Car Sales : మారుతి, హ్యుందాయ్, టాటా అద్భుతం.. ఒక్క రోజే ఎన్ని లక్షల కార్లు అమ్మారో తెలుసా ?

Car Sales : భారతదేశంలో కార్ల మార్కెట్ ప్రస్తుతం పూర్తిగా పండుగల రద్దీతో నిండిపోయింది. ఈ సంవత్సరం ధనతేరస్ సందర్భంగా కార్ల డెలివరీలలో అత్యంత పెద్ద వృద్ధి నమోదైంది. మూడు పెద్ద కార్ల కంపెనీలు.. మారుతి సుజుకి, హ్యుందాయ్ మోటార్ ఇండియా, టాటా మోటార్స్ ప్యాసింజర్ వెహికల్స్ ఈసారి అమ్మకాలు చాలా బలంగా ఉన్నాయని తెలిపాయి. ఆటో పరిశ్రమ దీనిని జీఎస్టీ 2.0 సెంటిమెంట్ బూస్ట్‎గా అభివర్ణిస్తోంది. అంటే, ప్రజలలో కొనుగోలు పట్ల విశ్వాసం, ఉత్సాహం పెరిగిందని అర్థం.

మారుతి సుజుకికి అతిపెద్ద ధనతేరస్ సేల్స్

భారతదేశంలో అతిపెద్ద కార్ల కంపెనీ అయిన మారుతి సుజుకి, ఈసారి రికార్డు స్థాయిలో పర్ఫామెన్స్ కనబరిచింది. శనివారం అయినప్పటికీ, కొంతమంది కొనుగోలుదారులు ఆలస్యం చేసినప్పటికీ, కంపెనీ మధ్యాహ్నం నాటికే 38,500 కార్లను డెలివరీ చేసింది. రాత్రికి ఈ సంఖ్య 41,000 కు చేరి ఉంటుందని అంచనా. మారుతి సుజుకి మార్కెటింగ్ , సేల్స్ విభాగం సీనియర్ ఎగ్జిక్యూటివ్ ఆఫీసర్ పార్థో బెనర్జీ మాట్లాడుతూ.. ఈసారి మొత్తం 51,000 డెలివరీలు చేస్తామని, ఇది ఇప్పటివరకు అత్యధికం అని చెప్పారు. కంపెనీ పండుగ సమయంలో కూడా తమ ఫ్యాక్టరీలో ఉత్పత్తిని కొనసాగించి, షోరూమ్‌ల పనివేళలను పెంచింది.

హ్యుందాయ్ మోటార్ ఇండియా కూడా భారీ డెలివరీలు

హ్యుందాయ్ మోటార్ ఇండియా కూడా ఈసారి పండుగ సీజన్‌లో అద్భుతమైన పర్ఫామెన్స్‎ను కనబరిచింది. కంపెనీ ధనతేరస్ సందర్భంగా దాదాపు 14,000 కార్లను డెలివరీ చేసింది. హ్యుందాయ్ కూడా డెలివరీలను రెండు రోజులకు విభజించింది, తద్వారా వినియోగదారులు తమకు శుభముహూర్తంలో కారును తీసుకునే అవకాశం లభించింది. పండుగ ఉత్సాహం, మెరుగైన మార్కెట్ వాతావరణం కారణంగా అమ్మకాలు పెరిగాయని కంపెనీ తెలిపింది. జీఎస్టీ 2.0 ప్రజలలో కొనుగోలు పట్ల విశ్వాసం, స్పష్టతను పెంచిందని హ్యుందాయ్ పేర్కొంది.

టాటా మోటార్స్‌కు చిన్న నగరాల నుండి భారీ డిమాండ్

టాటా మోటార్స్ ప్యాసింజర్ వెహికల్స్‌కు కూడా ఈ ధనతేరస్ చాలా ప్రత్యేకంగా నిలిచింది. కంపెనీ ధనతేరస్ నుండి దీపావళి మధ్య దాదాపు 25,000 కు పైగా కార్లను డెలివరీ చేసింది. టాటా మోటార్స్ చీఫ్ కమర్షియల్ ఆఫీసర్ అమిత్ కామత్ మాట్లాడుతూ, ఈ సంవత్సరం డెలివరీలు రెండు నుండి మూడు రోజులలో జరుగుతున్నాయని, ఎందుకంటే వేర్వేరు ప్రాంతాలలో వేర్వేరు శుభముహూర్తాలు ఉన్నాయని చెప్పారు. డిమాండ్ నిలకడగా కొనసాగుతోందని, జీఎస్టీ 2.0 చిన్న, మధ్య తరహా నగరాలలో కొనుగోలు వేగాన్ని పెంచిందని ఆయన తెలిపారు.