Suvarna Raj: ఆసియా పారా గేమ్స్‌లో భారత క్రీడాకారులు అద్భుత ప్రదర్శనతో దూసుకుపోతున్నారు. పోటీల 5వ రోజున భారత్‌కు తొలి స్వర్ణ పతకం దక్కింది. మహిళల డిస్కస్ త్రో విభాగంలో భారత స్టార్ పారా అథ్లెట్ సువర్ణ రాజ్ బంగారు పతకాన్ని కైవసం చేసుకుని దేశ ఖ్యాతిని ప్రపంచ వేదికపై రెపరెపలాడించారు. ఈ విజయంతో భారత్ సాధించిన స్వర్ణాల సంఖ్య 15కు చేరింది.

ఉత్కంఠభరిత పోరులో 5వ ప్రయత్నంలో స్వర్ణం

జపాన్‌లోని ఐచి-నగోయా వేదికగా జరుగుతున్న ఈ పోటీల్లో గురువారం ఉదయం మహిళల F54 కేటగిరీ డిస్కస్ త్రో ఫైనల్ జరిగింది. సువర్ణ రాజ్ వీల్‌చైర్‌లో కూర్చుని తన 5వ ప్రయత్నంలో చక్రాన్ని ఏకంగా 15.66 మీటర్ల దూరం విసిరి అగ్రస్థానంలో నిలిచారు ఈ పోరు చివరి వరకు ఎంతో ఉత్కంఠగా సాగింది. ఇరాన్ అథ్లెట్ షహ్లా హదీదీ 15.45 మీటర్ల త్రోతో రజతం (సిల్వర్) గెలుచుకోగా, వియత్నాం క్రీడాకారిణి కాంస్య పతకాన్ని దక్కించుకుంది.

F54 కేటగిరీ అంటే ఏమిటి?

వెన్నుముక గాయాలు, పోలియో లేదా దిగువ అవయవాలు సరిగా పనిచేయని దివ్యాంగ అథ్లెట్లు ఈ కేటగిరీలో పోటీపడతారు. వీరు నిలబడలేరు కాబట్టి వీల్‌చైర్‌లో కూర్చునే తమ శరీర పైభాగం బలంతో ఈ పోటీల్లో పాల్గొంటారు.

-కేవలం క్రీడాకారిణే కాదు.. ఐక్యరాజ్యసమితి అవార్డు గ్రహీత కూడా..

సువర్ణ రాజ్ కేవలం మైదానంలోనే కాకుండా, సమాజంలోనూ ఎంతోమందికి స్ఫూర్తిగా నిలుస్తున్నారు. దివ్యాంగుల హక్కుల కోసం ఆమె సుదీర్ఘకాలంగా పోరాడుతున్నారు. దివ్యాంగులకు సమాన అవకాశాలు, సరైన మౌలిక వసతులు కల్పించడంలో ఆమె చేసిన నిస్వార్థ సేవలను గుర్తించిన ఐక్యరాజ్యసమితి.. 2024లో ఆమెను ప్రతిష్టాత్మక UN SDG యాక్షన్ అవార్డుతో సత్కరించింది.

ఓవైపు సామాజిక కార్యకర్తగా సేవలు అందిస్తూనే, మరోవైపు క్రీడారంగంలో దేశానికి స్వర్ణం సాధించిపెట్టిన సువర్ణ రాజ్‌పై దేశవ్యాప్తంగా ప్రశంసల వర్షం కురుస్తోంది.

Tags: