Allu Arjun: బ్లడ్ క్యాన్సర్‌తో పోరాడుతున్న ఎనిమిదేళ్ల చిన్నారి కోరిక తీర్చిన ఐకాన్ స్టార్ అల్లు అర్జున్..

Allu Arjun: వెండితెరపైనే కాదు.. నిజ జీవితంలోనూ తాను రియల్ హీరో అనిపించుకున్నారు ఐకాన్ స్టార్ అల్లు అర్జున్. ల్యుకేమియా అనే ప్రాణాంతక వ్యాధితో పోరాడుతున్న ఎనిమిదేళ్ల శ్రద్ధ అనే చిన్నారి చిరకాల కోరికను తీర్చి తన పెద్ద మనసును చాటుకున్నారు. తీవ్ర అనారోగ్యంతో బాధపడే పిల్లల ఆఖరి కోరికలను నెరవేర్చే మేక్ ఎ విష్ ఫౌండేషన్ ఆఫ్ ఇండియా ప్రతినిధులు జూన్ 19న బన్నీ కార్యాలయాన్ని సంప్రదించగా, ఆయన తన బిజీ షూటింగ్ షెడ్యూల్‌ను సైతం పక్కనపెట్టి తక్షణమే స్పందించారు.

పుష్ప మేనరిజంతో సందడి - వీడియో కాల్ ముచ్చట్లు..

చిన్నారి శ్రద్ధతో అల్లు అర్జున్ మాట్లాడిన వీడియో కాల్ దృశ్యాలను ఆయన పీఆర్ టీమ్ సోషల్ మీడియాలో పంచుకుంది. ఈ వర్చువల్ సంభాషణలో బన్నీ ఆ చిన్నారితో ఎంతో ఆప్యాయంగా హిందీలో మాట్లాడారు.

ఐకానిక్ మేనరిజం:

చిన్నారిని నవ్వుతూ పలకరిస్తూ.. పుష్ప: ది రైజ్ చిత్రంలోని పాపులర్ డైలాగులు చెప్పాల్సిందిగా అల్లు అర్జున్ ప్రోత్సహించారు. ఈ క్రమంలోనే ఇద్దరూ కలిసి స్క్రీన్‌పై ఒకేసారి తగ్గేదే లే అంటూ గడ్డం కింద చేయి తిప్పే ఐకానిక్ మేనరిజంను చేసి చూపించారు. ఆ క్యూట్ యాక్షన్‌కు బన్నీ ఫిదా అయిపోయి డ్యామ్ క్యూట్ అంటూ చప్పట్లతో అభినందించారు.

భవిష్యత్తు ఆశయం:

భవిష్యత్తులో ఏం అవుతావని బన్నీ అడగ్గా.. తాను డాక్టర్ అవుతానని ఆ చిన్నారి ధీమాగా చెప్పింది. దీంతో సంతోషించిన అల్లు అర్జున్.. ఆమె త్వరగా కోలుకోవాలని ఆకాంక్షిస్తూ, ఆరోగ్యం కుదుటపడిన తర్వాత కచ్చితంగా హైదరాబాద్ వచ్చి తనను కలవాలని ప్రత్యేకంగా ఆహ్వానించారు. "సినిమా రంగానికి ఆవల కూడా ఇలాంటి అమాయకపు ముఖాల్లో నవ్వులను పూయించడమే మా ముఖ్య ఉద్దేశం."

అల్లు అర్జున్ టీమ్

ఒకవైపు రాకా షూటింగ్.. మరోవైపు లీగల్ ప్రాసెస్..

ప్రస్తుతం అల్లు అర్జున్ కోలీవుడ్ స్టార్ డైరెక్టర్ అట్లీ దర్శకత్వంలో తెరకెక్కుతున్న రాకా అనే సైన్స్ ఫిక్షన్ ఎంటర్‌టైనర్ షూటింగ్‌తో బిజీగా ఉన్నారు. ఈ భారీ ప్రాజెక్ట్‌లో దీపికా పదుకొణె కథానాయికగా నటిస్తోంది.

మరోవైపు 2024లో పుష్ప 2: ది రూల్ స్పెషల్ స్క్రీనింగ్ సందర్భంగా ఆర్టీసీ క్రాస్ రోడ్స్‌లోని సంధ్య థియేటర్ వద్ద జరిగిన తొక్కిసలాట కేసుకు సంబంధించి జూన్ 22న అల్లు అర్జున్ హైదరాబాద్‌లోని నాంపల్లి కోర్టుకు హాజరుకానున్నారు.