MG Cyberster : 6 నెలల్లోనే 500 కార్లు..ఇండియాలో నంబర్ 1 స్పోర్ట్స్ కారుగా ఎంజీ సైబర్‌స్టర్ రికార్డు

MG Cyberster : భారతదేశంలో లగ్జరీ స్పోర్ట్స్ కార్లంటే కేవలం పెట్రోల్ ఇంజిన్లే కాదు, ఎలక్ట్రిక్ కార్లు కూడా దుమ్ము రేపగలవని ఎంజీ సైబర్‌స్టర్ నిరూపించింది. 2025 క్యాలెండర్ ఇయర్‌లో దేశంలోనే అత్యధికంగా అమ్ముడైన స్పోర్ట్స్ కారుగా ఇది సరికొత్త రికార్డు సృష్టించింది. కేవలం ఆరు నెలల కాలంలోనే 500 యూనిట్లకు పైగా విక్రయాలు జరిపి, ఈ సెగ్మెంట్‌లో అగ్రస్థానాన్ని కైవసం చేసుకుంది. అదిరిపోయే వేగం, స్టైలిష్ లుక్స్‌తో ఉన్న ఈ కారు ప్రస్తుతం సంపన్న వర్గాలను మరియు వినూత్న టెక్నాలజీని ఇష్టపడే వారిని విపరీతంగా ఆకట్టుకుంటోంది.

ఎంజీ మోటార్ ఇండియా తన ప్రీమియం రిటైల్ ఛానెల్ అయిన ఎంజీ సెలెక్ట్ ద్వారా విక్రయిస్తున్న ఈ ఎలక్ట్రిక్ రోడ్‌స్టర్ ఊహించని విజయాన్ని అందుకుంది. రూ.74.99 లక్షల (ఎక్స్‌-షోరూమ్) ప్రారంభ ధర కలిగిన ఈ కారు, 2025లో భారత మార్కెట్లోకి వచ్చిన అతి తక్కువ కాలంలోనే 500 యూనిట్ల మార్కును దాటేసింది. ఎంజీ సైబర్‌స్టర్‌తో పాటు ఎంజీ9 లగ్జరీ సెడాన్ కూడా తన విభాగంలో సెగ్మెంట్ లీడర్‌గా నిలిచింది. ఈ కార్ల విక్రయాల కోసం కంపెనీ ప్రత్యేకంగా రూపొందించిన ఎంజీ సెలెక్ట్ అవుట్‌లెట్లు హై-ఎండ్ కస్టమర్లను ఆకట్టుకోవడంలో కీలక పాత్ర పోషించాయి.

సాంకేతిక వివరాల్లోకి వెళ్తే.. ఎంజీ సైబర్‌స్టర్ ఒక పక్కా పర్ఫార్మెన్స్ బీస్ట్. ఇందులో అమర్చిన డ్యూయల్ మోటార్ ఆల్-వీల్ డ్రైవ్ సెటప్ ఏకంగా 510 PS శక్తిని, 725 Nm టార్క్‌ను ఉత్పత్తి చేస్తుంది. దీని వేగం ఎంతంటే.. కేవలం 3.2 సెకన్లలోనే సున్నా నుంచి 100 కిలోమీటర్ల వేగాన్ని అందుకుంటుంది. ఇక గరిష్ట వేగం గంటకు 200 కిలోమీటర్లు. ఈ కారులో కంఫర్ట్, స్పోర్ట్, సూపర్ స్పోర్ట్, కస్టమ్ వంటి వివిధ డ్రైవింగ్ మోడ్స్ ఉన్నాయి, ఇవి డ్రైవర్‌కు ట్రాక్ మీద రేసింగ్ అనుభూతిని కలిగిస్తాయి.

బ్యాటరీ, రేంజ్ పరంగా కూడా సైబర్‌స్టర్ అదరగొడుతోంది. ఇందులో 77 kWh సామర్థ్యం గల బ్యాటరీ ప్యాక్ ఉంది, ఇది ఒక్కసారి ఛార్జ్ చేస్తే 580 కిలోమీటర్ల రేంజ్‌ను ఇస్తుందని కంపెనీ పేర్కొంది. ఈ రోడ్‌స్టర్ ప్రత్యేకత దాని కన్వర్టిబుల్ రూఫ్. బటన్ నొక్కితే చాలు, ఎలక్ట్రిక్ పద్ధతిలో పనిచేసే వెదర్ ప్రూఫ్ ఫ్యాబ్రిక్ రూఫ్ పది సెకన్లలోనే ఫోల్డ్ అయిపోతుంది. కారు లోపల మల్టీ-స్క్రీన్ కాక్ పిట్ సెటప్ ఉంది. ఇందులో 10.25 అంగుళాల మెయిన్ స్క్రీన్‌తో పాటు మరో రెండు 7 అంగుళాల టచ్ స్క్రీన్లు ప్రయాణీకులకు అత్యాధునిక వినోదాన్ని అందిస్తాయి.

బోస్ 8-స్పీకర్ సౌండ్ సిస్టమ్, లెవెల్ 2 ADAS రక్షణ ఫీచర్లు, వైర్డ్ ఆండ్రాయిడ్ ఆటో, ఆపిల్ కార్ ప్లే వంటి ఫీచర్లు ఈ కారును మరింత లగ్జరీగా మార్చాయి. ప్రస్తుతం మార్కెట్లో ఉన్న ఇతర ఖరీదైన స్పోర్ట్స్ కార్లతో పోలిస్తే, ఎంజీ సైబర్‌స్టర్ ఎలక్ట్రిక్ పవర్, స్టైల్ కలయికతో భారతీయ సంపన్న యువతను బాగా ఆకర్షిస్తోంది. రాబోయే రోజుల్లో ఎంజీ మోటార్స్ మరిన్ని ప్రీమియం మోడళ్లను భారత్‌కు తీసుకువచ్చే అవకాశం ఉందని ఆటోమొబైల్ నిపుణులు అంచనా వేస్తున్నారు.