Kishan Reddy : తెలంగాణకు శుభవార్త.. రూ. 10,000 కోట్ల పెట్టుబడులు: కిషన్ రెడ్డి ప్రకటన

 Kishan Reddy : రాబోయే మూడు సంవత్సరాల్లో తెలంగాణలో కేంద్ర ప్రభుత్వ సంస్థలు రూ. 10,000 కోట్ల పెట్టుబడులు పెట్టనున్నాయని కేంద్ర బొగ్గు, గనుల శాఖ మంత్రి జి. కిషన్ రెడ్డి ప్రకటించారు. బొగ్గు మంత్రిత్వ శాఖ పరిధిలోని కోల్ ఇండియా లిమిటెడ్, ఎన్‌ఎల్‌సి ఇండియా లిమిటెడ్ వంటి ప్రభుత్వ రంగ సంస్థలు తెలంగాణలో పునరుత్పాదక ఇంధన ప్రాజెక్టులు, సౌర పవన శక్తి ప్లాంట్లు, పంప్డ్ స్టోరేజ్ ప్రాజెక్టులు, బ్యాటరీ స్టోరేజ్ సిస్టమ్‌లను ఏర్పాటు చేయడానికి సిద్ధంగా ఉన్నాయని కిషన్ రెడ్డి తెలిపారు. ఈ విషయంపై ఆయన తెలంగాణ ముఖ్యమంత్రి రేవంత్ రెడ్డికి లేఖ కూడా రాశారు.

"తెలంగాణకు పునరుత్పాదక ఇంధన ఉత్పత్తి సామర్థ్యం ఉంది. కేంద్ర ప్రభుత్వం కూడా పర్యావరణ అనుకూల శక్తికి ఎక్కువ ప్రాధాన్యత ఇస్తోంది. కేంద్ర, రాష్ట్ర ప్రభుత్వాల సహకారంతో తెలంగాణ ఆర్థిక అభివృద్ధి పెరుగుతుంది, ఉద్యోగ కల్పన కూడా సులభతరం అవుతుంది. స్థిరమైన అభివృద్ధిలో ఈ రాష్ట్రం ముందంజలో ఉండగలుగుతుంది" అని కేంద్ర మంత్రి కిషన్ రెడ్డి అన్నారు.

తెలంగాణలో కేంద్ర ప్రభుత్వ సంస్థల ద్వారా ప్రతిపాదించిన కొన్ని పెట్టుబడులు:

* తెలంగాణలో సౌర విద్యుత్ ఉత్పత్తి కేంద్రాల ఏర్పాటు.

* ఆధునిక బ్యాటరీ ఎనర్జీ స్టోరేజ్ సిస్టమ్‌ల ఏర్పాటు.

* పంప్డ్ స్టోరేజ్ ప్రాజెక్టులపై అధ్యయనం, వాటిని అమలు చేయడం.

* కేంద్ర, రాష్ట్ర ప్రభుత్వ సంస్థలు కలిసి ప్రాజెక్టులను చేపట్టడం లేదా బొగ్గు కంపెనీలు స్వతంత్రంగా ప్రాజెక్టులను నిర్వహించడం.

ఈ పై ప్రాజెక్టులను అమలు చేయడానికి భూసేకరణ అవసరం అవుతుంది. ఈ విషయంలో రాష్ట్ర ప్రభుత్వం మద్దతు ఇవ్వాల్సిన అవసరం ఉందని కిషన్ రెడ్డి అభిప్రాయపడ్డారు. ఇది తెలంగాణ ఆర్థిక వ్యవస్థకు, ముఖ్యంగా ఇంధన రంగానికి గణనీయమైన ఊతం ఇస్తుందని, తద్వారా రాష్ట్రంలో ఉద్యోగావకాశాలు కూడా పెరుగుతాయని నిపుణులు భావిస్తున్నారు.