Telangana Urban Local Body Elections: తెలంగాణ పట్టణ స్థానిక ఎన్నికలు: తుది ఓటర్ల జాబితా విడుదల చేసిన రాష్ట్ర ఎన్నికల సంఘం

Telangana Urban Local Body Elections: తెలంగాణలో రాబోయే మున్సిపల్ ఎన్నికల సన్నాహాల్లో భాగంగా రాష్ట్ర ఎన్నికల సంఘం (ఈసీ) తుది ఓటర్ల జాబితాను అధికారికంగా ప్రకటించింది. ఎన్నికలు నిర్వహించబోయే మున్సిపాలిటీలు మరియు కార్పొరేషన్లలో మొత్తం 52,43,023 మంది ఓటర్లు నమోదైనట్లు సంఘం వెల్లడించింది. ఇందులో పురుషులు 25,62,369 మంది, మహిళలు 26,80,014 మంది, ట్రాన్స్‌జెండర్ వ్యక్తులు 640 మంది ఉన్నారు. పట్టణ ప్రాంతాల్లోని స్థానిక సంస్థల్లో మహిళా ఓటర్ల సంఖ్య పురుషుల కంటే ఎక్కువగా ఉండటం విశేషం.

నిజామాబాద్ కార్పొరేషన్‌లో అత్యధికంగా 3,48,051 మంది ఓటర్లు ఉండగా, కొత్తగూడెం కార్పొరేషన్‌లో అతి తక్కువగా 1,34,775 మంది ఉన్నారు. ఇక మున్సిపాలిటీల విషయానికి వస్తే, ఆదిలాబాద్ మున్సిపాలిటీలో అత్యధికంగా 1,43,655 మంది ఓటర్లు నమోదు కాగా, అమరచింత మున్సిపాలిటీలో అతి తక్కువగా 9,147 మంది మాత్రమే ఉన్నారు.

పట్టణ స్థానిక సంస్థల ఎన్నికల నిర్వహణ కోసం పురపాలక శాఖ తన కార్యకలాపాలను ముమ్మరం చేసింది. రిజర్వేషన్ల ప్రక్రియ పూర్తయిన తర్వాత ఎన్నికల నోటిఫికేషన్‌ను విడుదల చేయనున్నారు. జనాభా ఆధారంగా వార్డులు, డివిజన్లు, మున్సిపాలిటీలు మరియు కార్పొరేషన్లకు సంబంధించిన రిజర్వేషన్లను నిర్ణయించనున్నారు. ఎన్నికల ప్రక్రియలో రిజర్వేషన్లు కీలక పాత్ర పోషిస్తాయి కాబట్టి, అధికారులు ఈ పనిని సకాలంలో ముగించేందుకు తీవ్రంగా కృషి చేస్తున్నారు. రాష్ట్రవ్యాప్తంగా గడువు ముగిసిన 117 మున్సిపాలిటీలు మరియు 6 కార్పొరేషన్లకు ఎన్నికలు జరగనున్న సంగతి తెలిసిందే.