాన్ని గమనించిన ఎల్‌ఐసీ, మీ జీవితంలో పెళ్లి లేదా సంతానం కలిగినప్పుడు మీ ఇన్సూరెన్స్ కవరేజీని పెంచుకునే వెసులుబాటు కల్పించింది. అయితే ఈ బెనిఫిట్ కేవలం 40 ఏళ్లలోపు వయస్సు ఉన్నవారికి మాత్రమే వర్తిస్తుంది. వయస్సు పెరిగే కొద్దీ వచ్చే సవాళ్లను ఎదుర్కోవడానికి ఇది ఒక గొప్ప అవకాశం.

ప్రీమియం చెల్లింపు విషయంలో కూడా ఎల్‌ఐసీ వినియోగదారులకు పూర్తి స్వేచ్ఛను ఇచ్చింది. మీరు ఒకేసారి డబ్బు కట్టవచ్చు (సింగిల్ ప్రీమియం) లేదా 5, 10, 15 ఏళ్ల స్వల్ప కాల పరిమితితో కట్టే ఆప్షన్ ఎంచుకోవచ్చు. 18 ఏళ్ల నుంచి 65 ఏళ్ల వరకు ఎవరైనా మెడికల్ చెకప్ తర్వాత ఈ పాలసీ తీసుకోవచ్చు. ఇంకో మంచి విషయం ఏంటంటే.. ధూమపానం చేయని వారికి ప్రీమియం ధరలో ప్రత్యేక తగ్గింపు లభిస్తుంది. తక్కువ ఖర్చుతో ఎక్కువ భరోసా ఇచ్చే ఈ బీమా కవచ్ మధ్యతరగతి ప్రజలకు ఒక మంచి పెట్టుబడి మార్గం.