Joint Pains Increase When the Weather Changes: వాతావరణం మారితే కీళ్ల నొప్పులు ఎందుకు పెరుగుతాయి? నిపుణులు చెబుతున్న అసలు కారణాలు ఇవే..

Joint Pains Increase When the Weather Changes: గత కొన్ని రోజులుగా దేశంలోని పలు ప్రాంతాల్లో వాతావరణం వేగంగా మారుతోంది. ఒకరోజు ఎండ దంచికొడితే.. మరుసటి రోజే ఆకాశం మేఘావృతమై వర్షాలు కురుస్తున్నాయి. ఇలాంటి ఉష్ణోగ్రత హెచ్చుతగ్గుల సమయంలో ఆరోగ్యం పట్ల అదనపు శ్రద్ధ వహించడం చాలా ముఖ్యం. ముఖ్యంగా, వాతావరణంలో మార్పులు వచ్చినప్పుడు కీళ్ల నొప్పులు, ఆర్థరైటిస్ ఉన్నవారిలో ఇబ్బందులు ఒక్కసారిగా పెరుగుతాయి. అసలు వాతావరణ మార్పులకు, కీళ్ల నొప్పులకు మధ్య ఉన్న సంబంధం ఏంటి? ఈ సమయంలో ఎలాంటి జాగ్రత్తలు తీసుకోవాలో ఇప్పుడు వివరంగా తెలుసుకుందాం..

వాతావరణానికి, కీళ్ల నొప్పులకు లింక్ ఏంటి?

ఆరోగ్య నిపుణుల అభిప్రాయం ప్రకారం.. వాతావరణంలో వచ్చే ఉష్ణోగ్రత మార్పులు, తేమ, ముఖ్యంగా వాతావరణ పీడనం మన శరీరంపై ప్రభావం చూపుతాయి. వాతావరణ పీడనం తగ్గినప్పుడు లేదా చలి పెరిగినప్పుడు, కీళ్ల చుట్టూ ఉండే కండరాలు, కణజాలాలు స్వల్పంగా విస్తరిస్తాయి. దీనివల్ల కీళ్లపై ఒత్తిడి పెరిగి బిగుతుగా మారడం , బరువుగా అనిపించడం, తీవ్రమైన నొప్పి రావడం జరుగుతుంది. ముఖ్యంగా ఉదయం నిద్రలేచినప్పుడు లేదా ఎక్కువసేపు ఒకే చోట కూర్చున్నప్పుడు ఈ నొప్పి మరింత స్పష్టంగా తెలుస్తుంది. అయితే ఈ ప్రభావం అందరిలో ఒకేలా ఉండకపోవచ్చు.

ఎవరు ఎక్కువ జాగ్రత్తగా ఉండాలి?

వాతావరణం చల్లబడినప్పుడు లేదా మారినప్పుడు ఈ క్రింది సమస్యలు ఉన్నవారు ఎక్కువగా ఇబ్బంది పడే అవకాశం ఉంది..

కీళ్లవాతం ఉన్న రోగులు

ఆస్టియో ఆర్థరైటిస్ బాధితులు

రుమటాయిడ్ ఆర్థరైటిస్ సమస్య ఉన్నవారు

గతంలో ఎముకలు లేదా కీళ్లకు పాత గాయాలు అయినవారు

వృద్ధాప్యం వల్ల సహజంగానే కీళ్ల సమస్యలు ఎదుర్కొంటున్న వృద్ధులు

కీళ్ల నొప్పుల నుండి ఉపశమనం కోసం ఈ 5 చిట్కాలు పాటించండి..

వాతావరణ మార్పుల వల్ల వచ్చే కీళ్ల నొప్పులను తగ్గించుకోవడానికి వైద్యులు ఈ క్రింది జాగ్రత్తలు సూచిస్తున్నారు.

తేలికపాటి వ్యాయామాలు:

కీళ్లు బిగుసుకుపోకుండా ఉండటానికి రోజూ ఇంట్లోనే చిన్నపాటి స్ట్రెచింగ్స్ లేదా తేలికపాటి వ్యాయామాలు చేయాలి.

ఒకే భంగిమలో కూర్చోవద్దు:

ఆఫీసుల్లో లేదా ఇంట్లో గంటల తరబడి ఒకే చోట, ఒకే పొజిషన్‌లో కూర్చోవడం ఆపాలి. మధ్యమధ్యలో కాసేపు అటూ ఇటూ నడవాలి.

శరీరాన్ని వెచ్చగా ఉంచుకోండి:

వాతావరణం చల్లగా ఉన్నప్పుడు కీళ్లకు గాలి తగలకుండా తగిన దుస్తులు ధరించాలి. నొప్పులు ఉన్నచోట హాట్ వాటర్ బ్యాగ్‌తో కాపడం పెట్టుకోవచ్చు.

హైడ్రేషన్ - పోషకాహారం:

శరీరానికి సరిపడా నీరు తాగాలి. ఎముకల బలానికి అవసరమైన కాల్షియం, విటమిన్ డి ఎక్కువగా ఉండే ఆహార పదార్థాలను డైట్‌లో చేర్చుకోవాలి.

వైద్యుల సలహా:

వాతావరణం మారినప్పుడు నొప్పి రావడం సహజమే అయినప్పటికీ.. ఆ నొప్పి రోజువారీ పనులకు ఆటంకం కలిగిస్తూ, తగ్గకుండా వేధిస్తుంటే మాత్రం వెంటనే డాక్టర్‌ను సంప్రదించడం ముఖ్యం.