Multibagger Stock : షేరు కాదు, డబుల్ ఇంజిన్ రాకెట్..పెట్టిన రూ.50,000 కాస్తా రూ.1.5 కోట్లు అయ్యాయి

Multibagger Stock : ఎఫ్‌ఎంసీజీ రంగానికి చెందిన ఎలీట్‌కోన్ ఇంటర్నేషనల్ షేర్లు ప్రస్తుతం మార్కెట్లో భారీ దృష్టిని ఆకర్షిస్తున్నాయి. వరుసగా ఎనిమిది సెషన్ల నుంచి ఈ స్టాక్ అప్పర్ సర్క్యూట్‌ను తాకుతూ పరుగులు పెడుతోంది. బుధవారం ట్రేడింగ్ సెషన్‌లో 5 శాతం అప్పర్ సర్క్యూట్‌ను తాకడంతో ఈ షేరు ధర రూ.126.60 కి చేరుకుంది. ఈ అసాధారణ వృద్ధికి ప్రధాన కారణం, కంపెనీకి ఇటీవల లభించిన భారీ అంతర్జాతీయ ఆర్డర్. సోమవారం రోజున టొబాకో ఎగుమతి చేసే ఈ కంపెనీ $97.35 మిలియన్ల (సుమారు రూ.875 కోట్ల) విలువైన దీర్ఘకాలిక అంతర్జాతీయ ఒప్పందాన్ని కుదుర్చుకున్నట్లు ప్రకటించింది. ఈ వార్త వెలువడిన వెంటనే స్టాక్‌లో భారీ కొనుగోళ్ల జోరు మొదలైంది.

ఎలీట్‌కోన్ ఇంటర్నేషనల్ కంపెనీకి ఈ భారీ ఆర్డర్ యూఏఈకి చెందిన యూవీ ఇంటర్నేషనల్ ట్రేడ్ FZE అనే సంస్థ నుంచి లభించింది. ఈ ఒప్పందం ప్రకారం, ఎలీట్‌కోన్ ఇంటర్నేషనల్ టొబాకో, షీషా, హుక్కా, సిగరెట్లు, స్మోకింగ్ మిక్చర్స్, ఇతర అనుబంధ టొబాకో ఉత్పత్తులను సరఫరా చేయవలసి ఉంటుంది. ఈ డీల్ గడువు రెండు సంవత్సరాలు అయినప్పటికీ, దీనికి ఒక సంవత్సరం లాక్-ఇన్ పీరియడ్ ఉంది. అంటే కంపెనీ కనీసం ఏడాది వరకు ఈ ఒప్పందాన్ని రద్దు చేసుకోలేదు. ఈ డీల్ 2026 జనవరి 1 నుంచి అమలులోకి వస్తుంది. ఈ ఒప్పందం ద్వారా మిడిల్ ఈస్ట్ మార్కెట్లలో తమ స్థానాన్ని బలోపేతం చేసుకోవడానికి, విస్తరించడానికి సహాయపడుతుందని కంపెనీ మేనేజింగ్ డైరెక్టర్ విపిన్ శర్మ తెలిపారు.

ఎలీట్‌కోన్ ఇంటర్నేషనల్ స్టాక్ గత ఏడాదిలో మల్టీబ్యాగర్‌గా నిలిచింది. ఈ స్టాక్ ఈ సంవత్సరం ఇప్పటివరకు 1120 శాతం వరకు పెరిగింది. మరింత ఆశ్చర్యకరమైన విషయం ఏమిటంటే, 2024 ఆగస్టులో కేవలం రూ.1.34 వద్ద ఉన్న ఈ షేరు ధర, 2025 ఆగస్టు నాటికి రూ.422.65 కి చేరుకుంది. అంటే, ఈ ఒక్క సంవత్సరంలోనే ఇది పెట్టుబడిదారులకు 31,000 శాతం కంటే ఎక్కువ అద్భుతమైన రాబడిని ఇచ్చింది. ఈ లెక్కన, గత ఏడాది ఆగస్టులో ఈ షేరులో రూ.50,000 పెట్టుబడి పెట్టిన వారికి, ఈ సంవత్సరం ఆగస్టు నాటికి రూ.1.5 కోట్లకు పైగా లాభం వచ్చిందన్నమాట. గత 6 నెలల్లో కూడా ఈ స్టాక్ 119 శాతం మేర పెరిగింది.