Nitish Kumar Takes Oath as Bihar CM for the 10th Time: పదోసారి బిహార్ సీఎంగా నితీశ్ కుమార్ ప్రమాణ స్వీకారం... ఎన్డీఏకు బంపర్ విజయం!

Nitish Kumar Takes Oath as Bihar CM for the 10th Time: బిహార్ రాజకీయాల్లో సుదీర్ఘ అనుభవం ఉన్న జేడీయూ అధినేత నితీశ్ కుమార్... పదోసారి ముఖ్యమంత్రిగా గురువారం ప్రమాణ స్వీకారం చేశారు. పట్నాలోని గాంధీ మైదానంలో జరిగిన ఘనంగా ప్రమాణ స్వీకార కార్యక్రమంలో నితీశ్ కుమార్‌తో పాటు 27 మంది మంత్రులు కూడా బాధ్యతలు స్వీకరించారు. బీజేపీ నేతలు సామ్రాట్ చౌదరీ, విజయ్ కుమార్ సిన్హాలు ఉప ముఖ్యమంత్రులుగా ప్రమాణం చేశారు.

ఈ కార్యక్రమానికి ప్రధాని నరేంద్ర మోదీ, కేంద్ర హోమ్ మంత్రి అమిత్ షా, ఆంధ్రప్రదేశ్ ముఖ్యమంత్రి చంద్రబాబు నాయుడు సహా పలువురు ప్రముఖులు హాజరయ్యారు. తాజా అసెంబ్లీ ఎన్నికల్లో ఎన్డీఏ కూటమి అధికారాన్ని కైవసం చేసుకున్న నేపథ్యంలో ఈ ప్రమాణ స్వీకారం జరిగింది.

బిహార్‌లో మొత్తం 243 అసెంబ్లీ స్థానాలకు జరిగిన ఎన్నికల్లో ఎన్డీఏ ఏకంగా 202 స్థానాలు గెలుచుకుని సూపర్ హిట్ సాధించింది. బీజేపీ 101 స్థానాల్లో పోటీ చేసి 89లో విజయం సాధించగా... జేడీయూ కూడా 101 స్థానాల్లోనే పోటీ చేసి 85 చోట్ల గెలిచింది. కొత్త మంత్రివర్గంలో బీజేపీకి 14, జేడీయూకు 9 మంత్రి పదవులు కేటాయించారు.

దాదాపు 19 ఏళ్లుగా బిహార్ రాజకీయాల్లో కీలక పాత్ర పోషిస్తున్న నితీశ్ కుమార్... 2000లో కేవలం 7 రోజులు మాత్రమే సీఎంగా ఉన్నారు. ఇప్పుడు ఎన్డీఏ మద్దతుతో మరోసారి పగ్గాలు చేపట్టడం ఆసక్తికరం.

ప్రమాణ స్వీకారం అనంతరం ప్రధాని మోదీ నితీశ్ కుమార్‌కు శుభాకాంక్షలు తెలిపారు. "అనుభవజ్ఞుడైన నాయకుడు నితీశ్... బిహార్‌కు మంచి పాలన అందిస్తారని ఆశిస్తున్నాను" అంటూ ఎక్స్‌లో పోస్ట్ చేశారు.

బిహార్‌లో ఎన్డీఏ ఈ భారీ విజయంతో మరింత బలోపేతమైంది. నితీశ్ నాయకత్వంలో రాష్ట్ర అభివృద్ధి కొత్త ఊపందుకుంటుందని రాజకీయ విశ్లేషకులు అభిప్రాయపడుతున్నారు.