Honda Activa : స్కూటర్ల మార్కెట్‌లో కింగ్ యాక్టివా.. టాప్ 3 మోడళ్లు ఇవే!

Honda Activa : భారతదేశంలో జూన్ నెలలో ద్విచక్ర వాహనాల అమ్మకాలు మిశ్రమ ఫలితాలను చూపాయి. ఒకవైపు మోటార్‌సైకిళ్ల అమ్మకాలు స్వల్పంగా మెరుగుపడగా, మరోవైపు స్కూటర్ల అమ్మకాలు పడిపోయాయి. స్కూటర్ల అమ్మకాల్లో 8.69% క్షీణత కనిపించినప్పటికీ, కొన్ని మోడళ్లు తమ ఆధిపత్యాన్ని నిలుపుకున్నాయి. ఈ జాబితాలో హోండా యాక్టివా అగ్రస్థానంలో నిలిచి కింగ్ అని నిరూపించుకుంది. గత జూన్ నెలలో టాప్ 10 జాబితాలో ఉన్న స్కూటర్ల మొత్తం అమ్మకాలు 4,72,205 యూనిట్లుగా నమోదయ్యాయి. ఇది జూన్ 2024లో అమ్ముడైన 5,17,126 యూనిట్లతో పోలిస్తే 8.69% తక్కువ. అంటే, అమ్మకాల్లో ఏకంగా 44,921 యూనిట్ల భారీ తగ్గుదల కనిపించింది. ఈ ప్రతికూల వాతావరణంలో కూడా హోండా యాక్టివా, టీవీఎస్ జుపిటర్, సుజుకి యాక్సెస్ టాప్ 3 స్థానాలను కైవసం చేసుకుని తమ సత్తా చాటాయి.

టాప్ 3 స్కూటర్ల వివరాలు:

1. హోండా యాక్టివా:

యాక్టివా మళ్లీ నంబర్ 1 స్థానాన్ని దక్కించుకుంది. అయితే దాని అమ్మకాలు 21.47% తగ్గాయి. గత నెలలో 1,83,265 యూనిట్ల యాక్టివా స్కూటర్లు అమ్ముడయ్యాయి. ఇది గత సంవత్సరం జూన్‌లో అమ్ముడైన 2,33,376 యూనిట్ల కంటే తక్కువ. అయినప్పటికీ, మొత్తం స్కూటర్ అమ్మకాల్లో యాక్టివా వాటా 38.81% గా ఉంది. హోండా యాక్టివా అనేక మోడళ్లను అందిస్తుంది. వాటిలో యాక్టివా 6G, యాక్టివా 125, యాక్టివా ఇ ఉన్నాయి. హోండా యాక్టివా 6G STD (బేస్ వెర్షన్) ఎక్స్-షోరూమ్ ధర రూ.82,136 నుండి ప్రారంభమై, 125 వెర్షన్ టాప్ మోడల్ కోసం దాదాపు రూ.లక్ష వరకు ఉంటుంది.

2. టీవీఎస్ జుపిటర్:

జుపిటర్ అద్భుతమైన వృద్ధిని సాధించి రెండో స్థానంలో నిలిచింది. దీని అమ్మకాలు ఏకంగా 49.76% పెరిగాయి. జూన్ 2025లో 1,07,980 యూనిట్ల జుపిటర్ స్కూటర్లు అమ్ముడయ్యాయి. కాగా జూన్ 2024లో ఇది 72,100 యూనిట్లుగా ఉంది. యాక్టివా లాగే, జుపిటర్ కూడా 110 సీసీ, 125 సీసీ మోడళ్లలో లభిస్తుంది. టీవీఎస్ జుపిటర్ ధర రూ.73,650 నుండి ప్రారంభమై, 125 మోడల్ కోసం దాదాపు రూ.93 వేల(ఎక్స్-షోరూమ్) వరకు ఉంటుంది.

3. సుజుకి యాక్సెస్:

సుజుకి యాక్సెస్ మూడో స్థానంలో నిలిచింది. దాని అమ్మకాల్లో స్వల్పంగా 1.22% క్షీణత కనిపించింది. జూన్ 2025లో 51,555 యూనిట్ల యాక్సెస్ అమ్ముడయ్యాయి. జూన్ 2024లో ఇది 52,192 యూనిట్లుగా ఉంది. సుజుకి యాక్సెస్ 125 స్కూటర్ 4 వేరియంట్‌లు, 6 రంగులలో అందుబాటులో ఉంది. సుజుకి యాక్సెస్ 125 ఆన్-రోడ్ ధర రూ.97,799 నుండి ప్రారంభమవుతుంది.

మొత్తంగా, జూన్ నెల స్కూటర్ల మార్కెట్‌కు అంతగా కలిసి రాకపోయినా, యాక్టివా, జుపిటర్, యాక్సెస్ వంటి మోడళ్లు తమ సత్తాను నిరూపించుకున్నాయి.