Breastfeeding Mothers Drink Coffee: పసిపాపకు పాలు ఇచ్చే తల్లులు తమ ఆహార నియమాల విషయంలో చాలా జాగ్రత్తలు తీసుకుంటారు. చిన్నారి ఆరోగ్యానికి ఏది మంచిది, ఏది కాదు అనే సందేహాలు వారిలో నిరంతరం మెదులుతూనే ఉంటాయి. ముఖ్యంగా నిద్రలేమి, అలసట నుంచి కాస్త ఉపశమనం పొందడానికి ఉదయాన్నే ఒక కప్పు కాఫీ తాగే అలవాటు ఉన్న బాలింతల్లో.. "కాఫీ తాగడం వల్ల పాలు తాగే బిడ్డపై ఏమైనా ప్రతికూల ప్రభావం పడుతుందా?" అనే ఆందోళన ఉంటుంది. ఈ విషయంపై ఆరోగ్య నిపుణులు, పిల్లల వైద్యులు వెల్లడించిన నిజాలు, సూచనలు ఇప్పుడు చూద్దాం.

పాలు ఇచ్చే తల్లులు కాఫీ తాగవచ్చా?

అవును, తాగవచ్చు అయితే పరిమితికి లోబడి మాత్రమే తీసుకోవాలని నిపుణులు స్పష్టం చేస్తున్నారు. తల్లి కాఫీ తాగినప్పుడు అందులోని కెఫిన్ స్వల్ప మోతాదులో తల్లి పాల ద్వారా పసికందుకు చేరుతుంది. పెద్దవారితో పోలిస్తే పసిపాపల కాలేయం ఇంకా పూర్తిగా పరిపక్వత చెందదు. కాబట్టి ఆ కెఫిన్‌ను జీర్ణం చేసుకోవడానికి పిల్లల శరీరానికి ఎక్కువ సమయం పడుతుంది.

రోజుకు ఎంత కాఫీ తాగడం సురక్షితం?

ఆరోగ్య నిపుణుల ప్రకారం.. బాలింతలు రోజుకు 200 మిల్లీగ్రాముల కంటే తక్కువ కెఫిన్ మాత్రమే తీసుకోవడం సురక్షితం.

అతిగా కాఫీ తాగితే బిడ్డపై పడే దుష్ప్రభావాలు:

పరిమితికి మించి కాఫీ తాగడం వల్ల పసికందులలో ఈ క్రింది సమస్యలు కనిపిస్తాయి..

నిద్రలేమి - చిరాకు:

కెఫిన్ ప్రభావంతో పాపాయి ప్రశాంతంగా నిద్రపోలేకపోవడం, ససిగా ఉండటం లేదా ఏడుస్తూ చిరాకు పడటం జరుగుతుంది.

గ్యాస్ & కడుపులో అసౌకర్యం

చిన్నారికి కడుపునొప్పి, గ్యాస్ ఏర్పడటం లేదా పాలు సరిగ్గా జీర్ణం కాకపోవడం వంటివి ఎదురవుతాయి.

హృదయ స్పందనలు పెరగడం

అధిక మోతాదు కెఫిన్ వల్ల పసిపిల్లలలో గుండె వేగంగా కొట్టుకునే అవకాశం ఉంటుంది.

బాలింతలకు వైద్యుల ముఖ్యమైన చిట్కాలు

పాలు ఇచ్చిన తర్వాతే తాగండి

బిడ్డకు పాలు ఇచ్చిన వెంటనే కాఫీ తాగడం మంచిది. దీనివల్ల తదుపరి పాలు ఇచ్చే సమయానికి శరీరంలో కెఫిన్ స్థాయిలు గణనీయంగా తగ్గుతాయి.

ఇతర కెఫిన్ పదార్థాలను గమనించండి:

కెఫిన్ కేవలం కాఫీలోనే కాదు.. టీ, చాక్లెట్లు, కూల్ డ్రింక్స్, ఎనర్జీ డ్రింక్స్‌లో కూడా ఉంటుంది. కాబట్టి వీటిని కూడా పరిమితంగానే తీసుకోవాలి.

నెలలు నిండకుండా పుట్టిన బిడ్డలు

ప్రీ-టర్మ్ లేదా తక్కువ బరువుతో పుట్టిన పిల్లలకు పాలు ఇచ్చే తల్లులు మొదటి కొన్ని నెలలు కాఫీ, టీలకు దూరంగా ఉండటమే మంచిది.

Tags: