Sony Honda Afeela SUV : 40 సెన్సార్లు..18 కెమెరాలు..ఈ కారును గుద్దాలన్నా సాధ్యం కాదు

Sony Honda Afeela SUV : సోనీ, హోండా సంయుక్తంగా రూపొందించిన ఎలక్ట్రిక్ వాహన బ్రాండ్ అఫీలా ఎస్‌యూవీ, టెక్నాలజీ ప్రపంచాన్ని ఆశ్చర్యపరిచేలా తన సరికొత్త ఎలక్ట్రిక్ ఎస్‌యూవీ ప్రోటోటైప్‌ను CES 2026 వేదికగా ఆవిష్కరించింది. కేవలం కారు మాత్రమే కాదు, ఇదొక కదిలే ఎంటర్టైన్మెంట్ హబ్ అని సోనీ హోండా మొబిలిటీ నిరూపించింది. ఇది వరకు విడుదల చేసిన అఫీలా 1 సెడాన్ కంటే పెద్దదిగా, అత్యాధునిక సెన్సార్లతో ఈ సరికొత్త మోడల్ రూపుదిద్దుకుంది.

అఫీలా ఎస్‌యూవీ టెక్నాలజీ పరంగా సరికొత్త రికార్డులను సృష్టించింది. ఈ కారులో ఏకంగా 40 సెన్సార్లు అమర్చారు. ఇందులో 18 హై-రిజల్యూషన్ కెమెరాలు, 1 లిడార్, 9 రేడార్లు, 12 అల్ట్రాసోనిక్ సెన్సార్లు ఉన్నాయి. ఇవి కారు చుట్టూ ఉన్న పరిసరాలను నిరంతరం పర్యవేక్షిస్తూ లెవల్-2+ ADAS భద్రతను అందిస్తాయి. అంటే, ఈ కారు దాదాపుగా తనంతట తానుగా డ్రైవ్ చేసుకోగలదు.

చూడటానికి ఇది అఫీలా 1 సెడాన్ లాగే ఉన్నప్పటికీ, ఎస్‌యూవీ కావడంతో మరింత ఎత్తుగా, విశాలంగా ఉంటుంది. దీని ముందు భాగంలో మీడియా లైట్ బార్ ఉంటుంది, ఇది కారు ఛార్జింగ్ స్థితిని లేదా ఇతర సమాచారాన్ని బయటి వారికి చూపిస్తుంది. ఫాస్ట్‌బ్యాక్ రూఫ్‌లైన్, ఎరోడైనమిక్ డిజైన్‌తో ఈ కారు అత్యంత స్టైలిష్‌గా కనిపిస్తుంది.

సోనీ తన టెక్నాలజీని ఈ కారులో అద్భుతంగా వాడుకుంది. కారు డాష్‌బోర్డ్ మొత్తం భారీ డిస్‌ప్లేలతో నిండి ఉంటుంది. ఇందులో PS5 గేమింగ్ అనుభవాన్ని పొందవచ్చు. ఎపిక్ గేమ్స్, అన్రియల్ ఇంజిన్ సాయంతో కారు లోపల అద్భుతమైన విజువల్స్, గేమింగ్ సౌకర్యాలను కల్పించారు. కారు లోపల కూర్చుంటే ఒక లగ్జరీ సినిమా థియేటర్‌లో ఉన్న అనుభూతి కలుగుతుంది.

ఈ ఎస్‌యూవీలో 91 kWh బ్యాటరీ ప్యాక్ ఉండే అవకాశం ఉంది. ఇది డ్యూయల్ మోటార్ ఆల్-వీల్ డ్రైవ్ సిస్టమ్‌తో వస్తుంది. ఇది సుమారు 475 bhp పవర్‌ను ఉత్పత్తి చేయగలదు. ఒక్కసారి ఛార్జ్ చేస్తే 482 కిలోమీటర్ల దూరం ప్రయాణించగలదు. కేవలం 150 kW ఫాస్ట్ ఛార్జర్‌తో చాలా త్వరగా బ్యాటరీని నింపుకోవచ్చు.

సోనీ-హోండా జాయింట్ వెంచర్ ఈ కారును 2028లో అమెరికా మార్కెట్లో లాంచ్ చేయడానికి ప్లాన్ చేస్తోంది. అంతకంటే ముందే అంటే ఈ ఏడాది చివరలో అఫీలా 1 సెడాన్ ఉత్పత్తి ప్రారంభం కానుంది. ప్రస్తుతానికి ఈ బ్రాండ్‌ను భారత్‌లో లాంచ్ చేసే ఆలోచన లేకపోయినప్పటికీ, భవిష్యత్తులో వచ్చే అవకాశాలను కొట్టిపారేయలేం.