Tata Sierra 2025 : మార్కెట్‌లోకి టాటా సియెర్రా.. క్రెటా, సెల్టోస్‌లకు గట్టి పోటీ

Tata Sierra 2025 : టాటా మోటార్స్ నుంచి కస్టమర్లు ఎంతో ఆసక్తిగా ఎదురుచూస్తున్న టాటా సియెర్రా 2025 ఎస్‌యూవీ ఈ రోజు (నవంబర్ 25) అధికారికంగా లాంచ్ అయింది. దీని ప్రారంభ ఎక్స్-షోరూమ్ ధర రూ.11.49 లక్షలుగా నిర్ణయించారు. స్ట్రాంగ్ లుక్, ప్రీమియం ఫీచర్లు, మోడ్రన్ టెక్నాలజీ కావాలనుకునే మిడ్ సైజ్ సెగ్మెంట్ కస్టమర్లకు ఈ ఎస్‌యూవీ సరైన ఎంపికగా నిలుస్తుంది. పాత సియెర్రా గుర్తింపును కొనసాగిస్తూనే, ఈ మోడల్‌ను మరింత మోడర్న్‌గా మరియు టెక్నాలజీతో నింపి తీసుకొచ్చారు.

కొత్త టాటా సియెర్రా కారులో పెట్రోల్, డీజిల్ రెండింటి ఆప్షన్లు ఉన్నాయి. కస్టమర్లు వారి డ్రైవింగ్ అవసరాలకు అనుగుణంగా ఎంచుకోవడానికి వీలుగా, ఇందులో మొత్తం 6 రకాల పవర్‌ట్రైన్ ఆప్షన్స్ (ఇంజిన్, గేర్‌బాక్స్ కాంబినేషన్లు) అందుబాటులో ఉన్నాయి. బేస్ వేరియంట్‌లలో కూడా మంచి ఫీచర్లు ఉండేలా కంపెనీ జాగ్రత్త తీసుకుంది. ఈ ఎస్‌యూవీ ఆరు అద్భుతమైన రంగులలో లభిస్తుంది. దీని ద్వారా కొనుగోలుదారులు తమకు నచ్చిన రంగును ఎంచుకోవచ్చు.

టాటా సియెర్రా డిజైన్ మునుపటి కంటే మరింత ఆకర్షణీయంగా, భవిష్యత్తు కార్ల లుక్‌లో ఉంది. ముందు భాగంలో పొడవాటి ఎల్‌ఈడీ లైట్ బార్, మస్కులర్ బాడీ లైన్స్, ఫ్లష్ డోర్ హ్యాండిల్స్, ప్రీమియం లుక్ ఇచ్చే డిజైన్ ఎలిమెంట్స్ దీనిని ప్రత్యేకంగా నిలబెడతాయి. లోపలి భాగంలో కొత్త ట్రిపుల్-స్క్రీన్ థియేటర్ ప్రో సెటప్, JBL ప్రీమియం సౌండ్ సిస్టమ్, వైర్‌లెస్ ఛార్జింగ్, 360-డిగ్రీ కెమెరా, వెంటిలేటెడ్ సీట్లు, కనెక్టెడ్ కార్ టెక్నాలజీ వంటి లేటెస్ట్ ఫీచర్లు ఉన్నాయి. ఈ ఎస్‌యూవీ కంఫర్ట్, స్పేస్, టెక్నాలజీల అద్భుతమైన కలయిక.

కొత్త టాటా సియెర్రా కొనుగోలు చేయాలనుకునే వారు డిసెంబర్ 16, 2025 నుంచి బుకింగ్ చేసుకోవచ్చు. జనవరి 15, 2026 నుంచి కస్టమర్లకు డెలివరీలు మొదలవుతాయి. రూ.11.49 లక్షల ఎక్స్-షోరూమ్ ధరతో, టాటా సియెర్రా ఇప్పుడు మార్కెట్‌లోని ప్రముఖ మిడ్-సైజ్ ఎస్‌యూవీలైన హ్యుందాయ్ క్రెటా, కియా సెల్టోస్, మారుతి గ్రాండ్ విటారా, హోండా ఎలివేట్ వంటి వాటికి గట్టి పోటీ ఇవ్వనుంది.