Avoid Butter and Cheese for Heart Health: గుండె ఆరోగ్యం కోసం వెన్న, జున్ను మానేయడం అవసరమా? కొత్త అధ్యయనాలు ఏమంటున్నాయి?

Avoid Butter and Cheese for Heart Health: గుండె ఆరోగ్యాన్ని కాపాడుకోవడానికి వెన్న, జున్ను, నెయ్యి వంటి సాచురేటెడ్ ఫ్యాట్స్ (కొవ్వులు) ఉన్న ఆహార పదార్థాలను పూర్తిగా మానేయాలని దశాబ్దాలుగా సలహాలు ఇస్తున్నారు. కానీ ఇటీవలి పరిశోధనలు ఈ సాంప్రదాయ నమ్మకాన్ని సవాలు చేస్తున్నాయి. అన్ని కొవ్వులు గుండెకు హానికరం కావని, ముఖ్యంగా ఆరోగ్యవంతులైన వ్యక్తులకు వెన్న లేదా జున్ను తినడం తగ్గించినా గుండె జబ్బుల ప్రమాదం గణనీయంగా తగ్గదని శాస్త్రవేత్తలు తేల్చారు.

సుమారు 60 వేల మందిపై జరిపిన ఒక పెద్ద అధ్యయనం ప్రకారం, ఆరోగ్యంగా ఉన్న వ్యక్తులు సాచురేటెడ్ ఫ్యాట్స్ తీసుకోవడం తగ్గించినప్పటికీ గుండె సంబంధిత సమస్యలు తగ్గలేదు. ఇప్పటికే గుండె జబ్బులు ఉన్నవారికి ఈ కొవ్వులను తగ్గించడం కొంత ఉపయోగకరంగా ఉండవచ్చు, కానీ అందరికీ ఈ నియమం వర్తించదు. అన్ని రకాల కొవ్వులు శరీరంలో ఒకే విధంగా పనిచేయవని పరిశోధకులు స్పష్టం చేశారు.

జున్ను విషయానికొస్తే... జున్నులో కొవ్వు ఉన్నప్పటికీ, అందులోని కాల్షియం మరియు ప్రోటీన్ వల్ల చెడు కొలెస్ట్రాల్ (LDL) స్థాయిలు గణనీయంగా పెరగవు. అనేక అధ్యయనాల్లో జున్ను సేవించడం వల్ల గుండెకు ఎలాంటి హాని కలగలేదని నిరూపితమైంది. అయితే వెన్నతో పోలిస్తే... వెన్నను అధికంగా తీసుకోవడం వల్ల కొలెస్ట్రాల్ స్థాయిలు కాస్త ఎక్కువగా పెరిగే అవకాశం ఉంది.

చాలామంది వెన్న లేదా జున్ను మానేసి, వాటి స్థానంలో వైట్ బ్రెడ్, చక్కెర ఎక్కువగా ఉన్న స్నాక్స్ లేదా ప్రాసెస్డ్ ఫుడ్స్ తింటుంటారు. ఇది గుండె ఆరోగ్యానికి మరింత నష్టం కలిగిస్తుంది. పాలు, పెరుగు, జున్ను వంటి డైరీ ఉత్పత్తుల్లో కాల్షియం, ప్రోటీన్, విటమిన్ ఏ వంటి అవసరమైన పోషకాలు పుష్కలంగా ఉంటాయి. వీటిని పూర్తిగా తొలగించడం వల్ల శరీరం ఈ పోషకాలను కోల్పోతుంది.

గుండె జబ్బులకు కేవలం ఒకే పదార్థం కారణం కాదు. మీ మొత్తం ఆహారపు అలవాట్లు, రోజువారీ వ్యాయామం, జీవనశైలి – ఇవన్నీ కలిసి పాత్ర పోషిస్తాయి. వెన్న, జున్ను వంటివి మితంగా తీసుకోవడంలో ఎలాంటి ప్రమాదం లేదు. మీ భోజనంలో కూరగాయలు, పండ్లు, తృణధాన్యాలు, నట్స్ వంటివి ఎక్కువగా ఉండేలా చూసుకోండి. జంక్ ఫుడ్, ప్యాక్డ్ స్నాక్స్, అతిగా చక్కెర ఉన్న పదార్థాలకు దూరంగా ఉండండి.

మీ వయస్సు, కుటుంబ చరిత్ర, ప్రస్తుత కొలెస్ట్రాల్ స్థాయిలను బట్టి ఆహార ప్రణాళిక మారుతుంది. ఏదైనా పెద్ద మార్పు చేసే ముందు తప్పనిసరిగా వైద్యుడిని సంప్రదించడం ఉత్తమం.