Custom Duty : పెట్రోకెమికల్స్ పై కస్టమ్ డ్యూటీ రద్దు.. యుద్ధం వేళ పరిశ్రమలకు కేంద్రం బంపర్ ఆఫర్

Custom Duty : పశ్చిమ ఆసియాలో నెలకొన్న యుద్ధ ఉద్రిక్తతలు ప్రపంచ దేశాలను భయపెడుతున్నా, భారత ప్రభుత్వం తన దేశీయ పరిశ్రమలను కాపాడుకునేందుకు కీలక నిర్ణయం తీసుకుంది. ఇరాన్-అమెరికా మధ్య సాగుతున్న ఘర్షణల వల్ల గ్లోబల్ సప్లై చైన్ దెబ్బతిని, ముడి పదార్థాల ధరలు ఆకాశాన్నంటుతున్నాయి. ఈ నేపథ్యంలో భారత పారిశ్రామిక రంగానికి ఊపిరి పోస్తూ, పలు కీలక పెట్రోకెమికల్ ఉత్పత్తులపై కస్టమ్ డ్యూటీని (దిగుమతి సుంకం) పూర్తిగా రద్దు చేస్తూ కేంద్రం సంచలన నిర్ణయం తీసుకుంది.

పరిశ్రమలకు అభయహస్తం

పశ్చిమ ఆసియాలో యుద్ధం కారణంగా ముడి చమురు, గ్యాస్ ధరలు పెరగడంతో రిఫైనరీ కంపెనీలు తమ భారాన్ని పెట్రోకెమికల్ పరిశ్రమలపై వేస్తున్నాయి. దీనివల్ల ప్లాస్టిక్, ప్యాకేజింగ్, బట్టలు, మందులు, ఆటో విడిభాగాల తయారీ వ్యయం విపరీతంగా పెరిగిపోయింది. ఈ సంక్షోభం నుంచి గట్టెక్కించేందుకు భారత ప్రభుత్వం జూన్ 30, 2026 వరకు ఎంపిక చేసిన పెట్రోకెమికల్ ఉత్పత్తులపై సున్నా శాతం కస్టమ్ డ్యూటీని అమలు చేయనుంది. తద్వారా ముడి సరుకు నిరంతరాయంగా లభిస్తుందని, తయారీ ఖర్చులు తగ్గి అంతిమంగా వినియోగదారులపై భారం తగ్గుతుందని ప్రభుత్వం భావిస్తోంది.

ఏయే ఉత్పత్తులకు మినహాయింపు?

ప్రభుత్వం దాదాపు 40కి పైగా రసాయనాలు, పాలిమర్లపై సుంకాన్ని ఎత్తేసింది. ఇందులో ముఖ్యంగా అమొనియా, టోలుయిన్, స్టైరిన్, మెథనాల్, ఐసోప్రోపైల్ ఆల్కహాల్, ఫినాల్, ఎసిటిక్ యాసిడ్ వంటివి ఉన్నాయి. పాలిమర్ల విభాగంలో పీవీసీ, పాలీప్రొపైలిన్, పాలీకార్బోనేట్స్, పాలిస్టర్ రెసిన్లు, పీఈటీ చిప్స్‌పై కూడా మినహాయింపు ఇచ్చారు. ఈ ఉత్పత్తులు లేనిదే ప్లాస్టిక్ పైపులు, పెయింట్లు, బట్టలు లేదా మెడికల్ పరికరాల తయారీ సాధ్యం కాదు. ఈ భారీ జాబితా పరిశ్రమల వర్గాల్లో కొత్త ఉత్సాహాన్ని నింపింది.

ఫార్మా, టెక్స్‌టైల్ రంగాలకు ఊపిరి

ఇరాన్ ఉద్రిక్తతల వల్ల ఇప్పటికే టెక్స్‌టైల్ రంగం తీవ్ర ఒత్తిడిలో ఉంది. ఇక్కడ ఎక్కువ మంది కార్మికులు పనిచేస్తుంటారు కాబట్టి, ముడిసరుకు ధరలు పెరిగితే అది నేరుగా ఉపాధిపై దెబ్బతీస్తుంది. మరోవైపు ఫార్మా రంగంలో మందుల తయారీ ఖర్చు పెరగకుండా ఈ నిర్ణయం అడ్డుకట్ట వేయనుంది. యుద్ధం ముగిసినా సరే సప్లై చైన్ సాధారణ స్థితికి రావడానికి నెలల సమయం పడుతుంది. అందుకే, ప్రభుత్వం ముందస్తు ఉపశమన చర్యను చేపట్టింది. ముడి పదార్థాల కొరత లేకుండా చూడటం ద్వారా ద్రవ్యోల్బణాన్ని అదుపులో ఉంచాలని కేంద్రం కృతనిశ్చయంతో ఉంది.

వినియోగదారుడికి లాభం ఎప్పుడు?

సాధారణంగా పెట్రోకెమికల్ ఉత్పత్తుల ధరల పెరుగుదల ఇంధన ధరల లాగా వెంటనే కనిపించదు. ప్యాకేజింగ్ మెటీరియల్ ఖరీదైనప్పుడు, ఆ ప్రభావం కొత్తగా తయారయ్యే స్టాక్ పై కనిపిస్తుంది. రోజూ మనం వాడే సబ్బులు, షాంపూలు, ఆహార ప్యాకెట్ల నుంచి మొబైల్ విడిభాగాల వరకు ప్రతి చోటా పెట్రోకెమికల్స్ వాడతారు. ప్రభుత్వం ఇప్పుడు సుంకాన్ని తగ్గించడం వల్ల రాబోయే నెలల్లో నిత్యావసర వస్తువుల ధరలు స్థిరంగా ఉండే అవకాశం ఉంది. ముఖ్యంగా తక్కువ ఆదాయం ఉన్న వర్గాలకు ఈ నిర్ణయం ఒక రక్షణ కవచంలా పనిచేయనుంది.