Love Drinking Tea: టీ తాగుతున్నారా? అయితే ఈ విషయాలు ఖచ్చితంగా తెలుసుకోవాల్సిందే.

Love Drinking Tea: చాలా మందికి ఉదయం లేవగానే వేడి వేడి టీ కప్పు చేతిలో పడకపోతే రోజూ గడవదు. టీ లేదా కాఫీ అనేది జీవనశైలిలో ఒక భాగమైపోయింది. అయితే, పాలతో చేసిన టీ తాగిన వెంటనే కొంతమందికి కడుపు ఉబ్బరం, గుండెల్లో మంట, గ్యాస్ లేదా అజీర్ణం వంటి సమస్యలు ఎదురవుతుంటాయి. టీని అమితంగా ఇష్టపడేవారికి ఇది నిజంగా భరించలేని బాధ. అసలు మిల్క్ టీకి, ఎసిడిటీకి మధ్య ఉన్న సంబంధం ఏంటి? ఈ సమస్య నుంచి ఎలా బయటపడాలో ఇప్పుడు చూద్దాం.

మిల్క్ టీ.. ఎసిడిటీకి ఎలా దారితీస్తుంది?

నిపుణుల అభిప్రాయం ప్రకారం, పాలలో ఉండే లాక్టోజ్ అనే చక్కెరను కొందరి శరీరం త్వరగా జీర్ణం చేసుకోలేదు. శరీరంలో లాక్టేజ్ అనే ఎంజైమ్ లోపించినప్పుడు ఈ సమస్య వస్తుంది. దీనివల్ల:

కడుపు ఉబ్బరం

గ్యాస్, ఎసిడిటీ

కొన్నిసార్లు విరేచనాలు వంటి సమస్యలు తలెత్తుతాయి.

మరో ముఖ్యమైన విషయం ఏమిటంటే, ఉదయం పూట ఖాళీ కడుపుతో టీ తాగడం. టీలో ఉండే కెఫీన్ కడుపులో యాసిడ్ ఉత్పత్తిని పెంచుతుంది. ఫలితంగా గుండెల్లో మంట, యాసిడ్ రిఫ్లక్స్ వంటి సమస్యలు వస్తాయి. రోజుకు ఎక్కువ సార్లు టీ తాగే వారిలో ఈ ప్రభావం మరింత ఎక్కువగా ఉంటుంది.

సమయం కూడా ముఖ్యం..

మనం టీ తాగే సమయం కూడా మన జీర్ణక్రియపై ప్రభావం చూపుతుంది. ఉదయం పూట చిక్కటి పాలతో చేసిన టీ తాగడం లేదా సాయంత్రం ఆలస్యంగా టీ తాగడం వల్ల అజీర్ణం కలిగే అవకాశం ఉంది. కాబట్టి టీని ఎప్పుడూ మితంగానే తీసుకోవాలి.

ఎసిడిటీకి కారణమయ్యే ఇతర అలవాట్లు

జీర్ణ సమస్యలకు కేవలం టీ మాత్రమే కారణం కాదు, మన దైనందిన జీవితంలో చేసే కొన్ని పొరపాట్లు కూడా కారణమవుతాయి..

ఆహారపు అలవాట్లు:

నూనె పదార్థాలు, జంక్ ఫుడ్, పిండి పదార్థాలు ఎక్కువగా తీసుకోవడం.

శారీరక శ్రమ లేకపోవడం:

వ్యాయామం లేకపోవడం వల్ల జీవక్రియ మందగించి ఎసిడిటీ పెరుగుతుంది. రోజుకు కనీసం 30 నిమిషాల నడక తప్పనిసరి.

గ్యాస్, ఎసిడిటీ సమస్యల నివారణకు సులభమైన చిట్కాలు..

ఖాళీ కడుపుతో టీ తాగడం పూర్తిగా మానేయండి.

రోజుకు రెండు లేదా మూడు కప్పుల కంటే ఎక్కువ టీ తాగొద్దు.

టీ తాగేటప్పుడు బిస్కెట్లు లేదా ఏదైనా తేలికపాటి ఆహారం తోడుగా తీసుకోండి.

రోజంతా తగినంత నీరు త్రాగాలి.

జంక్ ఫుడ్, నూనె వంటకాలపై వీలైనంత వరకు తగ్గించండి.

క్రమం తప్పకుండా వ్యాయామం చేస్తూ, రాత్రి వేళల్లో సరైన నిద్ర ఉండేలా చూసుకోండి.

చిన్న చిన్న అలవాట్లను మార్చుకోవడం ద్వారా టీని ఆస్వాదించడంతో పాటు ఆరోగ్యాన్ని కూడా కాపాడుకోవచ్చని ఆరోగ్య నిపుణులు సూచిస్తున్నారు.