Cancer Develop Without a Lump: సాధారణంగా శరీరంలో ఎక్కడైనా గడ్డలు ఏర్పడితేనే క్యాన్సర్ లక్షణంగా భావిస్తారు. కానీ ఎటువంటి గడ్డలు లేదా ముద్దలు కనిపించకుండానే శరీరంలో చాపకింద నీరులా వ్యాపించే క్యాన్సర్లు కూడా ఉంటాయని వైద్య నిపుణులు హెచ్చరిస్తున్నారు. అందులో ప్రధానమైనది పెరిటోనియల్ క్యాన్సర్. కడుపులోని అంతర్గత అవయవాలను కప్పి ఉంచే పెరిటోనియం పొరలో ఇది ప్రారంభమవుతుంది. ప్రారంభంలో దీని లక్షణాలు చాలా సాధారణ జీర్ణ సమస్యల్లాగే అనిపిస్తాయి, దాంతో చాలామంది వీటిని గ్యాస్ లేదా అజీర్తి అనుకుని తేలిగ్గా తీసుకుంటారు. ఈ క్యాన్సర్‌కు సంబంధించి ఏమాత్రం అలక్ష్యం చేయకూడని 9 దాగివున్న లక్షణాలు, నివారణ మార్గాల వివరాలు:

పెరిటోనియల్ క్యాన్సర్ అంటే ఏమిటి?

కడుపులోని పేగులు, కాలేయం, జీర్ణాశయం వంటి అవయవాలను రక్షించే పలుచని పొరను పెరిటోనియం అంటారు. ఈ పొరలోని కణాలు అసాధారణంగా పెరిగినప్పుడు పెరిటోనియల్ క్యాన్సర్ వస్తుంది. ఇది అండాశయ క్యాన్సర్ స్వభావాన్ని పోలి ఉంటుంది. బయటకు ఎలాంటి గడ్డలు ఏర్పడకపోవడం వల్ల ఇది రెండో లేదా మూడో దశకు చేరేవరకు రోగి గుర్తించలేకపోవచ్చు.

కనిపించే 9 ముఖ్యమైన సంకేతాలు..

కడుపు నిరంతరం ఉబ్బరంగా ఉండటం:

ఏమీ తినకపోయినా లేదా కొద్దిగా తిన్నా కడుపు నిండినట్లు, ఉబ్బినట్లు అనిపించడం.

కడుపు పరిమాణం అకస్మాత్తుగా పెరగడం:

పెరిటోనియం పొరలో నీరు చేరడం వల్ల పొట్ట లావుగా మారుతుంది.

కడుపు లేదా పెల్విక్ భాగంలో నిరంతర నొప్పి:

పొత్తికడుపు లేదా నడుము భాగంలో తగ్గని మొండి నొప్పి వేధిస్తుంది.

ఆకలి మందగించడం:

త్వరగా కడుపు నిండిన భావన కలగడం, ఆహారంపై ఏమాత్రం ఆసక్తి లేకపోవడం.

కారణం లేకుండా బరువు తగ్గడం:

ఎలాంటి డైటింగ్, వ్యాయామాలు చేయకుండానే హఠాత్తుగా బరువు తగ్గిపోవడం.

జీర్ణవ్యవస్థలో మార్పులు: దీర్ఘకాలిక మలబద్ధకం, డయేరియా లేదా కడుపులో వికారం, వాంతులు రావడం.

తరచుగా మూత్ర విసర్జన: మూత్రాశయంపై ఒత్తిడి పెరిగి మాటిమాటికీ యూరిన్‌కి వెళ్లాల్సి రావడం.

విపరీతమైన అలసట:

తగినంత విశ్రాంతి తీసుకున్నా తగ్గని తీవ్రమైన నీరసం, అలసట.

తీవ్రమైన గ్యాస్, అజీర్తి:

సాధారణ మందులు వాడినా అజీర్తి, ఎసిడిటీ సమస్య తగ్గకపోవడం.

ప్రమాదం ఎవరికి ఎక్కువ?

కుటుంబంలో ఎవరికైనా అండాశయ లేదా రొమ్ము క్యాన్సర్ చరిత్ర ఉన్నవారు.

BRCA1, BRCA2 జన్యు ఉత్పరివర్తనలు (Gene Mutations) ఉన్న వ్యక్తులు.

ఎక్కువ వయస్సు పైబడిన మహిళల్లో ఈ క్యాన్సర్ వచ్చే అవకాశం ఎక్కువ.

ఎప్పుడు వైద్యుడిని కలవాలి?

కడుపుబ్బరం, అజీర్ణం లేదా కడుపునొప్పి వంటి సమస్యలు సాధారణ చికిత్సతో 2 నుంచి 3 వారాల కంటే ఎక్కువ కాలం తగ్గకుండా వేధిస్తుంటే ఏమాత్రం ఆలస్యం చేయకూడదు. అల్ట్రాసౌండ్, సీటీ స్కాన్ లేదా పెల్విక్ పరీక్షల ద్వారా వైద్యులు దీన్ని గుర్తిస్తారు. ప్రారంభ దశలోనే గుర్తిస్తే శస్త్రచికిత్స, కీమోథెరపీల ద్వారా పెరిటోనియల్ క్యాన్సర్‌ను విజయవంతంగా నయం చేయవచ్చని నిపుణులు సూచిస్తున్నారు.

Tags: