Swollen Legs: కాళ్ల వాపులు సాధారణమేనా? నిర్లక్ష్యం చేస్తే ముప్పే.. ఆరోగ్య నిపుణుల హెచ్చరిక..

Swollen Legs: రోజంతా నిలబడి పనిచేయడం, ఎక్కువసేపు కూర్చోవడం లేదా సుదీర్ఘ ప్రయాణాలు చేయడం వల్ల కాళ్లలో వాపులు రావడం తరచుగా చూస్తుంటాం. అయితే ఈ వాపులు తరచుగా వస్తున్నా లేదా రోజుల తరబడి తగ్గకపోయినా దాన్ని సాధారణ విషయంగా భావించి నిర్లక్ష్యం చేయవద్దని వైద్య నిపుణులు హెచ్చరిస్తున్నారు. ఇది శరీరం లోపల ఉన్న గంభీరమైన ఆరోగ్య సమస్యలకు సంకేతం కావచ్చని తెలుపుతున్నారు.

కాళ్ల వాపులకు ప్రధాన కారణాలు..

హృదయ సంబంధిత సమస్యలు:

గుండె రక్తాన్ని సరిగ్గా పంపింగ్ చేయలేకపోయినప్పుడు, ద్రవాలు కాళ్లు, మడమలలో చేరి వాపులకు దారితీస్తాయి.

కిడ్నీ వ్యాధులు:

శరీరంలోని అదనపు నీరు, ఉప్పును మూత్రపిండాలు సరిగ్గా బయటకు పంపలేనప్పుడు కాళ్లలో నీరు చేరి వాపులు వస్తాయి.

కాలేయ వ్యాధులు:

కాలేయ సమస్యల వల్ల రక్తంలో అల్బుమిన్ అనే ప్రొటీన్ పరిమాణం తగ్గి, ద్రవాల సమతుల్యత దెబ్బతిని కాళ్ల వాపులు ఏర్పడతాయి.

రక్తనాళాల సమస్యలు:

కాళ్లలోని సిరలు రక్తాన్ని తిరిగి గుండెకు సరిగ్గా తీసుకెళ్లలేకపోవడం వల్ల కాళ్లలో రక్తం పేరుకుపోయి నొప్పి, బరువుగా అనిపించడం వంటివి జరుగుతాయి.

రక్తం గడ్డకట్టడం:

ఒకే కాలులో ఆకస్మిక వాపు, తీవ్రమైన నొప్పి, ఎర్రబడటం మరియు వెచ్చగా అనిపిస్తే అది DVT కావచ్చు. ఇది అత్యవసర వైద్య పరిస్థితి.

గర్భధారణ :

గర్భధారణ సమయంలో ద్రవాల పరిమాణం పెరగడం వల్ల సాధారణ వాపులు రావచ్చు. అయితే తీవ్రమైన వాపుతో పాటు తలనొప్పి, అధిక రక్తపోటు ఉంటే వెంటనే వైద్యుడిని సంప్రదించాలి.

ఎలాంటి పరిస్థితుల్లో వెంటనే డాక్టర్‌ను సంప్రదించాలి?

కాలులో ఆకస్మికంగా తీవ్రమైన వాపు లేదా నొప్పి రావడం.

చర్మం ఎర్రబడటం, జ్వరం రావడం.

వాపుతో పాటు ఊపిరి ఆడకపోవడం లేదా ఛాతీలో నొప్పి రావడం.

శరీర బరువు వేగంగా పెరగడం.

నిర్ధారణ పరీక్షలు..

కాళ్ల వాపులకు అసలు కారణం తెలుసుకోవడానికి వైద్యులు CBC, మూత్ర పరీక్ష , కిడ్నీ, లివర్ ఫంక్షన్ టెస్ట్‌లు, ECG, ఎకోకార్డియోగ్రఫీ, అలాగే Venous Doppler Ultrasound వంటి పరీక్షలను రికమండ్ చేస్తారు.

నివారణ - జీవనశైలి చిట్కాలు:

రెస్ట్ - ఎలివేషన్: విశ్రాంతి తీసుకునేటప్పుడు కాళ్లను గుండె కంటే కొద్దిగా ఎత్తులో ఉంచాలి.

ఉప్పు తగ్గించడం: ఆహారంలో ఉప్పు వాడకాన్ని తగ్గించి, పొటాషియం ఎక్కువగా ఉండే అరటిపండ్లు, దోసకాయ, పుచ్చకాయ, పాలకూర వంటి ఆహారాలు తీసుకోవాలి.

కదలికలు: గంటల తరబడి ఒకేచోట కూర్చోకుండా మధ్యమధ్యలో కొద్దిగా నడవాలి.

శరీర బరువు నియంత్రణ: వ్యాయామం చేయడం ద్వారా శరీర బరువు, రక్తపోటును అదుపులో ఉంచుకోవాలి.

కంప్రెషన్ స్టాకింగ్స్:

డాక్టర్ సలహా మేరకు సరిపడే సాక్స్ వాడవచ్చు.