Eggs Increase Body Heat During Summer: ఎండాకాలంలో కోడిగుడ్లు తింటే ఒంట్లో వేడి పెరుగుతుందా?

Eggs Increase Body Heat During Summer: ఎండలు మండిపోతున్నాయి.. కాస్త బయటకు వెళ్తేనే ఒళ్లంతా సెగలు కక్కుతోంది. ఇలాంటి సమ్మర్‌లో కోడిగుడ్లు తింటే శరీరంలో వేడి మరింత పెరుగుతుందా? అందుకే ఏప్రిల్, మే, జూన్ నెలల్లో గుడ్లను పక్కన పెట్టేయాలా? ఎప్పటి నుంచో జనాల్లో బలంగా నాటుకుపోయిన ఈ నమ్మకం వెనుక ఉన్న అసలు నిజమేంటో తెలుసుకుందాం.

నిజానికి, ఎండాకాలంలో కోడిగుడ్లు తింటే ఒంట్లో వేడి పెరుగుతుందనే ప్రచారంలో ఏమాత్రం నిజం లేదని లేటెస్ట్ హెల్త్ రిపోర్ట్స్, పోషకాహార నిపుణులు స్పష్టం చేస్తున్నారు. గుడ్డు అనేది ఒక కంప్లీట్ ప్రోటీన్ ఫుడ్. హై-ప్రోటీన్ ఉన్న ఏ ఆహారాన్నైనా మన శరీరం జీర్ణం చేసుకునేటప్పుడు.. 'థర్మోజెనిసిస్' అనే సహజ జీవ ప్రక్రియ ద్వారా ఒంట్లో కొద్దిగా వేడి పుడుతుంది. అది కేవలం జీర్ణక్రియకు సంబంధించిన విషయమే తప్ప.. దానివల్ల శరీర అంతర్గత ఉష్ణోగ్రతలో ఎలాంటి భారీ మార్పులూ జరగవు. కాబట్టి గుడ్డు తింటే ఒళ్లు వేడి చేస్తుందనేది కేవలం ఒక అపోహ మాత్రమే!

అయితే లేటెస్ట్ హెల్త్ గైడ్‌లైన్స్ ప్రకారం.. ఎండాకాలంలో గుడ్లు తినేటప్పుడు కొన్ని చిన్న జాగ్రత్తలు పాటించాలి. గుడ్డు తిన్న తర్వాత శరీరానికి తగినంత హైడ్రేషన్ అవసరం. అందుకే రోజు మొత్తంలో మంచి నీళ్లు, మజ్జిగ, కొబ్బరిబొండాల వంటి ద్రవపదార్థాలు ఎక్కువగా తాగాలి. ఒకవేళ మీకు రోజూ గుడ్డు తినడం హెవీగా అనిపిస్తే.. వారానికి మూడు లేదా నాలుగు సార్లు తినొచ్చు.

అలాగే చాలామంది గుడ్ల కూర వండేటప్పుడు దట్టంగా మసాలాలు, నూనెలు దంచికొడుతుంటారు. ఆ తర్వాత కడుపులో మంటగానో, బరువుగానో ఉంటే అది గుడ్డు తప్పు కాదు.. మీరు వాడిన మసాలాల తప్పు! కాబట్టి సమ్మర్‌లో గుడ్లను ఉడకబెట్టుకుని (Boiled Eggs) తినడం అత్యంత ఉత్తమమైన మార్గం.

ఏ కాలమైనా సరే.. గుడ్డు మన శరీరానికి విటమిన్ బి12, విటమిన్ డి, ఐరన్, కోలిన్ , నాణ్యమైన ప్రోటీన్లను అందిస్తూనే ఉంటుంది. రోజంతా యాక్టివ్‌గా, ఎనర్జిటిక్‌గా ఉండాలంటే.. కాలాలతో సంబంధం లేకుండా గుడ్లను మీ డైట్‌లో భాగం చేసుకోండి.