Spending All Day in AC: రోజంతా ఏసీలోనే ఉంటున్నారా? మీ ఎముకలపై గుల్ల అవుతాయేమో జాగ్రత్త..

Spending All Day in AC: ప్రస్తుతం ఉన్న వాతావరణ పరిస్థితుల్లో ఏసీ లేనిదే క్షణం గడవడం కష్టంగా మారింది. ఆఫీసుకు వెళ్తే సెంట్రలైజ్డ్ ఏసీ, ఇంటికి వస్తే బెడ్‌రూమ్‌లో ఏసీ.. ఇలా 24 గంటల్లో సగానికి పైగా సమయం చాలా మంది చల్లటి గాలిలోనే గడిపేస్తున్నారు. అయితే, ఇటీవల సోషల్ మీడియాలోనూ, హెల్త్ ఫోరమ్స్‌లోనూ ఒక కొత్త చర్చ మొదలైంది. ఎక్కువ సమయం ఏసీలో ఉండటం వల్ల ఎముకలు బలహీనపడతాయా? మోకాళ్ల నొప్పులు వస్తాయా? అనే సందేహాలు చాలా మందిని వేధిస్తున్నాయి. అసలు ఎయిర్ కండిషనర్ గాలికి, మన శరీరంలోని ఎముకల బలానికి ఉన్న లింక్ ఏంటి? ప్రముఖ ఆర్థోపెడిక్ వైద్యులు వెల్లడించిన అసలు నిజాలు ఇప్పుడు తెలుసుకుందాం.

ఏసీ వల్ల ఎముకలు నేరుగా బలహీనపడతాయా?

వైద్య నిపుణుల ప్రకారం.. ఏసీ గాలి మన ఎముకలను నేరుగా క్షీణింపజేయదు లేదా బలహీనపరచదు. మన ఎముకల బలం అనేది ప్రధానంగా మనం తీసుకునే కాల్షియం, విటమిన్ డి, క్రమం తప్పని వ్యాయామం, మరియు హార్మోన్ల సమతుల్యతపై ఆధారపడి ఉంటుంది. కాబట్టి ఏసీలో కూర్చోవడం వల్లే ఎముకలు విరిగిపోతాయి లేదా గుల్లబారిపోతాయి అనుకోవడం పొరపాటే. కానీ పరోక్షంగా ఏసీ వాతావరణం మన శరీరంపై, కీళ్లపై కొన్ని ప్రతికూల ప్రభావాలను చూపిస్తుంది.

ఎక్కువ సేపు ఏసీలో ఉండటం వల్ల వచ్చే సమస్యలు:

కండరాలు, కీళ్లు బిగుసుకుపోవడం:

ఏసీ టెంపరేచర్ చాలా తక్కువగా ఉన్నప్పుడు, ఆ చల్లదనానికి శరీరంలోని రక్తనాళాలు సంకోచిస్తాయి. దీనివల్ల కీళ్లకు, కండరాలకు రక్తప్రసరణ కొంత తగ్గుతుంది. ఫలితంగా కండరాలు బిగుసుకుపోయి పాత మోకాళ్ల నొప్పులు, మెడ నొప్పి, నడుము నొప్పి ఉన్నవారికి నొప్పుల తీవ్రత పెరుగుతుంది.

విటమిన్ డి లోపం: రోజంతా ఏసీ గదుల్లోనే నిర్బంధంగా గడపడం వల్ల శరీరానికి సహజసిద్ధమైన సూర్యరశ్మి తగలదు. సూర్యరశ్మి లేకపోతే శరీరంలో విటమిన్ డి ఉత్పత్తి కాదు. విటమిన్ డి లోపిస్తే మనం ఎంత కాల్షియం తిన్నా శరీరం గ్రహించలేదు, తద్వారా ఎముకలు క్రమంగా బలహీనపడతాయి.

శరీరంలో నీటి శాతం తగ్గడం: ఏసీ గదిలో ఉన్నప్పుడు చెమట పట్టదు, దాహం కూడా త్వరగా వేయదు. దీనివల్ల చాలా మంది నీళ్లు తాగడం తగ్గిస్తారు. శరీరంలో డీహైడ్రేషన్ ఏర్పడితే అది కీళ్ల మధ్య ఉండే లూబ్రికేషన్‌ను ప్రభావితం చేస్తుంది, ఫలితంగా కీళ్ల నొప్పులు వచ్చే అవకాశం ఉంది.

ఏసీలో ఉండే వారు తీసుకోవాల్సిన జాగ్రత్తలు:

ఆదర్శవంతమైన ఉష్ణోగ్రత: ఏసీ టెంపరేచర్‌ను మరీ 16 లేదా 18 డిగ్రీల వద్ద కాకుండా, ప్రభుత్వ నిబంధనల ప్రకారం 24 డిగ్రీల సెల్సియస్ వద్ద మెయింటైన్ చేయడం ఉత్తమం. ఇది శరీర ఉష్ణోగ్రతకు సమతుల్యంగా ఉంటుంది.

కాల్షియం, విటమిన్ డి డైట్:

ఏసీలో ఎక్కువ సమయం గడిపేవారు రోజువారీ ఆహారంలో పాలు, పన్నీర్, ఆకుకూరలు, గుడ్లు వంటి కాల్షియం సమృద్ధిగా ఉండే ఆహారాన్ని తీసుకోవాలి. వీలైతే ఉదయం పూట కాసేపు ఎండలో నడవడం అలవాటు చేసుకోవాలి.

హైడ్రేటెడ్‌గా ఉండండి:

దాహం వేయకపోయినా గంటకు ఒకసారి ఖచ్చితంగా మంచి నీళ్లు తాగుతుండాలి. ఇది ఎముకలకే కాకుండా జీర్ణ వ్యవస్థ సజావుగా సాగడానికి కూడా సహాయపడుతుంది.

ఒకే భంగిమలో కూర్చోవద్దు:

ఆఫీసులో ఏసీ కింద గంటల తరబడి ఒకే చోట కదలకుండా కూర్చోవడం మానుకోవాలి. ప్రతి 45 నిమిషాలకు ఒకసారి సీటు నుండి లేచి చిన్నగా స్ట్రెచింగ్ చేయడం లేదా ఐదు నిమిషాలు నడవడం వల్ల కండరాల బిగుతు తగ్గుతుంది.