YSRCP BTTA Renuka : నేతన్నలను నమ్మించి మోసం చేసిన చంద్రబాబు

• జీఎస్టీ రీయింబర్స్‌మెంట్‌పై నేటికీ నిర్థిష్ట విధివిధానాలు లేవు..
• చేనేత కార్మికులను పదేపదే చంద్రబాబు దగా చేస్తున్నారు
• టీడీపీ హయాంలో నేతన్నల కోసం చేసిన ఖర్చు రూ.442 కోట్లు
• వైయస్ఆర్‌సీపీ హయాంలో చేసిన ఖర్చు రూ.3706 కోట్లు

ఎన్నికలకు ముందు చేనేత కార్మికులకు హామీలు ఇవ్వడం, అధికారంలోకి వచ్చిన తరువాత వారిని మోసం చేయడం సీఎం చంద్రబాబుకు అలవాటుగా మారిందని వైయస్ఆర్‌సీపీ ఎమ్మిగనూరు ఇన్‌చార్జ్‌, మాజీ ఎంపీ బుట్టా రేణుక మండిపడ్డారు. కర్నూలులో జిల్లా పార్టీ కార్యాలయంలో మీడియాతో మాట్లాడుతూ గత ఏడాది ఎన్నికలకు ముందు చేనేత కార్మికులకు అనేక హమీలు ఇచ్చిన చంద్రబాబు ఈ పద్నాలుగు నెలలుగా వాటి అమలుపై తీవ్ర నిర్లక్ష్యాన్ని ప్రదర్శించారని ఆగ్రహం వ్యక్తం చేశారు. జీఎస్టీ రీయింబర్స్‌మెంట్ పై నేటి వరకు కనీసం విధి విధానాలను కూడా ఖరారు చేయకుండా చేనేత రంగంపై తనకున్న చిన్నచూపును చాటుకున్నారని బుట్టా రేణుక ధ్వజమెత్తారు.

2024 మేనిఫేస్టోలో చంద్రబాబు చేనేత రంగానికి జీఎస్టీ రీయింబర్స్‌మెంట్, మగ్గాలకు ఉచిత విద్యుత్ ప్రకటించి అధికారంలోకి వచ్చి పద్నాలుగు నెలలు అవుతున్న అమలు చేయడం లదేని బుట్టా రేణుక విమర్శించారు. 2014 లో కూడా చేనేతలకు రుణమాఫీ, షెడ్లు, ఇళ్ళు నిర్మించి ఇస్తామని, వర్షాకాలంలో మగ్గాల గుంతల్లో నీరు చేరి పనులు చేసుకోలేని పరిస్థితిలో నెలకు రూ.2 వేలు చొప్పున రెండు నెలల పాటు ఇస్తామని, రూ. వెయ్యి కోట్లతో నిధులను ఏర్పాటు చేసిన చేనేతలకు అండగా నిలుస్తామని హామీలు గుప్పించి విస్మరించారని రేణుక ఆగ్రహం వ్యక్తం చేశారు. జాతీయ చేనేత దినోత్సవం నాడు కూటమి ప్రభుత్వానికి తాను ఇచ్చిన హామీలు గుర్తుకు వచ్చాయా..? మరమగ్గాలకు 500 యూనిట్లు, హ్యాండ్‌లూమ్ మగ్గాలకు 300 యూనిట్లు ఉచిత విద్యుత్ ఇస్తామంటూ ఇప్పుడు మాట్లాడుతున్నారని మండిపడ్డారు. కనీసం ఎప్పటి నుంచి దీనిని అమలు చేస్తారో చెప్పలేదన్నారు.

వైయస్ఆర్‌సీపీ హయాంలోనే నేతన్నకు మేలు

వైయస్ఆర్‌సీపీ ప్రభుత్వంలో నేతన్నల కోసం ప్రతి ఒక్కరికీ ఏడాదికి రూ.24 వేల చొప్పున అయిదేళ్ళకు ఒక్కో కుటుంబానికి రూ.1.20 లక్షలు ఇచ్చారని మాజీ ఏంపీ బుట్టా రేణుక గుర్తు చేశారు. నేత కార్మికులకు నైపూణ్యాభివృద్ధి కేంద్రాలను ఏర్పాటు చేసి, సబ్సిడీకి లూమ్స్, షెడ్స్, పరికరాలకు ఆర్థిక చేయూతను అందించారన్నారు. ఆప్కోను అభివృద్ధి చేసి, వివిధ ప్రాంతాలకు విస్తరింపచేశారు. 92,724 మందికి పెన్షన్లు ఇస్తుంటే, దానిలో వైయస్ఆర్‌సీపీ ప్రభుత్వం సొంతమగ్గాలు ఉన్న 82,130 మందికి నేతన్ననేస్తంను అందించారని చెప్పారు. అప్పట్లో దీనిపైన కూడా టీడీపీ నేతలు విమర్శలు చేశారని మండిపడ్డారు. కూటమి ప్రభుత్వం తాజా హామీల్లో మొత్తం 91,300 మందికి ఉచిత విద్యుత్‌ను అందిస్తామని చెప్పారు. కానీ నేడు వాటిని కుదించి కేవలం 50,000 సొంత మగ్గాలు ఉన్నవారికి, 15వేల మరమగ్గాల వారికి మాత్రమే ఇస్తామని చెబుతున్నారు. ఇది మోసం కాదా..? చేతివృత్తులు, గ్రామాల్లోని కుటీర పరిశ్రమల వారికి జీఎస్టీ మినహాయింపు ఉంది. రూ.1000 వరకు ఉంటే 5 శాతం, అది దాటితే 12 శాతంగా విధిస్తున్నారు. దీనిని చేనేతకు ఎలా మినహాయింపు కల్పిస్తారో కూటమి ప్రభుత్వం స్పష్టత ఇవ్వాలి. చంద్రబాబు ప్రభుత్వంలో నేతన్నల కోసం రూ. 442 కోట్లు మాత్రమే ఖర్చు చేశారు. వైయస్ఆర్‌సీపీ ప్రభుత్వ హయాంలో గతంలో మిగిల్చిన రూ.103 కోట్లు బకాయిలతో కలిపి అయిదేళ్ళలో రూ.3706 కోట్లు ఖర్చు చేసింది. 2018-19 తెలుగుదేశం హయాంలో నేతన్న సగటు ఆదాయం రూ. 4,680 ఉంటే, వైయస్ఆర్‌సీపీ ప్రభుత్వంలో అందించిన ప్రోత్సాహం వల్ల వారి సగటు వార్షిక ఆదాయం రూ.15వేలకు పెరిగింది. వైయస్ఆర్‌సీపీ పాలనలో నేతన్న నేస్తం పథకం ద్వారా రూ.982 కోట్ల మేర అర్థిక సాయం అందించడం జరిగింది. ఆప్కోలో కూడా కొత్త డిజైన్ల కోసం 46 ప్రాంతాల్లో శిక్షణా కేంద్రాలను ఏర్పాటు చేశామని మాజీ ఎంపీ బుట్టా రేణుక వివరించారు.