Divya Deshmukh Creates History: చరిత్ర సృష్టించిన దివ్య దేశ్‌ముఖ్.. ఇంతకు ఎవరీమే?

Divya Deshmukh Creates History: ఎఫ్ఐడిఇ (FIDE) మహిళల ప్రపంచ కప్ 2025 ఫైనల్‌లో అద్భుతమైన పరిణామాలు చోటు చేసుకున్నాయి. భారతీయ చెస్ సంచలనం, అంతర్జాతీయ మాస్టర్ (IM) దివ్య దేశ్‌ముఖ్ చరిత్ర సృష్టించి ఫైనల్‌కు చేరుకుంది. 19 ఏళ్ల దివ్య దేశ్‌ముఖ్ తన సెమీ-ఫైనల్ మ్యాచ్‌లో మాజీ ప్రపంచ ఛాంపియన్ టాన్ జోంగ్‌యి (చైనా)ని ఓడించి, ఫిడే మహిళల ప్రపంచ కప్ ఫైనల్‌కు చేరుకున్న మొదటి భారతీయ మహిళగా రికార్డు సృష్టించింది. ఈ విజయం ఆమెకు 2026లో జరిగే ప్రతిష్టాత్మక మహిళల క్యాండిడేట్స్ టోర్నమెంట్లో ఒక స్థానాన్ని కూడా కల్పించింది. క్యాండిడేట్స్ టోర్నమెంట్ విజేత ప్రస్తుత ప్రపంచ ఛాంపియన్ జు వెంజున్‌కు సవాలు విసిరే అవకాశం పొందుతారు.

ఈ ప్రపంచ కప్, నాకౌట్ ఫార్మాట్‌లో జరుగుతుంది. విజేతలతో పాటు, టాప్ మూడు స్థానాల్లో నిలిచిన క్రీడాకారిణులు క్యాండిడేట్స్ టోర్నమెంట్‌కు అర్హత సాధిస్తారు. దివ్య దేశ్‌ముఖ్ ఇప్పటికే ఫైనల్‌కు చేరుకోవడం ద్వారా క్యాండిడేట్స్ టోర్నమెంట్‌లో తన స్థానాన్ని ఖరారు చేసుకుంది. భారత చెస్ చరిత్రలో ఇది ఒక సువర్ణాధ్యాయం!

దివ్య దేశ్‌ముఖ్ 2005 డిసెంబర్ 9 నాగ్‌పూర్ లో జన్మించారు. ప్రస్తుతం ఆమెకు 19 ఏళ్లు. ఆమె తల్లిదండ్రులు జితేంద్ర దేశ్‌ముఖ్, నమ్రత దేశ్‌ముఖ్ వైద్యులు. దివ్య దేశ్‌ముఖ్ తన చిన్న వయస్సులోనే అనేక అద్భుతమైన విజయాలను సాధించింది. ఆమె చెస్ ఒలింపియాడ్‌లలో మూడుసార్లు వ్యక్తిగత గోల్డ్ మెడల్స్ గెలుచుకుంది. ప్రపంచ యూత్ ఛాంపియన్‌షిప్‌తో పాటు, 2024లో ప్రపంచ జూనియర్ గర్ల్స్ చెస్ ఛాంపియన్ టైటిల్‌ను గెలుచుకుంది. ఈ టైటిల్‌ను గెలిచిన నాల్గవ భారతీయ మహిళ ఆమె. జూలై 2025 నాటికి ఆమె ఫిడే రేటింగ్ 2463గా ఉంది. అక్టోబర్ 2024లో ఆమె గరిష్ట రేటింగ్ 2501కి చేరుకుంది. దివ్య దేశ్‌ముఖ్ తన దూకుడు ఆటతీరు, వ్యూహాత్మక ఆలోచన, మరియు ఒత్తిడిలోనూ సంయమనం కోల్పోకుండా ఆడే సామర్థ్యానికి ప్రసిద్ధి చెందింది. ఆమె భారత చెస్ భవిష్యత్తుకు ఒక వెలుగు దివ్వెగా నిలుస్తోంది.