Copyright Case Verdict: కాపీరైట్ కేసు.. ఇళయరాజాకు అనుకూలంగా తీర్పు!

Copyright Case Verdict: సంగీత మాంత్రికుడు ఇళయరాజాకు కాపీరైట్ కేసులో ఊరట లభించింది. తన పాటలకు సంబంధించిన కాపీరైట్‌ను ఉల్లంఘించారంటూ మ్యూజిక్ లేబుల్ కంపెనీలపై ఆయన దాఖలు చేసిన కేసులో మద్రాస్ హైకోర్టు ఇళయరాజాకు అనుకూలంగా తీర్పు ఇచ్చింది. దీనితో ఆయనకు తన పాటలపై పూర్తి కాపీరైట్ హక్కులు లభించాయి. ఇళయరాజా సంగీతం అందించిన పాటలను తమ యూట్యూబ్ ఛానెల్స్, ఇతర వేదికలపై ఉపయోగిస్తున్నారంటూ ప్రఖ్యాత మ్యూజిక్ లేబుల్ కంపెనీలైన లహరి మ్యూజిక్, యూనిసిస్, అగ్రి మ్యూజిక్లపై ఇళయరాజా కేసు దాఖలు చేశారు. గతంలో ఇళయరాజా తమకు పాటల కాపీరైట్స్ ఇచ్చారని, అందుకే వాటిని వాడుకుంటున్నామని ఆ సంస్థలు వాదించాయి. ఈ కేసును విచారించిన మద్రాస్ హైకోర్టు, ఇళయరాజా వాదనలతో ఏకీభవించింది. పాటల కాపీరైట్స్ వాటిని స్వరపరిచిన సంగీత దర్శకుడికి ఉంటాయని, నిర్మాతలకు కేవలం ఆ సినిమా వరకు మాత్రమే పాటలను వాడుకునే హక్కు ఉంటుందని కోర్టు స్పష్టం చేసింది. గతంలో ఇళయరాజా చేసుకున్న ఒప్పందాలు పాటల ప్రచురణకు సంబంధించినవి మాత్రమేనని, వాటిపై కాపీరైట్ హక్కులు బదిలీ అయినట్లు ఆధారాలు లేవని తేల్చి చెప్పింది. దీనితో ఇళయరాజా గతంలో స్వరపరచిన దాదాపు 30 వేల పాటలపై పూర్తి హక్కులు ఆయనకే చెందుతాయి. తన పాటల కాపీరైట్లను ఉల్లంఘించి ఎవరైనా వాటిని వినియోగిస్తే వారిపై చట్టపరమైన చర్యలు తీసుకోవడానికి ఆయనకు ఇప్పుడు పూర్తి అధికారం ఉంది. ఈ తీర్పుతో గతంలో సినిమా నిర్మాతలు, మ్యూజిక్ కంపెనీలు తమ దగ్గర ఉన్న పాటల హక్కుల విషయంలో ఇతరులకు అమ్ముకునే అధికారాన్ని కోల్పోయినట్లయ్యింది. భారతదేశంలోని సంగీత దర్శకులు, పాటల రచయితలకు ఇది ఒక చారిత్రాత్మక తీర్పుగా నిలిచిపోతుంది.