Moonlighting Case: మూన్‌లైటింగ్ కేసులో భారతీయుడికి 15 ఏళ్ల జైలు శిక్ష.. అమెరికాలో దొంగతనం ఆరోపణలు!

Moonlighting Case: అమెరికాలో మూన్‌లైటింగ్ (ప్రధాన ఉద్యోగంతో పాటు మరో ఉద్యోగం చేయడం) కారణంగా భారత సంతతికి చెందిన మెహుల్ గోస్వామి అనే వ్యక్తికి 15 ఏళ్ల జైలు శిక్ష విధించారు. న్యూయార్క్‌లో ప్రభుత్వ ఉద్యోగిగా పనిచేస్తూ, ప్రైవేటు కంపెనీలో కాంట్రాక్టర్‌గా మూన్‌లైటింగ్ చేసిన ఆరోపణలు తీవ్రమైనవి. ఈ ఘటన ప్రభుత్వ ఉద్యోగుల బాధ్యతలు, నిజాయితీపై మరోసారి చర్చకు దారితీసింది.

న్యూయార్క్ స్టేట్ ఆఫీస్ ఆఫ్ ఇన్ఫర్మేషన్ టెక్నాలజీ సర్వీసెస్‌లో (ITS) ప్రధాన ఉద్యోగిగా విధులు నిర్వహిస్తున్న గోస్వామి, 2022 నుంచి మాల్టాలోని గ్లోబల్‌ఫౌండ్రీస్ సెమీకండక్టర్ కంపెనీలో కాంట్రాక్టర్‌గా పనిచేస్తున్నాడు. ప్రభుత్వ ఉద్యోగ సమయంలోనే ప్రైవేటు కంపెనీ కోసం పూర్తి సమయం కేటాయించడంతో, అధికారులు అతని మెయిల్‌లు, రికార్డులను పరిశీలించి మూన్‌లైటింగ్‌ను గుర్తించారు. అంతేకాకుండా, రాష్ట్ర నిధుల నుంచి దాదాపు 44 లక్షల రూపాయలు (సుమారు 55,000 డాలర్లు) దొంగతనం చేసినట్లు కూడా ఆరోపణలు ఉన్నాయి.

ఈ ఆరోపణలపై అక్టోబర్ 15న అధికారులు గోస్వామిని అరెస్టు చేశారు. కోర్టులో హాజరైన అతనికి బెయిల్ ఖర్చు చెల్లించకపోవడంతో జైలులోనే ఉంచారు. దర్యాప్తు ముగిసిన తర్వాత కోర్టు 15 ఏళ్ల జైలు శిక్ష విధించింది. "ప్రభుత్వ ఉద్యోగులకు నిజాయితీగా సేవ చేయాల్సిన బాధ్యత ఉంది. గోస్వామి దాన్ని తీవ్రంగా ఉల్లంఘించి, ప్రజా వనరులను, పన్ను చెల్లింపుదారుల డబ్బును దుర్వినియోగం చేశాడు" అని ఇన్‌స్పెక్టర్ జనరల్ లూసీ లాంగ్ వ్యాఖ్యానించారు.

ఈ కేసు అమెరికాలో మూన్‌లైటింగ్ వివాదాలను మరింత తీవ్రతరం చేసింది. ప్రభుత్వ రంగంలో పనిచేసే ఉద్యోగులు ప్రైవేటు ఉద్యోగం చేయకూడదని నిబంధనలు ఉన్నప్పటికీ, ఈ ఘటన ఆ నియమాల అమలులో లోపాలను బహిర్గతం చేసింది. భారతీయ సంతతి వలసవాదులు అమెరికాలో ఎదుర్కొంటున్న సవాళ్లు, ఉద్యోగ నియమాలు ఈ సందర్భంగా చర్చనీయాంశాలుగా మారాయి. దర్యాప్తు మరింత కొనసాగుతున్నట్లు అధికారులు తెలిపారు.