Telangana CM Revanth Reddy Reviews Cyclone Montha Impact: తెలంగాణ: మొంథా తుపాను ప్రభావంపై సీఎం రేవంత్‌రెడ్డి సమీక్ష.. ప్రాణాలు, ఆస్తులు కాపాడండి: అధికారులకు ఆదేశాలు

Telangana CM Revanth Reddy Reviews Cyclone Montha Impact: మొంథా తుపాను తీవ్ర వాయుగుండంగా మారి భారీ వర్షాలు కురిస్తున్న నేపథ్యంలో తెలంగాణ ముఖ్యమంత్రి ఏ. రేవంత్‌రెడ్డి అధికారులతో సమీక్ష సమావేశం నిర్వహించారు. రాష్ట్రవ్యాప్తంగా అప్రమత్తంగా ఉండాలని, ప్రాణాలు, ఆస్తులు, పశువుల నష్టం జరగకుండా అన్ని జాగ్రత్తలు తీసుకోవాలని ఆదేశాలు జారీ చేశారు. మంగళవారం సచివాలయంలో జరిగిన ఈ సమావేశంలో సీఎం వివిధ శాఖల అధికారులతో వాయుగుండం ప్రభావాలు, నష్ట నివారణ చర్యలపై చర్చించారు.

ధాన్యం, పత్తి కొనుగోలు కేంద్రాల్లో ఏర్పాట్లు

కల్లాల్లో ధాన్యం, పత్తి ఆరబోసిన ప్రదేశాల్లో నష్టాలు జరగకుండా తగిన చర్యలు తీసుకోవాలని సీఎం రేవంత్‌రెడ్డి స్పష్టం చేశారు. కొనుగోలు కేంద్రాల్లో అవసరమైన రక్షణా పద్ధతులు అమలు చేయాలని, అధికారులు క్షేత్రస్థాయిలో పరిశీలించాలని ఆదేశించారు. ఉమ్మడి ఖమ్మం, వరంగల్, నల్గొండ జిల్లాల్లో తుపాను ప్రభావం తీవ్రంగా ఉండటంతో పాటు, హైదరాబాద్‌తో పాటు ఇతర జిల్లాల్లో కూడా భారీ వర్షాలు కురుస్తున్నాయి. ఈ పరిస్థితుల్లో అన్ని శాఖల సిబ్బంది అప్రమత్తంగా ఉండాలని సూచించారు.

రైళ్ల ప్రయాణికులకు ప్రత్యామ్నాయాలు

గోల్కొండ, కోణార్క్ ఎక్స్‌ప్రెస్‌లు నిలిచిపోవడం, పలు రైళ్లు దారి మళ్లించబడటంతో ప్రయాణికులు ఇబ్బంది పడుతున్నారు. వీరికి ప్రత్యామ్నాయ ప్రయాణ సౌకర్యాలు కుదుర్చాలని, రైల్వే అధికారులతో సమన్వయం చేసుకోవాలని సీఎం ఆదేశించారు. తుపాను ప్రభావిత జిల్లాల్లో ఎస్‌డీఆర్‌ఎఫ్, ఎన్‌డీఆర్‌ఎఫ్ బృందాలు ముమ్మరంగా పనిచేయాలని, కలెక్టర్లు వీటికి అవసరమైన దిశానిర్దేశం చేయాలని తెలిపారు.

వంగలు, చెరువుల పరిశీలన

వాగులు, వంకలు పొంగే ప్రమాదం ఉన్నందున జిల్లా అధికారులు అప్రమత్తంగా ఉండాలని రేవంత్‌రెడ్డి సూచించారు. లోతట్టు ప్రాంతాల్లో ఉన్న ప్రజలను సహాయక శిబిరాలకు తరలించాలని, నీటి పారుదల శాఖ అధికారులు రిజర్వాయర్లు, చెరువులు, కుంటల నీటి మట్టాన్ని ఎప్పటికప్పుడూ పరిశీలించాలని ఆదేశించారు. నీటి విడుదలపై ముందుగానే కలెక్టర్లు, క్షేత్రస్థాయి సిబ్బందికి సమాచారం అందించాలని తెలిపారు. పూర్తిగా నిండిన చెరువులు, రిజర్వాయర్ల వద్ద ఇసుక బస్తాలు సిద్ధంగా ఉంచాలని కూడా సూచించారు.

రాకపోకల నిషేధం, పారిశుద్ధ్య చర్యలు

రోడ్లపై నీరు నిలిచిన ప్రాంతాలు, లోలెవల్ బ్రిడ్జిలు, కాజ్‌వేలపై రాకపోకలు పూర్తిగా నిషేధించాలని సీఎం ఆదేశాలు. పోలీసులు, రెవెన్యూ అధికారులు బారికేడ్లు ఏర్పాటు చేసి పర్యవేక్షించాలని తెలిపారు. వర్షానంతరం దోమలు, క్రిమికీటకాలు విజృంభించి అంటువ్యాధులు ప్రబలే ప్రమాదం ఉన్నందున పారిశుద్ధ్య సిబ్బంది ఎప్పటికప్పుడూ పనిచేపట్టాలని సూచించారు. వైద్యారోగ్య శాఖ మందులు అందుబాటులో ఉంచుకోవాలని, అవసరమైన చోట్ల వైద్య శిబిరాలు నడపాలని ఆదేశించారు.

హైదరాబాద్‌లో వినతులపై స్పందన

హైదరాబాద్‌లో ప్రజల నుంచి వచ్చే వినతులు, ఫిర్యాదులపై జీహెచ్‌ఎంసీ, హైడ్రా, ఎస్‌డీఆర్‌ఎఫ్, అగ్నిమాపక శాఖ సిబ్బంది వెంటనే స్పందించాలని ముఖ్యమంత్రి రేవంత్‌రెడ్డి స్పష్టం చేశారు. ఈ చర్యలతో తుపాను ప్రభావాలను తగ్గించి, ప్రజల భద్రతను నిర్ధారించవచ్చని అభిప్రాయపడ్డారు