Trump Softens His Tone: ట్రంప్ స్వరం మార్పు.. పెట్రోకు వైట్‌హౌస్ ఆహ్వానం

Trump Softens His Tone: వెనెజువెలా మాజీ అధ్యక్షుడు నికోలస్ మదురోపై చర్యలు తర్వాత లాటిన్ అమెరికా దేశాలైన మెక్సికో, క్యూబా, కొలంబియాలను ఉద్దేశించి అమెరికా అధ్యక్షుడు డొనాల్డ్ ట్రంప్ గట్టి హెచ్చరికలు జారీ చేసిన విషయం తెలిసిందే. మాదకద్రవ్యాల తయారీ, అక్రమ రవాణాపై ఆ దేశాలు మార్పు చేసుకోకపోతే వెనెజువెలా లాంటి పరిణామాలే ఎదుర్కొనాల్సి వస్తుందని బెదిరించారు. అయితే, ఈ నేపథ్యంలో ట్రంప్ తమ స్వరాన్ని కాస్త మార్చారు. కొలంబియా అధ్యక్షుడు గుస్తావో పెట్రోతో స్నేహపూర్వక చర్చలకు సిద్ధమని ప్రకటించారు.

ట్రంప్ తమ ట్రూత్ సోషల్ ప్లాట్‌ఫామ్‌లో పోస్టు ద్వారా ఈ విషయాన్ని వెల్లడించారు. గుస్తావో పెట్రోతో ఫోన్‌లో మంచి సంభాషణ జరిగిందని, మాదకద్రవ్యాల సమస్యతోపాటు ఇతర విభేదాలపై చర్చించామని తెలిపారు. త్వరలో వైట్‌హౌస్‌లో పెట్రోతో భేటీ జరుగుతుందని, ఆ కోసం ఏర్పాట్లు చేస్తున్నామని పేర్కొన్నారు.

గతంలో ట్రంప్ ఆరోపణలు చేసిన సమయంలో కొలంబియా అధ్యక్షుడు గుస్తావో పెట్రో తీవ్రంగా స్పందించారు. అమెరికా సైనిక చర్యకు సిద్ధంగా ఉన్నానని, ‘నన్ను తీసుకెళ్లండి, ఇక్కడే ఎదురుచూస్తున్నా’ అంటూ సవాల్ విసిరారు. అలాంటి చర్య తీసుకుంటే పరిణామాలు మరింత తీవ్రంగా ఉంటాయని హెచ్చరించారు.

ఈ ఆకస్మిక మార్పు రెండు దేశాల మధ్య ఉద్రిక్తతలను తగ్గించే అవకాశంగా కనిపిస్తోంది. మాదకద్రవ్యాల నియంత్రణ, ద్వైపాక్షిక సంబంధాలపై ఈ భేటీ కీలకంగా మారనుంది.