Shamon-da Virus: ప్రపంచవ్యాప్తంగా అరుదైన వైరస్‌ల వ్యాప్తి మళ్లీ ఆందోళన కలిగిస్తోంది. సాధారణంగా పశువులు, జంతువులలో మాత్రమే కనిపించే ప్రమాదకరమైన షమోండా వైరస్ తొలిసారిగా ఒక మనిషికి సోకినట్లు ఫ్రాన్స్ దేశంలో నిర్ధారణ అయింది. తీవ్రమైన రోగనిరోధక శక్తి లోపం ఉన్న ఓ వ్యక్తిలో ఈ వైరస్ బయటపడటంతో పాటు, ఆ బాధితుడు అక్టోబర్‌లో మరణించాడని ఫ్రాన్స్ ఆరోగ్య శాఖ అధికారులు వెల్లడించారు. ఈ అరుదైన కేసు వెలుగుచూడటంతో యూరప్‌లో కలకలం రేగినప్పటికీ, ప్రజలు తీవ్ర భయాందోళనలకు గురికావాల్సిన అవసరం లేదని అంతర్జాతీయ నిపుణులు స్పష్టం చేస్తున్నారు.

అసలు ఏమిటీ షమోండా వైరస్?

షమోండా వైరస్ అనేది ఆర్థోబున్యావైరస్ కుటుంబానికి చెందినది. జంతువులలో సాధారణంగా కనిపించే స్క్మాలెన్‌బర్గ్ వైరస్ కూడా ఇదే గ్రూప్‌కు చెందినది. ఈ వైరస్ ప్రధానంగా ఆవులు, ఎద్దులు, గొర్రెలు, మేకలు, గుర్రాలలో కనిపిస్తుంది. దీన్ని మొదటిసారిగా 1960ల మధ్యకాలంలో నైజీరియాలో శాస్త్రవేత్తలు గుర్తించారు. ఆ తర్వాత ఆఫ్రికా, ఆసియాలోని కొన్ని ప్రాంతాల్లో జంతువులలో ఇది నమోదవుతూ వస్తోంది.

ఈ వైరస్ ఎలా వ్యాపిస్తుంది?

షమోండా వైరస్ సాధారణంగా మిడ్జెస్ అని పిలిచే చిన్నపాటి కుట్టే కీటకాల ద్వారా జంతువులకు వ్యాపిస్తుంది. ఫ్రాన్స్‌లో మరణించిన బాధితుడికి తూర్పు ఫ్రాన్స్ ప్రాంతంలో ఈ కీటకాలు కుట్టడం వల్లే వైరస్ సోకి ఉండవచ్చని ప్రాథమిక దర్యాప్తులో అధికారులు అంచనా వేస్తున్నారు. ఆ ప్రాంతంలో గత వేసవి సమయంలో జంతువులలో ఈ వైరస్ విస్తరించినట్లు ఆధారాలు ఉన్నాయి. అయితే ఈ వైరస్ ఒక మనిషి నుంచి మరొకరికి వ్యాపిస్తుందా లేదా అనే అంశంపై శాస్త్రవేత్తలు ఇంకా లోతైన పరిశోధనలు చేస్తున్నారు.

లక్షణాలు ఎలా ఉంటాయి?

జంతువులలో: పశువులకు ఈ వైరస్ సోకినప్పుడు అధిక జ్వరం, తీవ్రమైన విరేచనాలు, నిస్సత్తువ కనిపిస్తాయి.

మనుషులలో: మానవుల్లో దీని లక్షణాలపై ఇంకా పరిమిత సమాచారమే అందుబాటులో ఉంది. ఫ్రాన్స్‌లో మృతి చెందిన వ్యక్తిలో తీవ్రమైన నాడీ సంబంధిత సమస్యలు తలెత్తాయని, ఆ సమస్యలకు ఈ వైరస్ ఇన్‌ఫెక్షనే కారణమై ఉండవచ్చని వైద్యులు ప్రాథమికంగా గుర్తించారు.

ప్రజలు భయపడాల్సిన అవసరం ఉందా?

మానవుల్లో ఈ అరుదైన కేసు నమోదు కావడంతో యూరోపియన్ సెంటర్ ఫర్ డిసీజ్ ప్రివెన్షన్ అండ్ కంట్రోల్ పరిస్థితిని నిశితంగా పరిశీలిస్తోంది. ప్రస్తుతం లభ్యమైన ఆధారాల ప్రకారం.. ఈ వైరస్ సమాజంలో సాధారణ ప్రజలకు పెద్ద ఎత్తున వ్యాపించే ముప్పు ఏమీ లేదని ఆరోగ్య శాఖ భరోసా ఇచ్చింది. అయినప్పటికీ, కీటకాలు కుట్టకుండా జాగ్రత్తలు తీసుకోవాలని, పెంపుడు జంతువులు లేదా పశువులలో ఏవైనా అసాధారణ అనారోగ్య లక్షణాలు కనిపిస్తే వెంటనే పశువైద్యులను సంప్రదించాలని నిపుణులు సూచిస్తున్నారు.

Tags: