Sugar Stocks: స్వీట్ షాక్ ఇచ్చిన కేంద్ర ప్రభుత్వం..భారీగా పడిపోయిన షుగర్ కంపెనీల షేర్లు

Sugar Stocks: పండుగల సీజన్ రాకముందే పెరిగిన పంచదార ధరలకు కళ్లెం వేసేందుకు కేంద్ర ప్రభుత్వం రంగంలోకి దిగింది. ఏకంగా పదేళ్ల తర్వాత తొలిసారిగా 10 లక్షల మెట్రిక్ టన్నుల కచ్చా చక్కెరను ఎటువంటి సుంకం లేకుండా దిగుమతి చేసుకునేందుకు అనుమతి ఇచ్చింది. ఈ వార్తతో శుక్రవారం ఉదయం షుగర్ కంపెనీల షేర్లు భారీగా పతనమయ్యాయి. కేంద్ర ప్రభుత్వం తీసుకున్న నిర్ణయం షేర్ మార్కెట్‌లోని షుగర్ స్టాక్స్‌పై తీవ్ర ప్రభావాన్ని చూపించింది. శుక్రవారం ప్రారంభ ట్రేడింగ్‌లో ప్రధాన చక్కెర ఉత్పత్తి కంపెనీల షేర్లు ఏకంగా 5 శాతం వరకు పడిపోయాయి. డాల్మియా భారత్ షుగర్ షేర్లు అత్యధికంగా 5.47 శాతం నష్టపోయి రూ.480.30 వద్దకు చేరుకున్నాయి. ద్వారికేష్ షుగర్ ఇండస్ట్రీస్ 4.32 శాతం, బలరాంపూర్ చిని మిల్స్ 4.15 శాతం పడిపోయి రూ.735.25 వద్ద స్థిరపడ్డాయి. త్రివేణి ఇంజనీరింగ్ 3.82 శాతం నష్టపోగా, ఉత్తమ్ షుగర్, ఈఐడి ప్యారీ, ధాంపూర్ షుగర్స్ షేర్లు కూడా 2 నుంచి 3 శాతం మేర విలువను కోల్పోయాయి. అంతకుముందు రోజు దాదాపు 18 శాతం వరకు లాభపడిన స్టాక్స్, ఒక్క నిర్ణయంతో ఒక్కసారిగా పాతాళానికి పడిపోవడం గమనార్హం.

పదేళ్ల తర్వాత తొలిసారిగా పన్ను రహిత దిగుమతులు

దేశీయంగా నిల్వలు తగ్గిపోవడం, గడిచిన రెండు నెలల్లోనే పంచదార ధరలు దాదాపు 40 శాతం పెరగడంతో ప్రభుత్వం ఈ కఠిన నిర్ణయం తీసుకోవాల్సి వచ్చింది. సాధారణంగా మన దేశంలో విదేశీ చక్కెర దిగుమతులపై 100 శాతం వరకు దిగుమతి సుంకం ఉంటుంది. దాదాపు దశాబ్దం తర్వాత తొలిసారిగా ఈ సుంకాన్ని పూర్తిగా ఎత్తివేస్తూ అక్టోబర్ 31 వరకు 10 లక్షల టన్నుల రా షుగర్ దిగుమతి చేసుకోవడానికి పచ్చజెండా ఊపింది. అక్టోబర్ చివరి నాటికి పండుగల సీజన్ పూర్తి కానుండటంతో స్వీట్లు, కాన్ఫెక్షనరీ వాడకం విపరీతంగా ఉంటుంది. ఈ సమయంలో విదేశీ సరుకు మార్కెట్‌లోకి రావడం ద్వారా సరఫరా పెరిగి ధరలు అదుపులోకి వస్తాయి.

ధరల కట్టడికి కేంద్రం వేసిన ముందస్తు వ్యూహం

రేవులు, ఓడరేవుల వద్ద ఉన్న రిఫైనరీలు విదేశాల నుంచి కచ్చా చక్కెరను ఉచితంగా తెప్పించుకుని శుద్ధి చేసి దేశీయ మార్కెట్లో విక్రయించడానికి దరఖాస్తు చేసుకోవచ్చని ప్రభుత్వం ప్రకటించింది. ఇప్పటికే ఓడరేవుల్లో ఉన్న నిల్వలను కూడా అక్టోబర్ ఆఖరు నాటికి స్థానిక మార్కెట్లో విక్రయించేందుకు అనుమతులు ఇచ్చారు. కేవలం దిగుమతులే కాకుండా, నెలకు 10 మెట్రిక్ టన్నుల కంటే ఎక్కువ చక్కెరను వాడే పెద్ద వ్యాపారులు తమ వద్ద కేవలం 15 రోజులకు సరిపడా నిల్వలను మాత్రమే ఉంచుకోవాలని ప్రభుత్వం ఇప్పటికే నిబంధనలు కఠినతరం చేసింది. ఈ పరిమితులు సెప్టెంబర్ 1 నుంచి నవంబర్ 30 వరకు అమలులో ఉంటాయి.

దేశీయంగా ఊరట.. అంతర్జాతీయంగా సెగ

భారత ప్రభుత్వం తీసుకున్న ఈ నిర్ణయంతో దేశీయంగా వినియోగదారులకు లబ్ధి చేకూరి పంచదార ధరలు తగ్గే అవకాశం ఉంది. అయితే భారత మార్కెట్ నుంచి భారీగా డిమాండ్ రావడంతో అంతర్జాతీయ మార్కెట్లో పరిస్థితి తలకిందులైంది. లండన్ వైట్ షుగర్, న్యూయార్క్ రా షుగర్ ఫ్యూచర్స్ మార్కెట్లో ధరలు ఒక్కసారిగా 4 శాతం వరకు పెరిగాయి. అంతర్జాతీయంగా ధరలు పెరిగినప్పటికీ, మన దేశంలో మాత్రం లభ్యత పెరిగి సామాన్యుడికి ధరల భారం నుంచి పెద్ద ఊరట లభించనుంది.