Royal Enfield Classic 350 : 350సీసీ బైక్‌ల మార్కెట్‌లో బాద్ షా.. బుల్లెట్, హంటర్‌ కూడా దీని వెనుకే

Royal Enfield Classic 350 : మన దేశంలో 350సీసీ మోటార్‌సైకిల్ సెగ్మెంట్కి క్రేజ్ రోజురోజుకీ పెరుగుతోంది. ముఖ్యంగా మే 2025 అమ్మకాలు చూస్తే.. మన భారతీయులు ఈ కేటగిరీ బైక్‌లను ఎంతగా ఇష్టపడుతున్నారో అర్థం అవుతుంది. మే నెలలో, రాయల్ ఎన్‌ఫీల్డ్ క్లాసిక్ 350 అమ్మకాల విషయంలో తన పోటీదారులందరినీ దాటేసి, టాప్ పొజిషన్లో నిలిచింది. క్లాసిక్ 350 ఏకంగా 28,628 యూనిట్లు అమ్ముడైంది. ఇది పోయిన సంవత్సరం మే 2024తో పోలిస్తే 20.39% ఎక్కువ. అప్పుడు దీని అమ్మకాలు 23,779 యూనిట్లు ఉన్నాయి.

క్లాసిక్ 350 నంబర్ 1 స్థానంలో నిలవగా, మిగిలిన బైక్‌ల పరిస్థితి ఎలా ఉందో చూద్దాం. రాయల్ ఎన్‌ఫీల్డ్ బుల్లెట్ 350 17,279 యూనిట్ల అమ్మకాలతో రెండో స్థానంలో నిలిచింది. ఇది ఏకంగా 85.16% అద్భుతమైన పెరుగుదలను చూపింది. ఈ మోడల్ దాని పవర్‌ఫుల్ పర్ఫామెన్స్, ఐకానిక్ లుక్స్ వల్ల ఇప్పటికీ చాలా మందికి ఇష్టమైన బైక్. హంటర్ 350 మూడో స్థానంలో నిలిచింది. ఈ బైక్ మే 2025లో 15,972 యూనిట్లు అమ్ముడైంది. దీని అమ్మకాలు కూడా 5.89% పెరిగాయి. మెటియోర్ 350 నాలుగో స్థానంలో ఉంది. ఈ నెలలో 7,697 యూనిట్లు అమ్ముడయ్యాయి. అయితే, దీని అమ్మకాల్లో 6.01% తగ్గడం కనిపించింది. ట్రయంఫ్ 400 ఐదో స్థానంలో ఉంది. ఈ బైక్ అమ్మకాలు 43.13% పెరిగి 3,030 యూనిట్లు అమ్ముడయ్యాయి. ఆరో స్థానంలో ఉన్న హోండా సీబీ 350 బైక్ 83.97% వార్షిక వృద్ధితో 2,410 యూనిట్లు అమ్ముడయ్యాయి. ఈ బైక్ నెమ్మదిగా మార్కెట్లో తన పట్టు సాధిస్తోంది.

జావా యెజ్డీ బీఎస్‌ఏ ఏడో స్థానంలో ఉంది. ఈ బైక్ 1,965 యూనిట్ల అమ్మకాలతో 21.59% తగ్గుదల చూపింది. ఎనిమిదో స్థానంలో నిలిచిన రాయల్ ఎన్‌ఫీల్డ్ హిమాలయన్ బైక్ అమ్మకాలు 55.07% తగ్గి 1,489 యూనిట్లు అమ్ముడయ్యాయి. డా హెచ్‌నెస్ 350 తొమ్మిదో స్థానంలో ఉంది. ఈ బైక్ అమ్మకాల్లో 34.91% తగ్గుదల కనిపించి, కేవలం 1,281 యూనిట్లు మాత్రమే అమ్ముడయ్యాయి. కేటీఎం 390 పదో స్థానంలో ఉంది. దీని అమ్మకాలు 58.63% పెరిగి 239 యూనిట్లు అమ్ముడయ్యాయి. మొత్తంగా చూస్తే, 350సీసీ సెగ్మెంట్‌లో రాయల్ ఎన్‌ఫీల్డ్ ఆధిపత్యం కొనసాగుతోంది.