Hyundai : హ్యుందాయ్ నుంచి కొత్త హైబ్రిడ్ ఎస్‌యూవీ..మారుతి ఫ్రాంక్స్‌కు ఇక చుక్కలే

Hyundai : భారతీయ ఆటోమొబైల్ మార్కెట్లో తిరుగులేని ఆధిపత్యం కోసం హ్యుందాయ్ మోటార్ ఇండియా సరికొత్త వ్యూహంతో వస్తోంది. ముఖ్యంగా మారుతి సుజుకి ఫ్రాంక్స్ సృష్టిస్తున్న ప్రభంజనానికి అడ్డుకట్ట వేసేందుకు హ్యుందాయ్ ఒక పవర్‌ఫుల్ సబ్-4 మీటర్ కాంపాక్ట్ క్రాస్‌ఓవర్‌ను సిద్ధం చేస్తోంది. అంతర్జాతీయ మార్కెట్లో బాగా ప్రాచుర్యం పొందిన హ్యుందాయ్ బేయోన్ ఆధారంగా రూపొందుతున్న ఈ కారు, 2026వ ఏడాది ద్వితీయార్ధంలో భారత రోడ్లపైకి రానుంది. ఈ కారుకు సంబంధించిన ఆసక్తికరమైన విశేషాలు ఇప్పుడు సోషల్ మీడియాలో వైరల్ అవుతున్నాయి.

హ్యుందాయ్ మోటార్ ఇండియా తన పోర్ట్‌ఫోలియోను విస్తరించడంలో భాగంగా Bc4i అనే కోడ్ నేమ్‌తో ఒక కొత్త మైక్రో-ఎస్‌యూవీని డెవలప్ చేస్తోంది. గ్లోబల్ మార్కెట్లో ఉన్న బేయోన్ మోడల్ దాదాపు 4.1 మీటర్ల పొడవు ఉంటుంది, కానీ భారత పన్ను నిబంధనల ప్రకారం దీనిని 4 మీటర్ల లోపు ఉండేలా మార్పులు చేస్తున్నారు. హ్యుందాయ్ ఎక్స్టర్ తర్వాత, ఇది దేశంలో రెండో అత్యంత చవకైన హ్యుందాయ్ ఎస్‌యూవీగా నిలవనుంది. దీని ప్రారంభ ధర రూ.7 లక్షల నుంచి మొదలై, టాప్ ఎండ్ వేరియంట్ రూ.15 లక్షల వరకు ఉండే అవకాశం ఉందని విశ్లేషకులు అంచనా వేస్తున్నారు.

ఈ కారులో రాబోతున్న అతిపెద్ద ఆకర్షణ దాని 1.2 లీటర్ టర్బోచార్జ్డ్ డైరెక్ట్ ఇంజెక్షన్ పెట్రోల్ ఇంజిన్. ఇది కేవలం పవర్‌ఫుల్ మాత్రమే కాదు, హైబ్రిడ్ టెక్నాలజీకి కూడా అనుకూలంగా ఉంటుంది. భవిష్యత్తులో హ్యుందాయ్ తీసుకురాబోయే అన్ని హైబ్రిడ్ వాహనాల్లో ఇదే ఇంజిన్‌ను వాడనున్నారు. ఈ కొత్త ఇంజిన్ వెన్యూలోని 1.0 లీటర్ ఇంజిన్ కంటే ఎక్కువ టార్క్‌ను ఇస్తూనే, క్రెటాలోని 1.5 లీటర్ ఇంజిన్ కంటే మెరుగైన మైలేజీని అందిస్తుందని సమాచారం. దీనికి డ్యూయల్-క్లచ్ ఆటోమేటిక్ (DCT) లేదా ఈ-సివిటి (e-CVT) ట్రాన్స్‌మిషన్‌ను జత చేసే అవకాశం ఉంది.

డిజైన్ పరంగా చూస్తే.. ఇది ఒక స్పోర్టీ క్రాస్‌ఓవర్‌లా కనిపిస్తుంది. సిగ్నేచర్ వర్టికల్ స్టాన్స్, సరికొత్త డిజైన్ కలిగిన అలాయ్ వీల్స్, బాడీ క్లాడింగ్, వెనుక వైపు డిజైన్ చేయబడిన ఎల్ఈడీ టెయిల్ ల్యాంప్స్ దీనికి ప్రీమియం లుక్‌ను ఇస్తాయి. లోపల ఫీచర్ల విషయంలో కూడా హ్యుందాయ్ ఎక్కడా తగ్గడం లేదు. 10.25 ఇంచుల ఇన్ఫోటైన్‌మెంట్ సిస్టమ్, వైర్‌లెస్ ఆండ్రాయిడ్ ఆటో, ఆపిల్ కార్ ప్లే, 8-స్పీకర్ల బోస్ సౌండ్ సిస్టమ్, వైర్‌లెస్ ఛార్జింగ్ వంటి హంగులు ఇందులో ఉండనున్నాయి.

భద్రతకు ప్రాధాన్యతనిస్తూ.. ఈ కొత్త ఎస్‌యూవీలో కూడా హ్యుందాయ్ ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్) ఫీచర్లను అందించనుంది. లేన్ కీప్ అసిస్ట్, అడాప్టివ్ క్రూయిజ్ కంట్రోల్ వంటి ఫీచర్లు హై-ఎండ్ వేరియంట్లలో లభిస్తాయి. హ్యుందాయ్ తన కొత్త టర్బో హైబ్రిడ్ ఇంజిన్‌ను 2027లో రాబోయే నెక్స్ట్ జనరేషన్ క్రెటా, వెన్యూ మోడళ్లలో కూడా ఉపయోగించనుంది. మొత్తానికి 2026లో రాబోయే ఈ కొత్త కారుతో కాంపాక్ట్ ఎస్‌యూవీ విభాగంలో పోటీ మరో స్థాయికి చేరుకోవడం ఖాయం.