Mahindra BE 6 : మహీంద్రా BE 6 బేస్ మోడల్ వచ్చేసింది.. కేవలం రూ. 18.90 లక్షలకే 682 కి.మీ. రేంజ్

Mahindra BE 6 : మహీంద్రా BE 6 ఎలక్ట్రిక్ కారు బేస్ మోడల్ ప్యాక్ వన్ డీలర్‌షిప్‌లకు చేరుకోవడం ప్రారంభించింది. దీనితో ఎంట్రీ-లెవల్ వేరియంట్ డెలివరీలు త్వరలోనే ప్రారంభమవుతాయని స్పష్టమవుతోంది. BE 6 మొత్తం ఐదు వేరియంట్‌లలో లభిస్తుంది: ప్యాక్ వన్, ప్యాక్ వన్ అబవ్, ప్యాక్ టూ, ప్యాక్ త్రీ సెలెక్ట్, ప్యాక్ త్రీ. ఈ చౌకైన మోడల్ టాటా ఎలక్ట్రిక్ కార్లకు, ముఖ్యంగా రాబోయే టాటా కర్వ్ EV కి గట్టి పోటీ ఇవ్వనుంది. ప్యాక్ వన్ వేరియంట్‌లో ముందు భాగంలో డ్యూయల్-పాడ్ LED హెడ్‌లైట్, హుడ్‌పై మెరిసే BE లోగో ఇచ్చారు.

మహీంద్రా BE 6 ప్యాక్ వన్ మోడల్ పక్కనుండి చూస్తే, ఇది బేస్ మోడల్ అని స్పష్టంగా తెలుస్తుంది, ఎందుకంటే ఇందులో ఏరోడైనమిక్ బ్లాక్ వీల్ కవర్‌లతో కూడిన 18-అంగుళాల స్టీల్ వీల్స్ ఇచ్చారు. ఇందులో ముందు డోర్‌ల కోసం ఫ్లష్-టైప్ హ్యాండిల్స్ ఉన్నాయి, ఇవి మాన్యువల్‌గా పనిచేస్తాయి. వెనుక డోర్ హ్యాండిల్‌ను C-పిల్లర్ దగ్గర అమర్చారు. కారు దిగువ భాగంలో, వీల్ ఆర్చ్‌ల చుట్టూ గ్లాస్ బ్లాక్ బాడీ క్లాడింగ్ ఇచ్చారు.. ఫాగ్ ల్యాంప్స్, సిల్వర్ స్కిడ్ ప్లేట్ కూడా ఇందులో లభిస్తాయి, అయితే, మీరు కావాలనుకుంటే వాటిని డీలర్‌షిప్ ద్వారా అమర్చుకోవచ్చు.

BE 6 ప్యాక్ వన్ వెనుక భాగంలో LED టెయిల్ ల్యాంప్స్ అందించారు. అయితే, ఇవి లైట్ బార్‌తో కనెక్ట్ చేయలేదు. ఇందులో బంపర్‌పై రిఫ్లెక్టర్లు, BE 6 బ్యాడ్జింగ్‌తో పాటు మహీంద్రా ఇన్ఫినిటీ లోగో కూడా ఉంది. మధ్యలో కటౌట్‌తో కూడిన రూఫ్-మౌంటెడ్ స్పాయిలర్, అదనపు లిప్ స్పాయిలర్ కూడా ఉన్నాయి. కనెక్టెడ్ టెయిల్ ల్యాంప్స్ లేకపోవడం వల్ల లిప్ స్పాయిలర్ కింద మెరిసే BE లోగో ఇచ్చారు.

BE 6 బేస్ మోడల్ క్యాబిన్ చూస్తే ఎక్కడా ఇది బేస్ వేరియంట్ లాగా అనిపించదు. ఇందులో స్టాండర్డ్ బ్లాక్, గ్రే కలర్ క్యాబిన్ థీమ్ లభిస్తుంది. సీట్లకు ఫ్యాబ్రిక్ అప్‌హోల్‌స్ట్రీ ఉంటుంది, అయితే టాప్ మోడల్స్‌లో లెదరెట్ అప్‌హోల్‌స్ట్రీ ఉంటుంది. డ్యాష్‌బోర్డ్ డ్రైవర్ వైపు నుండి ఫైటర్ జెట్ కాక్‌పిట్ లాగా కనిపిస్తుంది. డ్యాష్‌బోర్డ్‌పై కనెక్టెడ్ 12.3-అంగుళాల డ్యూయల్-స్క్రీన్ సెటప్ ఇచ్చారు. దీని కింద సన్నని అడ్డంగా ఉండే ఎయిర్ వెంట్స్ డ్యాష్‌బోర్డ్ అంతటా విస్తరించి ఉన్నాయి.

ఫీచర్ల విషయానికి వస్తే, BE 6 ప్యాక్ వన్‌లో 12.3-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, ఇన్‌స్ట్రుమెంట్ క్లస్టర్‌తో పాటు, వైర్‌లెస్ ఆండ్రాయిడ్ ఆటో, యాపిల్ కార్‌ప్లే కనెక్టివిటీ, 6-స్పీకర్ సౌండ్ సిస్టమ్, క్రూయిజ్ కంట్రోల్, వెనుక వెంట్స్‌తో ఆటో ఏసీ, పుష్ బటన్ స్టార్ట్-స్టాప్ వంటి ఫీచర్లు ఉన్నాయి. ప్రయాణీకుల భద్రత కోసం ఎలక్ట్రానిక్ పార్కింగ్ బ్రేక్, సెన్సార్‌లతో రియర్ పార్కింగ్ అసిస్ట్, టైర్ ప్రెజర్ ఇండికేటర్, రెయిన్-సెన్సింగ్ వైపర్స్ వంటి సేఫ్టీ ఫీచర్లు ఇచ్చారు. మహీంద్రా BE 6 బేస్ మోడల్ ప్యాక్ వన్ ధర రూ. 18.90 లక్షలు (ఎక్స్-షోరూమ్)గా ఉంది, అయితే ఇతర వేరియంట్ల ధర రూ. 26.90 లక్షల వరకు వెళుతుంది. ఈ ఎలక్ట్రిక్ కారు విన్ఫాస్ట్ వీఎఫ్6, హ్యుందాయ్ క్రెటా ఎలక్ట్రిక్, టాటా కర్వ్ EV, ఎంజీ జెడ్ఎస్ ఈవీలకు పోటీ ఇస్తుంది.