Yoga Narasimha: సింహ వాహనంపై యోగ నరసింహుని అలంకారంలో శ్రీ మలయప్పస్వామి

Yoga Narasimha: తిరుమల శ్రీవారి నవరాత్రి బ్రహ్మోత్సవాల్లో భాగంగా మూడో రోజైన బుధవారం ఉదయం శ్రీ మలయప్పస్వామివారు సింహ వాహనంపై యోగ నరసింహస్వామి అలంకారంలో భక్తులకు దివ్యదర్శనమిచ్చారు. సింహ వాహనంపై కొలువుదీరిన స్వామివారి దివ్యమంగళ రూపాన్ని దర్శించుకున్న భక్తులు గోవింద నామస్మరణలతో భక్తిపారవశ్యంలో మునిగిపోయారు.

భక్తి వైభవంతో సాగిన సింహ వాహనసేవ

గోవింద నామస్మరణలతో మార్మోగిన తిరుమాడ వీధుల్లో సింహ వాహనసేవ అత్యంత వైభవంగా సాగింది. ముందుగా గజరాజులు గంభీరంగా నడుస్తుండగా, భక్తబృందాల భజనలు, కోలాటాలు, జీయంగార్ల వేదఘోష, మంగళవాయిద్యాల నడుమ స్వామివారి వాహనసేవ కన్నులపండువగా జరిగింది. తిరుమల పురవీధులు భక్తి, ఆధ్యాత్మికత, హరినామ సంకీర్తనలతో పులకించిపోయాయి.

సింహ వాహనం – ధైర్యానికి, పరాక్రమానికి ప్రతీక

సింహం ధైర్యం, పరాక్రమం, తేజస్సు, గంభీరతలకు ప్రతీక. దుష్టశిక్షణ, శిష్టరక్షణ సంకల్పాన్ని చాటుతూ శ్రీ మలయప్పస్వామివారు సింహ వాహనాన్ని అధిరోహించారు. యోగ నరసింహస్వామి అలంకారంలో స్వామివారి దివ్యదర్శనం భక్తులకు నిర్భయత్వం, ఆత్మవిశ్వాసం, ధర్మమార్గంలో నడిచే స్ఫూర్తిని అందించింది. భగవంతుని అనుగ్రహంతో ధర్మమే విజయాన్ని సాధిస్తుందనే ఆధ్యాత్మిక సందేశాన్ని ఈ వాహనసేవ చాటిచెప్పింది.

ఈ వాహనసేవలో తిరుమల శ్రీవారి ఆలయ పెద్ద జీయర్‌స్వామి, చిన్న జీయర్‌స్వామి, టీటీడీ ఈవో శ్రీ ముద్దాడ రవిచంద్ర, అదనపు ఈవో శ్రీ సీహెచ్ వెంకయ్య చౌదరి, బోర్డు సభ్యులు శ్రీ భాను ప్రకాష్ రెడ్డి, శ్రీమతి జానకిదేవి, శ్రీమతి రంగశ్రీ, శ్రీ శాంత రామ్, సీవీఎస్‌వో శ్రీ కే.వి. మురళీకృష్ణ తదితరులు పాల్గొన్నారు.