PM Modi - Putin : రూ.5.5 కోట్ల కారు వదిలి పీఎం మోదీతో వైట్ ఫార్చ్యూనర్‌లో పుతిన్.. కారణం ఇదే

PM Modi - Putin : రష్యా అధ్యక్షుడు వ్లాదిమిర్ పుతిన్ భారతదేశానికి వచ్చిన సందర్భంగా, ప్రధానమంత్రి నరేంద్ర మోదీ ఆయనకు ఆత్మీయ స్వాగతం పలికారు. ఈ ఇద్దరు ప్రపంచ నాయకులు ఆప్యాయంగా ఆలింగనం చేసుకున్న ఫోటోలు సోషల్ మీడియాలో బాగా వైరల్ అయ్యాయి. అయితే రష్యా అధ్యక్షుడిని ఎయిర్‌పోర్టులో రిసీవ్ చేసుకున్న తర్వాత, పీఎం మోదీ ఆయన్ను తన వైట్ టయోటా ఫార్చ్యూనర్ కారులో కూర్చోబెట్టుకుని తమ నివాసానికి తీసుకెళ్లారు. ప్రపంచంలోని శక్తివంతమైన ఈ ఇద్దరు నేతలు ఫార్చ్యూనర్‌లో ప్రయాణించడం అందరి దృష్టిని ఆకర్షించింది.

ఖరీదైన భద్రతా కార్లు పక్కన

సాధారణంగా రష్యా అధ్యక్షుడు వ్లాదిమిర్ పుతిన్ తన రూ.5.5 కోట్ల విలువైన ఔరస్ సెనట్ (Aurus Senat) అనే అత్యాధునిక లగ్జరీ కారులో ప్రయాణిస్తారు. ఇది బుల్లెట్‌ప్రూఫ్, రసాయన దాడులను తట్టుకోగల హైటెక్ భద్రతా ఫీచర్లతో కూడిన కారు. పుతిన్ విదేశీ పర్యటనలకు కూడా ఈ కారును తీసుకెళ్తుంటారు. అలాగే, పీఎం నరేంద్ర మోదీ కూడా సాధారణంగా బుల్లెట్‌ప్రూఫ్ రేంజ్ రోవర్ లోనే ప్రయాణిస్తారు. దీని ప్రారంభ ధర రూ.2.31 కోట్లు ఉంటుంది. ఇంత ఖరీదైన, అత్యున్నత భద్రతా కార్లు అందుబాటులో ఉన్నప్పటికీ, ఈ ఇద్దరు ప్రపంచ నాయకులు సామాన్యంగా కనిపించే టయోటా ఫార్చ్యూనర్‌ను ఎంచుకోవడం విశేషం.

ఫార్చ్యూనర్‌లో ప్రయాణం ఎందుకు?

పీఎం మోదీ, పుతిన్ టయోటా ఫార్చ్యూనర్ లో కలిసి ప్రయాణించారు. పీఎం మోదీ కొన్ని ప్రత్యేక సందర్భాలలో ఫార్చ్యూనర్‌ను ఉపయోగించినప్పటికీ, ఈ ఇద్దరు నేతలు ఎంచుకోవడం ప్రాధాన్యత సంతరించుకుంది. భారతదేశంలో ఫార్చ్యూనర్ ధర రూ.33.65 లక్షల నుంచి మొదలవుతుంది. అయితే, ఇక్కడ గమనించదగిన విషయం ఏమిటంటే ఈ కారు భారత ప్రధాని భద్రతా దళంలో భాగం కాబట్టి, ఇది తప్పనిసరిగా బుల్లెట్‌ప్రూఫ్ వెర్షన్ అయి ఉంటుంది. దీని ధర సాధారణ మార్కెట్ ధర కంటే చాలా ఎక్కువగా ఉంటుంది. బహుశా అతిథి దేశం ప్రోటోకాల్, ఆతిథ్యానికి గౌరవం ఇవ్వడానికి, పుతిన్ తన సొంత కారును వదిలి పీఎం మోదీతో ఫార్చ్యూనర్‌లో ప్రయాణించి ఉండవచ్చు.