Champion Gears Up for OTT Release: ఛాంపియన్ ఓటీటీకి రెడీ.. నెట్‌ఫ్లిక్స్‌లో స్ట్రీమింగ్ ఎప్పటి నుంచంటే?

Champion Gears Up for OTT Release: టాలీవుడ్ యువ నటుడు, శ్రీకాంత్ తనయుడు రోషన్ మేక ప్రధాన పాత్రలో నటించిన పీరియాడిక్ యాక్షన్ డ్రామా 'ఛాంపియన్' డిజిటల్ విడుదలకు సిద్ధమైంది. క్రీడా నేపథ్యంతో సాగే ఈ చిత్రం స్వాతంత్ర్యానంతర కాలంలో నిజాం పాలనలోని రజాకార్ల వ్యవస్థను కళ్లకు కట్టినట్లు చూపిస్తుంది. దర్శకుడు ప్రదీప్ అద్వైతం తెరకెక్కించిన ఈ చిత్రాన్ని, చరిత్రను క్రీడలతో మిళితం చేసి చూపించిన తీరుకు విమర్శకుల నుండి మంచి ప్రశంసలు లభించాయి. థియేటర్లలో విడుదలైన ఐదు వారాల తర్వాత ఇప్పుడు ఈ సినిమా ఓటీటీ ప్రేక్షకులను పలకరించేందుకు సిద్ధమవుతోంది.

ప్రముఖ ఓటీటీ సంస్థ నెట్‌ఫ్లిక్స్ తమ ప్లాట్‌ఫామ్‌లో ఈ సినిమాను జనవరి 29, గురువారం నుండి స్ట్రీమింగ్ చేయనున్నట్లు అధికారికంగా ప్రకటించింది. ఇప్పటికే నెట్‌ఫ్లిక్స్ తన కేటలాగ్‌లో ఈ ప్రీమియర్ తేదీని అప్‌డేట్ చేసింది. అయితే ప్రస్తుతం తెలుగు వెర్షన్ మాత్రమే అందుబాటులోకి రానుండగా, ఇతర భాషల డబ్బింగ్ వెర్షన్ల గురించి ఇంకా ఎటువంటి స్పష్టత లేదు. మలయాళ ముద్దుగుమ్మ అనస్వర రాజన్ ఈ సినిమాతోనే టాలీవుడ్‌లోకి అడుగుపెట్టడం విశేషం.

ఈ చిత్రాన్ని స్వప్న సినిమా, ఆనంది ఆర్ట్ క్రియేషన్స్, కాన్సెప్ట్ ఫిల్మ్స్ బ్యానర్లపై ప్రియాంక దత్, జి.కె. మోహన్ మరియు జెమిని కిరణ్ సంయుక్తంగా నిర్మించగా, జీ స్టూడియోస్ సమర్పించింది. మురళీ శర్మ, నందమూరి కల్యాణ చక్రవర్తి, సంతోష్ ప్రతాప్ వంటి నటులు కీలక పాత్రలు పోషించిన ఈ సినిమాకు మిక్కీ జే మేయర్ అద్భుతమైన సంగీతాన్ని అందించారు. ఓటీటీలో ఈ చారిత్రాత్మక స్పోర్ట్స్ డ్రామా ప్రేక్షకులను ఏ మేరకు ఆకట్టుకుంటుందో వేచి చూడాలి.