Spurious ghee supply case: సుబ్బారెడ్డి సేవలోనే చిన్నప్పన్న.. ఏపీ భవన్లో రహస్య నియామకాలు!
ఏపీ భవన్లో రహస్య నియామకాలు!
Spurious ghee supply case: వైకాపా హయాంలో తిరుమల తిరుపతి దేవస్థానం (తితిదే)కు లక్షల కిలోల కల్తీ నెయ్యి సరఫరా కేసులో కీలక నిందితుడైన కదురు చిన్నప్పన్న.. అప్పటి తితిదే ఛైర్మన్ వైవీ సుబ్బారెడ్డికి కేవలం పర్సనల్ అసిస్టెంట్ (పీఏ) మాత్రమే కాదు, అంతకంటే ఎక్కువగా నమ్మకమైన బంటుగా పనిచేశాడని ఆధారాలతో తేలింది.
సుబ్బారెడ్డి వ్యక్తిగత వ్యవహారాలన్నీ చక్కబెట్టేందుకే చిన్నప్పన్నను 2019లో వైకాపా అధికారంలోకి వచ్చిన కొద్ది నెలల్లోనే దిల్లీలోని ఏపీ భవన్లో లైజనింగ్ అధికారిగా నియమించారు. మూడేళ్ల తర్వాత 2022లో ఏపీ భవన్ ప్రత్యేకాధికారి (స్పెషల్ సెక్రటరీ) హోదా ఇచ్చారు. నెలకు రూ.75 వేల పారితోషికంతో పాటు ప్రొటోకాల్లో 'పీ' కేటగిరి కింద అదనపు సౌకర్యాలు, ఎలవెన్స్లు కల్పించారు. 2019 అక్టోబరు నుంచి 2024 జూన్ వరకు (కూటమి ప్రభుత్వం అధికారం చేపట్టే వరకు) ఈ పదవుల్లో చిన్నప్పన్న కొనసాగాడు.
పేరుకే ఏపీ భవన్లో అధికారి అయినా, అతని ప్రధాన పని సుబ్బారెడ్డి వ్యక్తిగత వ్యవహారాలు చూసుకోవడమే అని స్పష్టమవుతోంది. సుబ్బారెడ్డి సిఫార్సులు, ఆదేశాలు లేకుండా ఇలాంటి కీలక పదవులు దక్కడం సాధ్యమే కాదని అర్థమవుతోంది. ప్రభుత్వ ఖజానా నుంచి జీతాలు, భత్యాలు తీసుకుని సుబ్బారెడ్డి సేవలకు వినియోగించుకున్నట్లు తేలుతోంది.
రహస్య జీవోలు, పొడిగింపులు
2019 అక్టోబరు 10న చిన్నప్పన్నను స్పెషల్ లైజనింగ్ అధికారిగా నియమించిన ఉత్తర్వులు జారీ అయ్యాయి. ఇందులో మాజీ ముఖ్యమంత్రి ప్రధాన సలహాదారు అజేయ కల్లం 2019 ఆగస్టు 13న పంపిన నోట్ ఆధారంగా నియామకం చేపట్టినట్లు పేర్కొన్నారు. మూడేళ్ల కాలపరిమితితో రూ.75 వేల పారితోషికం కల్పించారు.
2022 అక్టోబరు 10తో పదవీ కాలం ముగిసిన నేపథ్యంలో చిన్నప్పన్న సెప్టెంబరు 22న ప్రభుత్వానికి లేఖ రాశాడు. దాన్ని ఆధారంగా చేసుకుని 2022 అక్టోబరు 7న రెండేళ్ల కాలపరిమితితో ప్రత్యేకాధికారిగా నియమించారు. ఈ జీవోను జీవోఐఆర్లో అప్లోడ్ చేయకుండా రహస్యంగా ఉంచి, నెలన్నర తర్వాత 2022 నవంబరు 17న ఈ-గెజిట్లో అప్లోడ్ చేశారు.
తితిదేలో చిన్నప్పన్న జోక్యం
2019 నుంచి 2023 వరకు తితిదే వ్యవహారాల్లో చిన్నప్పన్న బాగా జోక్యం చేసుకున్నాడు. సుబ్బారెడ్డితో సంబంధం లేకపోతే ఏపీ భవన్ అధికారికి తితిదేలో ఏం పని? అనే ప్రశ్నలు లేవనెత్తుతున్నాయి.
ఇలాంటి నియామకాలు, రహస్య జీవోలు వైకాపా హయాంలో అధికార దుర్వినియోగానికి అద్దం పడుతున్నాయని ఆరోపణలు వినిపిస్తున్నాయి.