Kinetic : కైనెటిక్ కొత్త ఎలక్ట్రిక్ స్కూటర్: రెట్రో లుక్‌తో అడ్వాన్స్డ్ ఫీచర్లు!
రెట్రో లుక్‌తో అడ్వాన్స్డ్ ఫీచర్లు!;
Kinetic : e-లూనా సక్సెస్ అయిన తర్వాత, కైనెటిక్ గ్రీన్ కంపెనీ ఇప్పుడు ఎలక్ట్రిక్ టూ-వీలర్, త్రీ-వీలర్ సెగ్మెంట్‌పై దృష్టి పెట్టింది. కంపెనీ తన రాబోయే వాహనాల్లో AI బెస్డ్ డ్రైవర్ అసిస్ట్ సిస్టమ్, అడ్వాన్స్డ్ కనెక్టివిటీ, కొత్త టెక్నాలజీని కూడా జోడించాలనుకుంటోంది. ఇటీవల కంపెనీకి చెందిన ఒక కొత్త ఎలక్ట్రిక్ స్కూటర్ పూణేలో టెస్టింగ్ సమయంలో కనిపించింది. స్కూటర్ పూర్తిగా కప్పి ఉంది కాబట్టి దాని డిజైన్ గురించి పెద్దగా సమాచారం బయటకు రాలేదు.
కైనెటిక్ ఇటీవల ఒక కొత్త ఎలక్ట్రిక్ స్కూటర్‌కు డిజైన్ పేటెంట్ పొందింది. ఈ డిజైన్ పాత కైనెటిక్ హోండా ZX స్కూటర్‌ను పోలి ఉంది. టెస్టింగ్ సమయంలో కనిపించిన స్కూటర్ కూడా ZX స్ఫూర్తితోనే రెట్రో లుక్‌లో కనిపించింది. ఇందులో ముందు సన్నని డిజైన్‌తో కూడిన ఫ్రంట్ ఏప్రాన్, చిన్న విండ్‌స్క్రీన్, దీర్ఘచతురస్రాకార LED హెడ్‌లైట్లు ఉన్నాయి. సైడ్ మిర్రర్‌లు, నంబర్ ప్లేట్ స్థానం కూడా కైనెటిక్ హోండా ZX లాగానే ఉన్నాయి.
ఈ కొత్త స్కూటర్ లుక్ పాతది అయినప్పటికీ, ఇది అనేక అడ్వాన్స్డ్ ఫీచర్లతో రానుంది. ఇందులో డిజిటల్ మీటర్, బ్లూటూత్ కనెక్టివిటీ, స్మార్ట్‌ఫోన్ యాప్‌తో కనెక్షన్ వంటివి ఉంటాయి. దీని మోటార్, బ్యాటరీ గురించి ఇంకా ఖచ్చితమైన సమాచారం లేదు. కానీ ఇందులో మిడ్-మౌంటెడ్ ఎలక్ట్రిక్ మోటార్, చిన్న బ్యాటరీ ఉండవచ్చని భావిస్తున్నారు. స్కూటర్‌లో టెలిస్కోపిక్ ఫ్రంట్ సస్పెన్షన్, డ్యూయల్ రియర్ షాక్ అబ్జార్బర్, ఫ్రంట్ డిస్క్ బ్రేక్ , మూడు స్పోక్ అల్లాయ్ వీల్స్ ఉంటాయి.
ఈ కొత్త కైనెటిక్ హోండా DX స్కూటర్ ఫ్యామిలీ స్కూటర్‌గా మార్కెట్‌లోకి రానుంది. ఇది ఎథర్ రిజ్టా, హీరో విడా, బజాజ్ చేతక్, ఓలా S1, టీవీఎస్ ఐక్యూబ్ వంటి ఎలక్ట్రిక్ స్కూటర్లకు గట్టి పోటీ ఇవ్వనుంది. దీని ధర సుమారు రూ.లక్ష (ఎక్స్-షోరూమ్) ఉండవచ్చని, ఈ దివాళికి దీనిని లాంచ్ చేయవచ్చని అంచనా. దీంతో పాటు, కైనెటిక్ గ్రీన్ త్వరలో ఒక మిడ్-స్పీడ్ ఎలక్ట్రిక్ స్కూటర్ eZulu ను కూడా లాంచ్ చేయనుంది. వచ్చే ఏడాది ఒక హై-పవర్ స్కూటర్‌ను తీసుకురావడానికి కూడా సిద్ధంగా ఉంది.