Anthropic : వినాశనం అంచున ప్రపంచం ? ఆంత్రోపిక్ కీలక అధికారి మృణాంక్ శర్మ సంచలన రాజీనామా

Anthropic : ప్రపంచ ప్రఖ్యాత ఆర్టిఫిషియల్ ఇంటెలిజెన్స్ సంస్థ ఆంత్రోపిక్‎లో కీలక పరిణామం చోటుచేసుకుంది. ఆ సంస్థ సేఫ్‌గార్డ్స్ రీసెర్చ్ విభాగాధిపతిగా ఉన్న మృణాంక్ శర్మ తన పదవికి రాజీనామా చేశారు. అయితే ఆయన రాజీనామా కంటే కూడా, ఆయన చేసిన ట్వీట్ ఇప్పుడు ప్రపంచవ్యాప్తంగా చర్చనీయాంశమైంది. "ఈ ప్రపంచం వినాశనం అంచున ఉంది" అంటూ ఆయన చేసిన హెచ్చరిక టెక్ ప్రపంచంలో ప్రకంపనలు సృష్టిస్తోంది. మృణాంక్ శర్మ తన రాజీనామా లేఖలో చాలా గంభీరమైన విషయాలను ప్రస్తావించారు. కేవలం ఏఐ లేదా బయోవెపన్ల వల్లే కాకుండా, ప్రపంచవ్యాప్తంగా ఒకదానికొకటి ముడిపడి ఉన్న అనేక సంక్షోభాల వల్ల భూమి ప్రమాదంలో ఉందని ఆయన ఆవేదన వ్యక్తం చేశారు. "ప్రపంచంపై ప్రభావం చూపగల మన సామర్థ్యానికి తగినంత వివేకం మనలో పెరగడం లేదు" అని ఆయన పేర్కొన్నారు. అంటే, మనిషి దగ్గర భారీ శక్తి ఉన్న టెక్నాలజీ ఉంది కానీ, దాన్ని ఎలా బాధ్యతాయుతంగా వాడాలో తెలియడం లేదు అనేది ఆయన ప్రధాన ఉద్దేశ్యం.

మృణాంక్ శర్మ ఆంత్రోపిక్‌లో ఏఐ భద్రత విభాగానికి నాయకత్వం వహించారు. అయితే, ఏఐ భద్రత కంటే కంపెనీ తన వృద్ధికి, లాభాలకే ఎక్కువ ప్రాధాన్యత ఇస్తోందని ఆయన పరోಕ್ಷంగా అసంతృప్తి వ్యక్తం చేశారు. "ముఖ్యమైన విషయాలను నిర్లక్ష్యం చేయమని నాపై నిరంతరం ఒత్తిడి వస్తోంది. మౌల్యాల కంటే వ్యాపార ప్రయోజనాలే పెద్దవైపోయాయి" అని ఆయన లేఖలో రాశారు. అంటే ఏఐ వల్ల భవిష్యత్తులో వచ్చే ప్రమాదాల కంటే, దాన్ని మార్కెట్లోకి తేవడమే కంపెనీల లక్ష్యంగా మారిందని ఆయన ఆందోళన వ్యక్తం చేశారు.

గతంలో ఓపెన్ ఏఐలో పనిచేసిన ఇల్యా సుట్స్కేవర్ వంటి దిగ్గజాలు కూడా ఇలాగే ఏఐ భద్రత గురించి హెచ్చరిస్తూ బయటకు వచ్చారు. ఇప్పుడు ఆంత్రోపిక్ నుంచి మృణాంక్ శర్మ కూడా అదే బాట పట్టడం టెక్ రంగంలో కలకలం రేపుతోంది. ఏఐ టెక్నాలజీ మానవ నియంత్రణను దాటిపోయే ప్రమాదం ఉందని, అది బయోవెపన్లు తయారు చేయడానికి లేదా సైబర్ యుద్ధాలకు దారితీయవచ్చని నిపుణులు భయపడుతున్నారు. మృణాంక్ శర్మ ఇప్పుడు బ్రిటన్‌కు వెళ్లిపోయి, కొంతకాలం ఏకాంతంగా గడపాలని నిర్ణయించుకున్నారు.

మృణాంక్ శర్మ భారత సంతతికి చెందిన వ్యక్తి. బెంగళూరు మూలాలున్న ఈయన, ఆంత్రోపిక్ సంస్థలో అత్యంత కీలకమైన పదవిలో ఉండేవారు. ఏఐ టెక్నాలజీ వల్ల మానవాళికి ముప్పు కలగకుండా ఉండటానికి కావాల్సిన సేఫ్‌గార్డ్స్ ను రూపొందించడంలో ఆయనది ప్రధాన పాత్ర. ఆయన లాంటి వ్యక్తి సంస్థను వీడటం, అటువంటి హెచ్చరికలు చేయడం ఏఐ భవిష్యత్తుపై పెద్ద ప్రశ్నార్థకాన్ని మిగిల్చింది.