Denmark PM Warns: గ్రీన్‌ల్యాండ్‌పై అమెరికా ఆక్రమణకు డెన్మార్క్‌ పీఎం హెచ్చరిక: నాటోకు అంతమే!

Denmark PM Warns: వెనెజువెలా మాజీ అధ్యక్షుడు నికోలస్‌ మదురోను అమెరికా బంధించిన తరుణంలో గ్రీన్‌ల్యాండ్‌ ప్రస్తావన మరింత ఎక్కువైంది. అమెరికా అధ్యక్షుడు డొనాల్డ్‌ ట్రంప్‌ "ఇంకా 20 రోజుల్లో గ్రీన్‌ల్యాండ్‌ గురించి చర్చిద్దాం" అంటూ చేసిన వ్యాఖ్యలు అంతర్జాతీయంగా కలకలం రేపాయి. దీనిపై డెన్మార్క్‌ ప్రధానమంత్రి మెటె ఫ్రెడెరిక్సన్‌ తీవ్ర అసంతృప్తి వ్యక్తం చేశారు.

"తోటి నాటో సభ్యదేశంపై అమెరికా దాడి చేస్తే అది మొత్తం సంబంధాలకు అంతం పలుకుతుంది. ఇది నాటో కూటమికే ముగింపు సంకేతం" అని ఆమె స్పష్టంగా హెచ్చరించారు. గ్రీన్‌ల్యాండ్‌ను అమెరికా స్వాధీనం చేసుకోవాలని మాట్లాడటం పూర్తిగా అర్థరహితమని, అలాంటి ఆలోచనలకు తావులేదని ఆమె ఉద్ఘాటించారు.

నాటో (నార్త్‌ అట్లాంటిక్‌ ట్రీటీ ఆర్గనైజేషన్‌) అనేది సైనిక కూటమి. 1949లో సోవియట్‌ యూనియన్‌ విస్తరణను అడ్డుకోవడానికి అమెరికా, బ్రిటన్‌, ఫ్రాన్స్‌, కెనడా తదితర 12 దేశాలు ఏర్పాటు చేశాయి. ప్రస్తుతం 30కి పైగా సభ్యదేశాలు ఉన్నాయి. ఈ కూటమిలో చేరిన దేశాలు ఒకదానిపై దాడి జరిగితే అందరూ కలిసి స్పందించాల్సిన బాధ్యత ఉంది.

ఇదిలా ఉంటే, ట్రంప్‌ సలహాదారు స్టీఫెన్‌ మిల్లర్‌ స్పందన కూడా ఆసక్తికరంగా ఉంది. "గ్రీన్‌ల్యాండ్‌ డెన్మార్క్‌దే అనడానికి ఏ ఆధారం ఉంది?" అని ప్రశ్నించారు. దాన్ని అమెరికా నియంత్రణలోకి తీసుకోవడం వల్ల సైనిక కూటమి ప్రయోజనాలు, ఆర్కిటిక్‌ ప్రాంత భద్రత బలపడుతుందని వాదించారు. మిల్లర్‌ భార్య కేటీ మిల్లర్‌ సోషల్‌ మీడియాలో అమెరికా జెండా రంగుల్లో గ్రీన్‌ల్యాండ్‌ మ్యాప్‌ పోస్టు చేసి "త్వరలో" (SOON) అని రాయడం ఇప్పటికే వివాదాస్పదమైంది.

ఈ వివాదం నాటో సభ్యదేశాల మధ్య ఉద్రిక్తతలను పెంచుతోంది. గ్రీన్‌ల్యాండ్‌ వ్యూహాత్మక ప్రాముఖ్యత, ఖనిజ సంపదలు అమెరికాకు ఆకర్షణీయంగా ఉన్నాయి. అయితే డెన్మార్క్‌, గ్రీన్‌ల్యాండ్‌ నేతలు దీన్ని తీవ్రంగా వ్యతిరేకిస్తున్నారు. ఈ పరిణామాలు అంతర్జాతీయ రాజకీయాల్లో కొత్త అధ్యాయాన్ని రాస్తాయా అనేది ఆసక్తికరంగా మారింది.