Diabetes Control: డయాబెటిస్ నియంత్రణలో జీవనశైలి మార్పులు..

Diabetes Control: ఆహారంలో మార్పులు, క్రమం తప్పకుండా వ్యాయామం చేయడం, మానసిక ఆరోగ్యంపై శ్రద్ధ పెట్టడం వంటి జీవనశైలి మార్పులు డయాబెటిస్‌ను నియంత్రించడంలో ఉపయోగపడతాయని తాజా అధ్యయనం సూచించింది. భారతదేశంలో నిర్వహించిన ఈ అధ్యయనంలో 149 మంది టైప్‌-2 డయాబెటిస్‌ బాధితులను 90 రోజుల పాటు పరిశీలించారు.

అధ్యయనంలో కొంతమందికి ఆహారం, వ్యాయామం, మానసిక ఆరోగ్యానికి సంబంధించిన ప్రత్యేక సూచనలు ఇవ్వడంతో పాటు ఆరోగ్య నిపుణుల సలహాలు, క్రమం తప్పకుండా పర్యవేక్షణ అందించారు. సాధారణ చికిత్స తీసుకున్న వారితో పోలిస్తే జీవనశైలిలో మార్పులు చేసినవారిలో రక్తంలో చక్కెర స్థాయులు, శరీర బరువు, నడుము చుట్టుకొలత వంటి అంశాల్లో మెరుగుదల కనిపించింది.

ముఖ్యంగా ఆరోగ్యకరమైన ఆహారం తీసుకోవడం, ప్రతిరోజూ శారీరక శ్రమకు సమయం కేటాయించడం, వైద్యుల సూచనలు పాటించడం వంటి అలవాట్లను క్రమం తప్పకుండా కొనసాగించినవారిలో మెరుగైన ఫలితాలు కనిపించినట్లు పరిశోధకులు తెలిపారు. డయాబెటిస్‌ నియంత్రణలో మందులతో పాటు జీవనశైలికి కూడా ప్రాధాన్యం ఉందని అధ్యయనం సూచించింది.

అయితే డయాబెటిస్‌ ఉన్నవారు వైద్యుల సూచన లేకుండా మందులు ఆపడం లేదా ఆహారంలో పెద్ద మార్పులు చేయడం మంచిది కాదు. ప్రతి వ్యక్తి ఆరోగ్య పరిస్థితి భిన్నంగా ఉండటంతో.. ఆహారం, వ్యాయామం, మందుల విషయంలో వైద్య నిపుణుల సలహా తీసుకోవడం అవసరమని నిపుణులు సూచిస్తున్నారు.