Pakistan Foreign Minister Expresses Distress: ఆ కప్పు టీ మా కొంప ముంచింది: తాలిబన్ భరోసాతో పాక్‌కు భారీ నష్టం.. విదేశాంగ మంత్రి ఆవేదన

Pakistan Foreign Minister Expresses Distress: తాలిబన్లు ఇచ్చిన ఒక కప్పు టీ మాకు ఎంతో నష్టాన్ని కలిగించిందని పాకిస్తాన్ ఉప ప్రధాని, విదేశాంగ మంత్రి ఇస్సాక్ దార్ ఆవేదన వ్యక్తం చేశారు. ఐఎస్‌ఐ మాజీ చీఫ్ లెఫ్టినెంట్ జనరల్ ఫయాజ్ హమీద్ అఫ్గానిస్థాన్ పర్యటనను ఉద్దేశించి ఈ వ్యాఖ్యలు చేసిన ఆయన, పాక్-అఫ్గాన్ మధ్య నెలకొన్న ఉద్రిక్తతల నేపథ్యంలో ఈ విషయాన్ని ప్రస్తావించారు.

2021లో తాలిబన్లు అఫ్గాన్ ప్రజాప్రభుత్వాన్ని కూల్చి అధికారాన్ని చేపట్టిన తర్వాత, అదే సంవత్సరంలో హమీద్ అఫ్గాన్‌లో పర్యటించారు. ఆ పర్యటన సమయంలో జరిగిన ఒక సమావేశంలో హమీద్ తాలిబన్ పాలకులతో కలిసి టీ తాగుతూ కనిపించారు. అంతా బాగుంటుందని వారికి భరోసా ఇచ్చిన ఆయన చర్యలు పాకిస్తాన్‌కు దారుణ పరిణామాలకు దారితీశాయని ఇస్సాక్ దార్ విమర్శించారు. "ఆ కప్పు టీ తర్వాత మేం మా సరిహద్దులు తెరిచాం. దీంతో 35 వేల నుంచి 40 వేల మంది తాలిబన్ మిలిటెంట్లు చొరబడ్డారు. అంతేకాకుండా, పాక్‌లో అధికారంలో ఉన్న ప్రభుత్వం కరడుగట్టిన నేరస్థులను కూడా విడుదల చేసింది" అని ఆయన తీవ్రంగా ఆరోపించారు.

హమీద్ భేటీ తర్వాత అఫ్గాన్‌లో మిలిటెంట్లకు తలుపులు తెరుచుకున్నాయని, పాకిస్తాన్‌లో ఉగ్రవాదం మరింత రగిలిందని ఇస్సాక్ దార్ పేర్కొన్నారు. "ఇలాంటి తప్పిదాలు మళ్లీ జరగకుండా, మా నిర్ణయాలపై పూర్తి నియంత్రణ కలిగి ఉండాలి" అని ఆయన సూచించారు. తాలిబన్లు అధికారంలోకి వచ్చినప్పుడు పాకిస్తాన్ స్వాగతం చేసినప్పటికీ, ఇప్పుడు రెండు దేశాల మధ్య తీవ్ర ఉద్రిక్తతలు, సరిహద్దు ఘర్షణలు తీవ్రతరం అవుతున్నాయని ఆయన తెలిపారు.

ఈ సందర్భంగా పాక్ రక్షణ మంత్రి ఖవాజా ఆసిఫ్ కూడా కీలక వ్యాఖ్యలు చేశారు. "శాంతి చర్చలు విఫలమైతే, ఇరుదేశాల మధ్య ఉద్రిక్తతలు మరింత దిగజారుతాయి. మావద్ద చాలా ఆప్షన్లు ఉన్నాయి. శత్రువులు మమ్మల్ని ఎలా లక్ష్యంగా చేసుకుంటే, మా ప్రతిస్పందన కూడా అంతే తీవ్రంగా ఉంటుంది. చర్చలు ఫలించకపోతే యుద్ధం జరిగి తీరుతుంది" అని ఆయన హెచ్చరించారు. తాలిబన్లు మిలిటెంట్లకు కాబూల్‌లో ఆశ్రయం కల్పిస్తూ, సరిహద్దు దాడులను ప్రోత్సహిస్తున్నాయని పాక్ మంత్రులు దుయ్యబట్టారు.

అయితే, ఈ వ్యాఖ్యలను అఫ్గానిస్థాన్ తీవ్రంగా ఖండించింది. సామాన్య ప్రజలను లక్ష్యంగా చేసుకుని పాకిస్తాన్ డ్రోన్ దాడులకు పాల్పడుతోందని మండిపడింది. పాక్-అఫ్గాన్ మధ్య ఈ ఘర్షణలకు ముగింపు పలుకుతూ శాంతి చర్చలు కొనసాగుతున్నాయి. ఈ సంఘటనలు రెండు దేశాల మధ్య సంబంధాలపై కొత్త చర్చలకు దారితీస్తున్నాయని విశ్లేషకులు అభిప్రాయపడుతున్నారు.