Tata Sierra Vs Maruti Victoris : టాటా సియెర్రా vs మారుతి విక్టోరిస్..రెండింటిలో ఏది దమ్మున్న కారు ?

Tata Sierra Vs Maruti Victoris : భారతీయ కార్ల మార్కెట్‌లో ప్రస్తుతం టాటా సియెర్రా, మారుతి విక్టోరిస్ అనే రెండు కొత్త ఎస్‌యూవీలు గట్టి పోటీకి సిద్ధమయ్యాయి. చాలా ఏళ్ల తర్వాత కొత్త లుక్‌లో మళ్లీ లాంచ్ అయిన సియెర్రా ఒకవైపు ఉంటే, కొత్తగా మార్కెట్లోకి వచ్చిన విక్టోరిస్ మరోవైపు నిలిచింది. ఈ రెండు కార్లలో ఫీచర్లు, ఇంజిన్ పవర్, సైజు, ధరల విషయంలో ఏది బెస్ట్ అనేది తెలుసుకుందాం.

ధర, ఇంజిన్ పవర్‌

ధరల విషయానికి వస్తే టాటా సియెర్రా ప్రారంభ ఎక్స్-షోరూమ్ ధర రూ.11.49 లక్షలుగా ఉంది. అయితే, మారుతి విక్టోరిస్ కొంచెం తక్కువకే మొదలవుతుంది. దీని ప్రారంభ ధర రూ.10.50 లక్షల నుంచి మొదలై, టాప్ ఎండ్ మోడల్ రూ.19.99 లక్షల వరకు ఉంటుంది. పవర్ విషయానికి వస్తే, సియెర్రాలో 1498cc, 4-సిలిండర్ పెట్రోల్ ఇంజిన్ ఉంటుంది. ఇది 105 bhp పవర్, 145 Nm టార్క్ ఇస్తుంది. దీని ఫ్యూయల్ ట్యాంక్ 50 లీటర్లు. దీనితో పోలిస్తే, విక్టోరిస్‌లో 1490cc, 3-సిలిండర్ పెట్రోల్ ఇంజిన్ ఉన్నప్పటికీ, అది ఏకంగా 141.14 bhp పవర్, 141 Nm టార్క్ ఇస్తుంది. అంటే పవర్ పరంగా మారుతి విక్టోరిస్ స్పష్టంగా ముందంజలో ఉంది. అయితే సియెర్రా 4-సిలిండర్ ఇంజిన్‌తో వస్తుంది కాబట్టి రైడింగ్‌లో ఎక్కువ స్మూత్‌నెస్ ఉండే అవకాశం ఉంది.

సైజు, క్యాబిన్ స్పేస్

సైజు, స్పేస్ పరంగా చూస్తే టాటా సియెర్రా కొన్ని విషయాల్లో మెరుగ్గా ఉంది. సియెర్రా 4340 ఎంఎం పొడవు, 1841ఎంఎం వెడల్పు, 1715ఎంఎం ఎత్తు కలిగి ఉంది. దీని వీల్‌బేస్ 2730ఎంఎం, అత్యంత ముఖ్యంగా ఇది 622 లీటర్ల భారీ బూట్ స్పేస్‌ను అందిస్తుంది. ఇది కుటుంబంతో లాంగ్ జర్నీలు చేసేవారికి చాలా అనుకూలం. మరోవైపు మారుతి విక్టోరిస్ కొంచెం ఎక్కువ పొడవు (4360ఎంఎం), కొద్దిగా ఎక్కువ గ్రౌండ్ క్లియరెన్స్ (210ఎంఎం) కలిగి ఉంది. అయితే, దీని బూట్ స్పేస్ కేవలం 446 లీటర్లు మాత్రమే. మొత్తం మీద క్యాబిన్, బూట్ స్పేస్ విషయంలో సియెర్రానే ఎక్కువ స్థలాన్ని ఇస్తుంది.

ఫీచర్లు, సేఫ్టీ టెక్నాలజీ

రెండు ఎస్‌యూవీలు కూడా ప్రీమియం ఫీచర్లతో వచ్చాయి. టాటా సియెర్రా ముఖ్యమైన ప్రత్యేకత దాని ట్రిపుల్ స్క్రీన్ సెటప్. ఇందులో డ్రైవర్, ఇన్ఫోటైన్‌మెంట్, ప్యాసింజర్ ఎంటర్‌టైన్‌మెంట్ కోసం మూడు వేర్వేరు స్క్రీన్‌లు ఉంటాయి. సేఫ్టీ కోసం ఇందులో ABS, EBD, ESC, 6 ఎయిర్‌బ్యాగ్‌లు, ట్రాక్షన్ కంట్రోల్ వంటి స్టాండర్డ్ ఫీచర్లు ఉన్నాయి. మారుతి విక్టోరిస్‌లో కూడా లగ్జరీ ఫీచర్లు పుష్కలంగా ఉన్నాయి. ఇందులో పనోరమిక్ సన్‌రూఫ్, వెంట్స్ ఉన్న సీట్లు, లెదరెట్ అపోల్స్ట్రీ, ఆటోమేటిక్ క్లైమేట్ కంట్రోల్ వంటివి ఉన్నాయి. సేఫ్టీ విషయంలో విక్టోరిస్ ఒక అడుగు ముందుంది. ఇందులో 360° కెమెరా, ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్) వంటి అడ్వాన్స్‌డ్ టెక్నాలజీ ఉంది. దీనికి తోడు, విక్టోరిస్‌కు 5-స్టార్ సేఫ్టీ రేటింగ్ కూడా లభించింది. అందుకే ఫీచర్లు,సేఫ్టీ రేటింగ్‌లో విక్టోరిస్ మెరుగైన ఆప్షన్గా నిలుస్తుంది.

ఏ కారును ఎంచుకోవాలి?

చివరిగా మీకు ఎక్కువ పవర్, మోడ్రన్ సేఫ్టీ (ADAS), లగ్జరీ ఫీచర్లు (సన్‌రూఫ్, వెంటిలేటెడ్ సీట్లు), తక్కువ ప్రారంభ ధర కావాలంటే, మీరు మారుతి విక్టోరిస్‌ను ఎంచుకోవచ్చు. కానీ మీకు ఎక్కువ క్యాబిన్ స్పేస్, భారీ బూట్ స్పేస్ (622 లీటర్లు), స్పెషల్ ట్రిపుల్ స్క్రీన్ సెటప్, క్లాసిక్ బ్రాండింగ్‌తో కూడిన స్మూత్ రైడింగ్ కావాలంటే, టాటా సియెర్రా వైపు మొగ్గు చూపవచ్చు.