NHAI సంచలన నిర్ణయం.. టోల్ ప్లాజాల వద్ద పాస్‌ల పూర్తి సమాచారం
టోల్ ప్లాజాల వద్ద పాస్‌ల పూర్తి సమాచారం
NHAI : భారతీయ జాతీయ రహదారుల ప్రాధికార సంస్థ టోల్ ప్లాజాల వద్ద ప్రయాణికులకు మరింత పారదర్శకత అందించే దిశగా ఒక కీలక నిర్ణయం తీసుకుంది. ఈ మేరకు శుక్రవారం (అక్టోబర్ 24) నాడు ఒక కొత్త చొరవను ప్రారంభించింది. ఇకపై, ప్రతి టోల్ ప్లాజా వద్ద స్థానిక నెలవారీ పాస్, యాన్యువల్ పాస్ గురించిన పూర్తి సమాచారాన్ని ప్రయాణికులకు కనిపించేలా సైనేజ్ బోర్డులపై ప్రదర్శిస్తారు. ప్రయాణికులకు స్థానిక, యాన్యువల్ పాస్‌లపై అవగాహన పెంచేందుకు ఎన్‌హెచ్‌ఏఐ ఈ కొత్త కార్యక్రమాన్ని ప్రారంభించింది. ఈ పాస్‌లను ఎక్కడ తయారు చేస్తారు, వాటి ధర ఎంత, పొందే ప్రక్రియ ఏమిటి అనే పూర్తి సమాచారం ఈ సైనేజ్ బోర్డుల ద్వారా అందిస్తారు. ఈ బోర్డులను టోల్ ప్లాజా ఎంట్రీ గేట్ వద్ద, కస్టమర్ సర్వీస్ సెంటర్ ఎంట్రీ, ఎగ్జిట్ మార్గాల వద్ద ప్రయాణికులు సులభంగా చూసేలా ఏర్పాటు చేస్తారు.
ఈ సైనేజ్ బోర్డులను హిందీ, స్థానిక భాషలలో ప్రదర్శించాలని ఎన్‌హెచ్‌ఏఐ ఆదేశించింది. తమ అన్ని ప్రాంతీయ కార్యాలయాలకు 30 రోజుల్లోగా ఈ బోర్డులను టోల్ ప్లాజాల వద్ద ఏర్పాటు చేయాలని స్పష్టమైన ఆదేశాలు జారీ చేసింది. ఈ బోర్డులపై సమాచారం పగలు, రాత్రి రెండు సమయాల్లో స్పష్టంగా కనిపించాలి. అంతేకాకుండా, ఈ సమాచారాన్ని రాజ్‌మార్గ యాత్ర మొబైల్ అప్లికేషన్‌లో, ఎన్‌హెచ్‌ఏఐ ప్రాజెక్ట్ వెబ్‌సైట్లలో కూడా అప్‌లోడ్ చేస్తారు.
ఏదైనా టోల్ ప్లాజాకు 20 కిలోమీటర్ల లోపల నివసిస్తూ, తమ సొంత ప్రైవేట్ వాహనంపై రోజూ ప్రయాణించే వారు ఈ పాస్‌ను పొందవచ్చు. పాస్ కోసం దరఖాస్తుదారులు తమ ఆధార్ కార్డ్, వాహనం రిజిస్ట్రేషన్ సర్టిఫికేట్, స్థానిక నివాస ధృవీకరణ పత్రాన్ని అందించాలి. ఈ పత్రాలను టోల్ ప్లాజా హెల్ప్‌డెస్క్‌లో సమర్పించి నెలవారీ పాస్‌ను పొందవచ్చు.
యాన్యువల్ పాస్ కోసం ఒక్కసారి రూ.3000 చెల్లించాల్సి ఉంటుంది. ఈ పాస్‌ను రాజ్‌మార్గ యాత్ర యాప్ ద్వారా లేదా ఫాస్ట్‌ట్యాగ్ రీఛార్జ్ ద్వారా కొనుగోలు చేయవచ్చు. ఈ పాస్ ఒక సంవత్సరం పాటు లేదా 200 సార్లు టోల్ ప్లాజాను దాటే వరకు చెల్లుబాటు అవుతుంది. ఈ వార్షిక పాస్ కూడా కేవలం ప్రైవేట్ వాహనాలకు మాత్రమే అందుబాటులో ఉంటుంది.