Saudi road accident tragedy: సౌదీ రోడ్డు ప్రమాదం: ఒకే కుటుంబంలో 18 మంది మృతి.. విద్యానగర్‌కు చెందిన నజీరుద్దీన్ కుటుంబం విషాదం

Saudi road accident tragedy: సౌదీ అరేబియాలో జరిగిన ఘోర రోడ్డు ప్రమాదంలో హైదరాబాద్ విద్యానగర్‌కు చెందిన ఒకే కుటుంబానికి చెందిన 18 మంది ప్రాణాలు కోల్పోయారు. విశ్రాంత రైల్వే ఉద్యోగి నజీరుద్దీన్ నేతృత్వంలో తన కుటుంబ సభ్యులతో కలిసి ఉమ్రా యాత్రకు వెళ్లిన ఈ కుటుంబం, పవిత్ర మక్కా దర్శనం పూర్తి చేసి మదీనాకు ప్రయాణిస్తుండగా ఈ దారుణ ఘటన చోటుచేసుకుంది. మొత్తం 45 మంది హైదరాబాదీ యాత్రికులు ఈ ప్రమాదంలో మృతి చెందారు.

సోమవారం తెల్లవారుజామున మదీనా నగరానికి 25 కిలోమీటర్ల దూరంలో జరిగిన ఈ దుర్ఘటనలో, ఉమ్రా యాత్రికులను తీసుకెళ్తున్న బస్సు డీజిల్ ట్యాంకర్‌ను ఢీకొనడంతో మంటలు చెలరేగాయి. ఈ ఘటనలో మృతుల సంఖ్య 45కి చేరింది. తెలంగాణ హజ్ కమిటీ ప్రకటన ప్రకారం, మృతుల్లో 17 మంది పురుషులు, 18 మంది మహిళలు, 10 మంది చిన్నారులు ఉన్నారు. అందరూ హైదరాబాద్‌కు చెందినవారే. మొత్తం 46 మంది యాత్రికుల్లో ఒక్కరు అబ్దుల్ షోయబ్ మాత్రమే తప్పించుకుని ఆసుపత్రిలో చికిత్స పొందుతున్నారు.

ఈనెల 9వ తేదీన నలుగురు ట్రావెల్ ఏజెన్సీల ద్వారా 54 మంది హైదరాబాదీలు జెడ్డాకు బయల్దేరారు. 23వ తేదీ వరకు ఉమ్రా టూర్ ప్లాన్ ప్రకారం మక్కా దర్శనం పూర్తి చేసి మదీనాకు వెళ్తుండగా, భారత కాలమానం ప్రకారం తెల్లవారుజామున 1.30 గంటల సమయంలో ఈ ప్రమాదం జరిగింది. యాత్రికులు నిద్రలో ఉండటంతో పరిస్థితి మరింత దారుణమైంది. నజీరుద్దీన్ కుటుంబం పూర్తిగా కబళించబడిన ఈ ఘటన, హైదరాబాద్‌లో దిగ్భ్రాంతి, దుఃఖాన్ని కలిగించింది.

సౌదీ అధికారులు ఘటనాస్థలంలో రక్షణా చర్యలు చేపట్టారు. మృతదేహాల గుర్తింపు కోసం డీఎన్ఏ పరీక్షలు జరుపనున్నారు. భారత ఎంబసీ జెడ్డాలో కంట్రోల్ రూమ్ ఏర్పాటు చేసి, బాధిత కుటుంబాలకు సహాయం అందించడానికి చర్యలు తీసుకుంటోంది. తెలంగాణ ప్రభుత్వం, ముస్లిం సంఘాలు కూడా మద్దతు వ్యక్తం చేస్తున్నాయి. ఈ విషాదంలో మృతుల ఆత్మలకు శాంతి చేకూరాలని, కుటుంబాలకు ధైర్యం కలగాలని అందరూ ప్రార్థిస్తున్నారు.