Actor Dharmendra Passes Away: బాలీవుడ్‌కు తీరని లోటు.. దిగ్గజ నటుడు ధర్మేంద్ర మరణం..

Actor Dharmendra Passes Away: బాలీవుడ్ హీ-మ్యాన్‌గా, లెజెండరీ నటుడిగా పేరుపొందిన దిగ్గజం ధర్మేంద్ర (89) తుదిశ్వాస విడిచారు. గత కొన్ని నెలలుగా శ్వాసకోశ సమస్యలతో బాధపడుతున్న ఆయన ఆరోగ్యం సోమవారం విషమించడంతో కన్నుమూశారు. ఈ వార్త తెలిసిన వెంటనే సినిమా ప్రపంచం విషాదంలో మునిగిపోయింది. అభిమానులు, సహనటులు సోషల్ మీడియాలో ఆయనకు నివాళులర్పిస్తున్నారు.

అక్టోబర్ 31న అనారోగ్యంతో బ్రీచ్ క్యాండీ ఆస్పత్రికి చేరుకున్న ధర్మేంద్రకు రొటీన్ చెకప్‌లా చికిత్స అందించారు. అప్పట్లోనే మరణ వార్తలు వైరల్ అవ్వడంతో కుటుంబ సభ్యులు, భార్య హేమ మాలిని, కుమారుడు సన్నీ దేవోల్ 'ఆయన ఆరోగ్యం స్థిరంగా ఉంది, ఆందోళన పడాల్సిన అవసరం లేదు' అంటూ వ్యక్తపరిచారు. అభిమానులు ప్రార్థనలు చేస్తూ ఆయన త్వరగా కోలుకోవాలని ఆకాంక్షించారు. కానీ, ఈరోజు ఆయన పరిస్థితి విషమంగా మారడంతో కన్నుమూశారని తెలిపారు. ఈ విషయం తెలిసిన వెంటనే సినీ, రాజకీయ వర్గాల్లో షాక్ వ్యక్తమైంది.

ధర్మేంద్ర పార్థివ దేహాన్ని కుటుంబ సభ్యులు అంబులెన్స్‌లో ముంబయిలోని విల్లే పార్లే శ్మశానవాటికకు తరలించారు. ఆయన మరణ సమాచారం తెలుసుకున్న సినిమా ప్రముఖులు – అమితాబ్ బచ్చన్, షాహ్ రుఖ్ ఖాన్, సల్మాన్ ఖాన్ తదితరులు శ్మశానవాటికకు తరలి నివాళులర్పించారు. దర్శక నిర్మాత కరణ్ జోహర్ ఇన్‌స్టాగ్రామ్‌లో పోస్ట్ పెట్టి, 'ఒక శకం ముగిసింది. మెగాస్టార్, గొప్ప హీరో, ఇండియన్ సినిమా లెజెండ్ – వన్ అండ్ ఓన్లీ ధర్మేంద్ర్‌జీ.. మిమ్మల్ని మేము ఎంతో మిస్ అవుతాం' అంటూ విచారం వ్యక్తం చేశారు. ఇక్కడే సల్మాన్ ఖాన్ కూడా ఓ భావోద్వేగ పోస్ట్‌తో ఆయన అనుబంధాన్ని గుర్తుచేశారు.

హీ-మ్యాన్‌గా బాలీవుడ్‌ను ఆకర్షించిన ధర్మేంద్ర..

1935 డిసెంబర్ 8న పంజాబ్‌లో జన్మించిన ధర్మేంద్ర పూర్తి పేరు ధర్మేంద్ర్ కెవల్ కృష్ణ్ దేవోల్. 1954లో ప్రకాశ్ కౌర్‌ను వివాహం చేసుకున్న ఆయనకు సన్నీ దేవోల్, బాబీ దేవోల్ తదితరులు. 1980లో హేమ మాలినిని రెండో వివాహం చేసుకున్నారు. ఆరుగురు సంతానం కలిగిన ధర్మేంద్ర బాలీవుడ్‌లో 'హీ-మ్యాన్'గా ఆకట్టుకున్నారు. 1960లో 'దిల్ బీ తేరా హమ్ బీ తేరే'తో నటనాభియానాన్ని ప్రారంభించిన ఆయన 'అన్‌పఢ్', 'బందినీ', 'అనుపమా', 'ఆయా సావన్ జూమ్ కే' వంటి చిత్రాలతో మంచి గుర్తింపు పొందారు.

ఆ తర్వాత 'షోలే', 'ధర్మవీర్', 'చుప్కే చుప్కే', 'మేరా గావ్ మేరా దేశ్', 'డ్రీమ్ గర్ల్'లాంటి బ్లాక్‌బస్టర్లతో బాక్సాఫీస్ రికార్డులు సృష్టించారు. 300కి పైగా చిత్రాల్లో నటించిన ధర్మేంద్రకు నటనా అవార్డులు అలాగే 2012లో పద్మభూషణ్ పురస్కారం లభించాయి. రాజకీయాల్లో కూడా చురుకుగా ఉన్నారు. 2004లో బికనీర్‌ నుంచి భాజపా టికెట్‌పై లోక్‌సభ సభ్యుడిగా గెలిచారు. చివరిగా 'తేరీ బాతోమే ఐసా ఉల్జా జియా' చిత్రంలో కనిపించిన ఆయన తాజా ప్రాజెక్ట్ 'ఇక్కీస్' త్వరలో విడుదల కానుంది.

ధర్మేంద్ర విరామం బాలీవుడ్‌కు తీరని నష్టం. ఆయన హీరోయిజం, నటనా ప్రతిభలు ఎప్పటికీ గుర్తుంటాయి. ఆయన ఆత్మకు శాంతి చేకూరాలని అభిమానులు ప్రార్థిస్తున్నారు.