తెలంగాణలో క్రమంగా పడిపోతున్న బీఆర్ఎస్ ఓటు బ్యాంక్

పదేళ్ల పాలనలో రాష్ట్ర రాజకీయాల్లో ఆధిపత్యం చెలాయించిన బీఆర్ఎస్ పార్టీ, క్రమంగా తన ఓటు బ్యాంకును కోల్పోతున్నట్లు తాజా ఎన్నికల ఫలితాలు స్పష్టం చేస్తున్నాయి. 2018 అసెంబ్లీ ఎన్నికల్లో 46.87 శాతం ఓటు షేర్‌తో విజయవంతమైన బీఆర్ఎస్, 2023లో అది 37.62 శాతానికి పడిపోయింది. అంటే సుమారు 9 శాతం ఓట్లు తగ్గాయి. అలాగే 2019 పార్లమెంట్ ఎన్నికల్లో 41.29 శాతం ఓట్లు సాధించిన ఈ పార్టీ, 2024లో ఏకంగా 16.68 శాతానికి దిగిపోయింది. ఇది 25 శాతం క్షీణత అని రాజకీయ విశ్లేషకులు అంచనా వేస్తున్నారు.

తాజా జూబ్లీహిల్స్ ఉప ఎన్నికల్లో కూడా ఈ ట్రెండ్ స్పష్టంగా కనిపించింది. 2023 అసెంబ్లీ ఎన్నికల్లో ఈ నియోజవర్గంలో బీఆర్ఎస్ అభ్యర్థి మాగంటి గోపీనాథ్ 80,549 ఓట్లతో 43.94 శాతం ఓటు షేర్ సాధించి విజయం సమకూర్చుకున్నారు. మొత్తం 1,83,312 ఓట్లు పోలైనప్పటికీ, కాంగ్రెస్ అభ్యర్థి అజారుద్దీన్ కేవలం 64,212 ఓట్లతో 35.03 శాతానికి పరిమితమయ్యారు. రెండు పార్టీల మధ్య కేవలం 8.91 శాతం ఓట్ల తేడా ఉండటంతో బీఆర్ఎస్ సౌకర్యంగా గెలిచింది.

కానీ, తాజా ఉప ఎన్నికల్లో పరిస్థితి పూర్తిగా మలుపు తిరిగింది. మొత్తం 1,94,727 ఓట్లు పోలైన ఈ బైపోల్‌లో కాంగ్రెస్ అభ్యర్థి నవీన్ యాదవ్ 98,988 ఓట్లతో 50.83 శాతం ఓటు షేర్ సాధించి విజయం సాధించారు. ఇది గత అసెంబ్లీ ఎన్నికలతో పోలిస్తే కాంగ్రెస్‌కు 15.80 శాతం ఓట్లు ఎక్కువ వచ్చినట్లు తెలుస్తోంది. అదే సమయంలో బీఆర్ఎస్ అభ్యర్థి మాగంటి సునీత 74,259 ఓట్లతో 38.13 శాతం ఓటు షేర్‌కే సరిపడ్డారు. అంటే బీఆర్ఎస్‌కు 5.81 శాతం ఓట్లు తగ్గాయి. ఇప్పుడు రెండు పార్టీల మధ్య 12.4 శాతం ఓట్ల తేడా ఏర్పడటంతో కాంగ్రెస్ బీఆర్ఎస్‌ను పట్టిపట్టింది.

బీఆర్ఎస్ ఓటు షేర్ క్షీణత: కీలక డేటా

ఎన్నికలు,                        బీఆర్ఎస్ ఓటు షేర్ (%),                   మార్పు (%)

2018 అసెంబ్లీ,                              46.87,                                        -

2023 అసెంబ్లీ,                             37.62,                                         -9

2019 పార్లమెంట్,                        41.29,                                          -

2024 పార్లమెంట్,                       16.68,                                           -25

2023 జూబ్లీహిల్స్ అసెంబ్లీ,        43.94,                                           -

2025 జూబ్లీహిల్స్ బైపోల్,          38.13,                                            -5.81

ఈ డేటా ప్రకారం, బీఆర్ఎస్ ఓటు బ్యాంక్ క్రమంగా ఎరుగుతున్నట్లు స్పష్టం. పార్టీ అంతర్గత కలహాలు, ప్రజల్లో అసంతృప్తి, కాంగ్రెస్ ప్రభుత్వం అమలు చేస్తున్న సంక్షేమ పథకాలు ఈ క్షీణతకు కారణాలుగా రాజకీయ విశ్లేషకులు చెబుతున్నారు. "బీఆర్ఎస్ పదేళ్ల పాలనలో రాష్ట్ర ప్రజలు ఆశించిన అభివృద్ధి లేకపోవడం, ఆర్థిక ఇబ్బందులు పెరగడం వల్ల ఓట్లు తిరిగాయి" అంటూ ఒక విశ్లేషకుడు అభిప్రాయపడ్డారు.

ఈ ఓటు షేర్ క్షీణత బీఆర్ఎస్‌కు రాజకీయంగా తీవ్ర దెబ్బగా మారింది. భవిష్యత్ ఎన్నికల్లో మరింత ఓట్లు కోల్పోకుండా ఉండాలంటే పార్టీలో మార్పులు చేయాలని నిపుణులు సూచిస్తున్నారు. తెలంగాణ రాజకీయాల్లో బీఆర్ఎస్ స్థితి ఏమిటో ఇది సూచిక అని చర్చ ఉధృతం కానుంది.