Exercising on an Empty Stomach: పరిగడుపున వ్యాయామం:.. లాభమా? నష్టమా? నిపుణులు చెప్పిన అసలు నిజాలు..

Exercising on an Empty Stomach: ఉదయం లేవగానే మంచినీళ్లు తప్ప ఏమీ ముట్టకుండానే జిమ్‌కు పరుగులు తీస్తున్నారా? పొట్టలో ఏమీ లేకుండా చెమటోడ్చితేనే ఒంట్లోని కొవ్వు కరిగి నాజూగ్గా మారతామని భావిస్తున్నారా? ఫిట్‌నెస్ ప్రపంచంలో ఎప్పటినుంచో సాగుతున్న ఈ చర్చపై వైద్య నిపుణులు స్పష్టమైన వివరణ ఇచ్చారు.

అందరికీ ఒకే రూల్ వర్తించదు..

ఖాళీ కడుపుతో వ్యాయామం చేయడం అనేది ప్రతీ ఒక్కరి శరీరానికి సరిపడదు. ఒకరికి అద్భుతంగా పనిచేసిన పద్ధతి మరొకరి శరీరానికి చేటు చేయవచ్చు. మీ వర్కౌట్ తీవ్రత, మీ శరీర సామర్థ్యం ఆధారంగానే ఆహారం అవసరమా కాదా అనేది ఆధారపడి ఉంటుంది.

ఖాళీ కడుపుతో ఎవరెవరు వ్యాయామం చేయవచ్చు?

తేలికపాటి వ్యాయామాలు

ఉదయాన్నే కేవలం నడక , యోగా, స్ట్రెచింగ్ లేదా తేలికపాటి జాగింగ్ చేసేవారు పొట్ట ఖాళీగా ఉన్నా పెద్దగా ఇబ్బంది పడరు.

శరీరం సహకరిస్తేనే:

ఏమీ తినకుండా వ్యాయామం చేస్తున్నప్పుడు ఒంట్లో శక్తి ఉన్నట్లు అనిపించి, ఎలాంటి అసౌకర్యం లేకపోతేనే ఈ పద్ధతి కొనసాగించాలి. బరువు త్వరగా తగ్గాలన్న ఆరాటంతో శరీరం నీరసిస్తున్నా బలవంతంగా ఖాళీ కడుపుతో వ్యాయామం చేస్తే తీవ్ర అలసట తప్ప ఫలితం ఉండదు.

హెవీ వర్కౌట్స్ చేసేవారు ఏం చేయాలి?

వెయిట్ ట్రైనింగ్, తీవ్రమైన కార్డియో: బరువులు ఎత్తేవారు, జిమ్‌లో గంటల తరబడి శ్రమించేవారు లేదా ఎక్కువ వేగంతో రన్నింగ్ చేసేవారు ఖాళీ కడుపుతో అస్సలు ఉండకూడదు.

ప్రీ-వర్కౌట్ స్నాక్ ముఖ్యం

వర్కౌట్‌కు 30 నుంచి 45 నిమిషాల ముందు సులభంగా జీర్ణమయ్యే ఆహారం తీసుకోవాలి. ఒక అరటిపండు, రెండు ఖర్జూరాలు లేదా గుప్పెడు నానబెట్టిన బాదం పప్పులు తినడం వల్ల శరీరానికి అవసరమైన తక్షణ గ్లూకోజ్ అందుతుంది. ఇది కండరాల గాయాలు, కళ్లు తిరగడం వంటి సమస్యలను అడ్డుకుంటుంది.

ఖాళీ కడుపుతో వ్యాయామం చేస్తే కొవ్వు నిజంగానే త్వరగా కరుగుతుందా?

ఖాళీ కడుపుతో ఉన్నప్పుడు శరీరం తక్షణ శక్తి కోసం నిల్వ ఉన్న కొవ్వును కొంతమేర ఎక్కువగా కరిగించడం నిజమే అయినప్పటికీ, దీర్ఘకాలికంగా చూస్తే ఇది ఎక్కువ బరువు తగ్గడానికి మాత్రమే దారితీస్తుందన్న శాస్త్రీయ ఆధారాలు లేవు. చివరికి రోజంతా మీరు తీసుకునే కేలరీల సమతుల్యత మాత్రమే బరువు తగ్గడాన్ని శాసిస్తుంది.

ఎప్పుడు వెంటనే ఆపేయాలి? ఎవరికి ప్రమాదం?

వ్యాయామం మధ్యలో కళ్లు తిరగడం, విపరీతమైన చెమటలు పట్టడం, గుండెదడ, కాళ్లూ చేతులు వణకడం వంటి లక్షణాలు కనిపిస్తే వెంటనే వర్కౌట్ ఆపేసి విశ్రాంతి తీసుకోవాలి. ముఖ్యంగా షుగర్, లో బీపీ సమస్యలు ఉన్నవారు ఖాళీ కడుపుతో వ్యాయామానికి దిగితే రక్తంలో చక్కెర స్థాయిలు పడిపోయి స్పృహ కోల్పోయే ప్రమాదం ఉంది. ఇలాంటి వారు వైద్యుల సలహా మేరకే డైట్, వ్యాయామ ప్రణాళికను రూపొందించుకోవాలి.

శరీరం ఇచ్చే సంకేతాలను గమనించడమే ఆరోగ్యానికి అసలైన సూత్రం. శక్తి లేనప్పుడు శరీరాన్ని కష్టపెట్టకుండా, సరైన ఇంధనం అందిస్తూ వ్యాయామం కొనసాగించినప్పుడే ఆశించిన ఫిట్‌నెస్ సొంతమవుతుంది.