Smoke a Cigarette Before Going to Bed: రాత్రి పడుకునే ముందు సిగరెట్ కాలుస్తున్నారా.?

Smoke a Cigarette Before Going to Bed: పని ఒత్తిడిని తగ్గించుకోవడానికి లేదా రాత్రి పడుకునే ముందు సేద తీరడానికి చాలా మంది సిగరెట్ తాగే అలవాటును కలిగి ఉంటారు. రోజంతా ఎన్నో సిగరెట్లు తాగినా పర్వాలేదు కానీ.. నిద్రపోయే ముందు కాల్చే కేవలం ఒక్క సిగరెట్ చాలు మీ ప్రాణాల మీదకు తీసుకురావడానికి! తాజా ఆరోగ్య నిపుణుల హెచ్చరికలు ఇప్పుడు అందరినీ ఆందోళనకు గురి చేస్తున్నాయి.

నిద్రకు ఉపక్రమించే ముందు ధూమపానం చేయడం వల్ల శరీరంలో రక్తపోటు (బ్లడ్ ప్రెజర్) ఒక్కసారిగా పెరుగుతుంది. సిగరెట్‌లోని హానికారక రసాయనాలు రక్తనాళాలను కుంచించుకుపోయేలా చేసి, రక్తం గడ్డకట్టేలా (Blood Clots) చేస్తాయి. రాత్రి సమయంలో గుండె కొట్టుకునే వేగం, రక్త ప్రసరణ మందగించే తరుణంలో ఈ అదనపు ప్రభావం తోడైతే.. మెదడుకు అందాల్సిన రక్త సరఫరా నిలిచిపోయి ప్రాణాంతకమైన 'స్ట్రోక్' (పక్షవాతం) లేదా గుండెపోటు వచ్చే ప్రమాదం అత్యధికంగా ఉంటుందని వైద్యులు హెచ్చరిస్తున్నారు.

కేవలం ఒక్క సిగరెట్ కదా ఏమవుతుందిలే అనుకోవడం చాలా పొరబాటని శాస్త్రీయ అధ్యయనాలు స్పష్టం చేస్తున్నాయి. రోజుకు కేవలం ఒక్క సిగరెట్ తాగే అలవాటు ఉన్నప్పటికీ.. అది కార్డియోవాస్క్యులర్ వ్యాధులు, బ్రెయిన్ స్ట్రోక్ ముప్పును గణనీయంగా పెంచుతుందని నిపుణులు వెల్లడించారు. ముఖ్యంగా రాత్రి నిద్రపోవడానికి ముందు శరీరం విశ్రాంతి స్థితికి వెళ్లే సమయంలో ఈ విషపూరిత పొగను పీల్చడం వల్ల గుండెపై తీవ్రమైన భారం పడుతుంది.

పొగాకు ఏ రూపంలో ఉన్నా, ఎప్పుడూ తాగినా అది ఆరోగ్యానికి అత్యంత ప్రమాదకరమే. కాబట్టి, మీకు లేదా మీ సన్నిహితులకు రాత్రి పడుకునే ముందు సిగరెట్ కాల్చే అలవాటు ఉంటే వెంటనే మానుకోవడం మంచిది. ఆరోగ్యకరమైన నిద్ర, ప్రశాంతమైన జీవితం కోసం ధూమపానానికి దూరంగా ఉండాలని వైద్యులు సూచిస్తున్నారు.