Heartburn and Sour Burps After Meals: భోజనం తర్వాత గుండెల్లో మంట, పుల్లటి త్రేనుపులా? మీరు తినే ఈ ఆహారాలే కారణం..

Heartburn and Sour Burps After Meals: ఈ రోజుల్లో చాలా మంది భోజనం చేసిన కాసేపటికే గుండెల్లో మంట, పుల్లటి త్రేనుపులు రావడం వంటి సమస్యలతో ఇబ్బంది పడుతున్నారు. ఎక్కువ శాతం మంది దీనిని సాధారణ గ్యాస్ లేదా అజీర్తి సమస్యగా భావించి లైట్ తీసుకుంటారు. కానీ, ఈ సమస్య పదే పదే వేధిస్తుంటే మాత్రం దానికి మీ రోజువారీ ఆహారపు అలవాట్లే ప్రధాన కారణం కావచ్చు. వైద్య పరిభాషలో దీనిని యాసిడ్ రిఫ్లక్స్ అంటారు. కడుపులోని ఆమ్లాలు అన్నవాహికలోకి తిరిగి ప్రవహించడం వల్ల ఈ మంట పుడుతుంది. అసలు ఏయే ఆహారాలు ఈ సమస్యను ప్రేరేపిస్తాయి? దీని నుండి ఉపశమనం పొందే మార్గాలేంటో ఇప్పుడు చూద్దాం.

యాసిడ్ రిఫ్లక్స్‌ను పెంచే ఆహారాలు ఇవే..

మనం ఆరోగ్యకరమైనవి అనుకుని తినే కొన్ని పదార్థాలు కూడా కడుపులో యాసిడ్ ఉత్పత్తిని విపరీతంగా పెంచేస్తాయి.

టమోటాలు: టమోటాలు, టమోటాతో చేసిన సాస్‌లు, పచ్చళ్లలో ఆమ్ల గుణాలు ఎక్కువగా ఉంటాయి. ఇవి గుండెల్లో మంటను వేగంగా పెంచుతాయి.

సిట్రస్ పండ్లు:

నారింజ, నిమ్మ, బత్తాయి వంటి సిట్రస్ జాతి పండ్లు జీర్ణవ్యవస్థపై ప్రభావం చూపి యాసిడ్ రిఫ్లక్స్‌కు దారితీస్తాయి.

చాక్లెట్లు:

చాక్లెట్లలో ఉండే కెఫీన్, ఇతర సమ్మేళనాలు కడుపులోని ఆమ్లాలు పైకి తన్నేలా చేస్తాయి.

మసాలాలు - వేపుళ్లు:

కారం, మసాలాలు ఎక్కువగా ఉండే ఆహారాలు, ఆయిల్‌లో బాగా వేయించిన పదార్థాలు ఈ సమస్యను మరింత తీవ్రతరం చేస్తాయి.

పుదీనా టీ :

సాధారణంగా పుదీనా కడుపుకు ఉపశమనం ఇస్తుందని భావిస్తారు. కానీ యాసిడ్ రిఫ్లక్స్ ఉన్న కొందరిలో ఇది ఉదర కండరాలను సడలించి, సమస్యను మరింత ఎక్కువ చేస్తుందని నిపుణులు చెబుతున్నారు.

జీవనశైలిలో మార్పులే అసలైన మందు..

కేవలం గ్యాస్ టాబ్లెట్లపైనే ఆధారపడకుండా, కొన్ని చిన్న చిన్న అలవాట్లను మార్చుకోవడం ద్వారా ఈ సమస్యకు చెక్ పెట్టవచ్చని వైద్యులు సూచిస్తున్నారు.

రాత్రి ఆలస్యంగా తినకూడదు:

పడుకోవడానికి కనీసం రెండు, మూడు గంటల ముందే డిన్నర్ ముగించాలి.

తిన్న వెంటనే పడుకోవద్దు:

భోజనం చేసిన వెంటనే బెడ్‌పై వాలకుండా, కాసేపు వజ్రాసనంలో కూర్చోవడం లేదా కొద్ది దూరం నడవడం అలవాటు చేసుకోవాలి.

బరువు నియంత్రణ:

అధిక బరువు కూడా పొట్టపై ఒత్తిడిని పెంచి యాసిడ్ పైకి వచ్చేలా చేస్తుంది. కాబట్టి బరువును అదుపులో ఉంచుకోవాలి.

యాసిడ్ రిఫ్లక్స్ తగ్గించే అద్భుత ఆహారాలు:

యాసిడ్ రిఫ్లక్స్ ఇబ్బంది పెడుతున్నప్పుడు క్రింది ఆహార పదార్థాలను తీసుకోవడం వల్ల తక్షణ ఉపశమనం లభిస్తుంది.

ఓట్స్: ఇవి కడుపులోని అదనపు ఆమ్లాన్ని సమర్థవంతంగా పీల్చుకుంటాయి.

అల్లం : అల్లం ముక్కను నమలడం లేదా అల్లం రసం తీసుకోవడం వల్ల జీర్ణవ్యవస్థ ప్రశాంతపడుతుంది.

అరటిపండు: కొద్దిగా పచ్చిగా ఉన్న అరటిపండు కడుపు లోపలి పొరను యాసిడ్ల బారి నుండి రక్షిస్తుంది.

పుచ్చకాయ - దోసకాయ:

నీటి శాతం ఎక్కువగా ఉండే ఈ పండ్లు కడుపులోని మంటను చల్లార్చి, శరీరానికి మేలు చేస్తాయి.

నేషనల్ లైబ్రరీ ఆఫ్ మెడిసిన్ ప్రకారం, ప్రపంచవ్యాప్తంగా కోట్ల మంది ఈ సమస్యతో బాధపడుతున్నారు. అయితే దీనిని సుదీర్ఘకాలం పాటు నిర్లక్ష్యం చేస్తే అన్నవాహిక దెబ్బతిని తీవ్రమైన జీర్ణకోశ వ్యాధులకు దారితీసే ప్రమాదం ఉంది. కాబట్టి సమస్య తీవ్రంగా ఉంటే వెంటనే గ్యాస్ట్రోఎంటరాలజిస్ట్‌ను సంప్రదించడం ఉత్తమం.