Tata Motors : మార్కెట్‌లో టాటా మోటార్స్ అదుర్స్.. మహీంద్రా, హ్యుందాయ్‌ను వెనక్కి నెట్టి రెండో ప్లేస్

Tata Motors : భారతీయ కార్ల మార్కెట్‌లో టాటా మోటార్స్ సెప్టెంబర్ 2025 నెలలో సంచలనం సృష్టించింది. అమ్మకాలలో మహీంద్రా, హ్యుందాయ్ వంటి దిగ్గజాలను వెనక్కి నెట్టి, దేశంలో రెండో అతిపెద్ద కార్ల కంపెనీగా అవతరించింది. టాటా నెక్సాన్ స్టార్‌ పెర్ఫార్మర్‌గా నిలవగా, ఎలక్ట్రిక్ వెహికల్, సీఎన్‌జీ విభాగాలలో కూడా కంపెనీ రికార్డు వృద్ధిని నమోదు చేసింది. పండుగ సీజన్ ప్రారంభం, జీఎస్టీ తగ్గింపుల కారణంగా టాటాకు భారీగా కలిసొచ్చింది.

సెప్టెంబర్ 2025లో టాటా మోటార్స్ మొత్తం 60,907 కార్లను విక్రయించింది. ఇది గత సంవత్సరంతో పోలిస్తే ఏకంగా 47 శాతం భారీ వృద్ధిని సూచిస్తుంది. ఈ అద్భుతమైన ప్రదర్శనకు ప్రధాన కారణం, కంపెనీ సబ్-4 మీటర్ ఎస్‌యూవీ నెక్సాన్. సెప్టెంబర్ నెలలో 22,500కు పైగా నెక్సాన్ యూనిట్లు అమ్ముడయ్యాయి. ఇది టాటా ప్యాసింజర్ కార్ల చరిత్రలో ఒక నెలలో అత్యధిక అమ్మకాలు నమోదు చేసిన మోడల్‌గా రికార్డు సృష్టించింది.

సెప్టెంబర్ 2025లో టాటా మోటార్స్ దేశీయంగా 40,594 కార్లను విక్రయించింది. ఇదే సమయంలో మహీంద్రా & మహీంద్రా 37,015 యూనిట్లు, హ్యుందాయ్ మోటార్ 35,443 యూనిట్ల అమ్మకాలు నమోదు చేశాయి. ఈ గణాంకాలు టాటా మోటార్స్ తన ఇద్దరు ప్రధాన పోటీదారులను పెద్ద తేడాతో వెనక్కి నెట్టి, భారతదేశంలో రెండో అతిపెద్ద కార్ల కంపెనీగా స్థిరపడినట్లు స్పష్టం చేస్తున్నాయి. భారతీయ కస్టమర్ల నుంచి టాటా బ్రాండ్‌కు పెరుగుతున్న విశ్వాసానికి ఇది నిదర్శనం.

టాటా మోటార్స్ పెట్రోల్, డీజిల్ కార్లకే కాకుండా, ఎలక్ట్రిక్, సీఎన్‌జీ కార్ల విభాగంలోనూ తన ఆధిపత్యాన్ని పెంచుకుంది. సెప్టెంబర్ 2025లో కంపెనీ 9,191 ఈవీ యూనిట్లను విక్రయించింది, ఇది గత ఏడాదితో పోలిస్తే 96% వృద్ధి. అదే సమయంలో 17,800 CNG యూనిట్ల విక్రయాలతో 105% వార్షిక వృద్ధిని నమోదు చేసింది. ప్రస్తుత ఆర్థిక సంవత్సరంలో ఇప్పటివరకు అమ్ముడైన మొత్తం 1,44,397 ప్యాసింజర్ వాహనాలలో, ఈవీ, సీఎన్జీ కార్ల వాటా ఏకంగా 44%కు చేరింది.

నెక్సాన్‌తో పాటు, టాటా మోటార్స్ ఇతర ఎస్‌యూవీలు కూడా మార్కెట్‌లో అద్భుతమైన పనితీరును కనబరిచాయి. హారియర్, సఫారీ మోడళ్లు ఇటీవల విడుదలైన అడ్వెంచర్ ఎక్స్ ఎడిషన్ కారణంగా రికార్డు స్థాయిలో అమ్ముడయ్యాయి. పంచ్ కాంపాక్ట్ ఎస్‌యూవీ సెగ్మెంట్‌లో తన పట్టును మరింత బలోపేతం చేసుకుని కస్టమర్ల అభిమాన కారుగా నిలిచింది. ఇటీవల జీఎస్టీ తగ్గిన తర్వాత కంపెనీకి బుకింగ్స్ దాదాపు రెట్టింపు అయ్యాయి, ఇది కూడా మొత్తం అమ్మకాలు రికార్డు స్థాయిలో పెరగడానికి దోహదపడింది.